ពលរដ្ឋ៣ភូមិ នៅស្រុកសណ្ដាន់ រងគ្រោះដោយសារក្រុមហ៊ុន ស៊ីអ ស៊ីខេ ឈូកឆាយរំលោភយកដីពួកគាត់ សុំឲ្យសម្ដេចតេជោជួយអន្តរាគមន៍
កំពង់ធំ ៖ ប្រជាពលរដ្ឋ ៣ភូមិក្នុងឃុំសណ្ដាន់ ស្រុកសណ្ដាន់ ខេត្តកំពង់ធំ បានចោទ ក្រុមហ៊ុន ស៊ីអ ស៊ីខេ ថា បានឈូកឆាយ រំលោភយកដីរបស់ពួកគាត់ ដែល បានកាន់កាប់តាំងតែឆ្នាំ២០០៨ មក ចំណែកអាជ្ញាធរស្រុកសណ្ដាន់ ពុំបាន ដោះ ស្រាយ និងរកយុត្តិធម៌ឲ្យពួកគាត់នោះទេ ផ្ទុយទៅវិញពួកគេកាន់ជើងតែខាងក្រុមហ៊ុន ដែលធ្វើឲ្យ ភាគគីប្រជាពលរដ្ឋ មិនអាចទទួលយកបាន ហើយនាំគ្នា តស៊ូប្រឆាំង មិនឲ្យក្រុមហ៊ុន ដាំ ដំណាំ កៅស៊ូបាននោះទេ ហើយពួកគាត់សំណូមពរ សុំឲ្យមានការអន្តរាគមន៍ពី ឯកឧត្ដម អភិបាលខេត្ត និងសម្ដេច អគ្គមហាសេនាបតី តេជោហ៊ុន សែន មេត្តាជួយពួកគាត់។
ពួកគាត់ និយាយថា ប្រជាពលរដ្ឋ ដែលក្រុមហ៊ុនស៊ី អ ស៊ីខេ ឈូកឆាយរំលោភយកចំការ ដំណាំនេះ មានចំនួន៣ភូមិ គឺភូមិ ឈូក ,ភូមិក្រសាំង និងភូមិស្រះអណ្ដូង ស្ថិតនៅឃុំសណ្ដាន់ ខេត្ត កំពង់ធំ។
លោក សឹម វៀត និង លោក សូវីន ជាប្រជាពលរដ្ឋ ក្នុងចំណោម១៥គ្រួសារនេះ បានអះអាង ថាដីចំការ របស់ពួកគាត់១៥គ្រួសារនេះ មានទំហំប្រមាណ២៨ហិតា បានកាន់កាប់ និងអាស្រ័យផល តាំងពីឆ្នាំ២០០៨ មក ដោយបានដំណាំដំឡូង និងស្វាយចន្ទី ទើបតែក្រុមហ៊ុនយកគ្រឿងចក្រទៅ ឈូកឆាយដីដំណាំរបស់ពួកគាត់ ហេតុរូបគាត់ ក៏ដូចប្រជាពលរដ្ឋ ដែលមានដីចំការ ត្រូវបានក្រុម ហ៊ុនស៊ីអ ស៊ីខេ ឈូកឆាយរំលោភយកនេះ គឺសុំឲ្យសម្ដេច ហ៊ុន សែន មេត្តាជួយដោះស្រាយឲ្យពួក គាត់ផង ដោយពួកចង់បានឲ្យ ក្រុមហ៊ុន ស៊ីអ ស៊ីខេ ដោះដូរ ដីឲ្យពួកគាត់វិញ ព្រោះថា ក្រោយពី ក្រុមហ៊ុន ស៊ីអ ស៊ីខេ ឈូកឆាយដីដំណាំរបស់ពួកគាត់ និងកាយប្រឡាយកំណត់ជាព្រុំប្រទល់ នោះ គឺដីនៅសល់ច្រើនណាស់។
ស្ត្រីម្នាក់ នៅក្នុងចំណោមប្រជាពលរដ្ឋ១គ្រួសារនោះដែរ បាននិយាយថា នៅពេលគ្រឿង កំពុងចូលមកឈូកឆាយនិងកំពុងឈូកឆាយនោះ អាជ្ញាធរមានលោក អ៊ួង ម៉ាលី អធិការនគរបាល ស្រុកសណ្ដាន់ បានចុះមក ហើយបានត្រឹមតែឲ្យប្រជាពលរដ្ឋដាក់សំណើរស្នើសុំ ដើម្បីឲ្យគេជួយ ដោះស្រាយ ហើយហាមប្រជាពលរដ្ឋមិនឲ្យឃាត់គ្រឿងចក្រគេនោះទេ ប្រយ័ត្នខុសច្បាប់ ព្រោះគេ មានច្បាប់។
លោឡង គីសឹង អភិបាលស្រុកសណ្ដាន់ បានប្រាប់ឲ្យដឹងថា គឺមានអីចឹងមែន ប៉ុន្តែមិន មែនប្រជាពលរដ្ឋ នៅក្នុងស្រុកសណ្ដាន់នោះទេ បើយោងតាមពួកគាត់ ទៅតវ៉ា នៅសាលាខេត្ត។
លោក ឡង គីសឹង បានបញ្ជាក់ថា ប្រជាពលរដ្ឋទាំងនោះ នៅខេត្តកំពង់ចាម ប៉ុន្តែទោះជាយ៉ាង ណាក្ដី គាត់ក៏មិនច្បាស់ភូមិសាស្ត្រដែរ ព្រោះគាត់ទើបតែមកកាន់ស្រុកនេះថ្មី ហើយម្យ៉ាងដីនោះ នៅមុំនៃ៣ស្រុកគឺស្រុកសណ្ដាន់ ស្រុកប្រាសាទសំបូរ និងស្រុកសន្ទុក ហេតុនេះ សូមសួរ ទៅលោក អភិបាលស្រុក ប្រាសាទសំបូរ ព្រោះគាត់ដឹងប្រវត្តិដីហ្នឹងច្បាស់។
ចំណែក លោក ខៀវ ប៉ាង អភិបាលស្រុកប្រាសាទសំបូរ និងតំណាងក្រុមហ៊ុន ស៊ីអ ស៊ីខេ មិនបានបំភ្លឺដូចម្ដេចនោះទេនៅពេលនេះ ព្រោះអ្នកយកព័ត៌មានយើងព្យាយាមទាក់សុំបំភ្លឺមិនបាន៕
![]()
![]()
![]()