ជិះម៉ូតូត្រឡប់មកពីបាចជីក្នុងស្រែរអិលធ្លាក់ប្រឡាប់ស្លាប់!

បន្ទាយមានជ័យ៖ យោងតាមរបាយការណ៍របស់មូលដ្ឋានកងរាជអាវុធហត្ថស្រុកភ្នំស្រុកបានឲ្យដឹងថា មានករណីបុរសម្នាក់ជិៈម៉ូតូមកពីបាចជីស្រែ ក៏រអិលធ្លាក់ប្រឡាយបណ្ដាលឲ្យលង់ស្លាប់។

លោកវរសេនីយ៍ត្រី ស៊ិន ដៀប មេបញ្ជាការមូលដ្ឋានកងរាជអាវុធហត្ថស្រុកបានប្រាប់ថា ករណីនេះកើតឡើងនៅវេលាម៉ោង១៧និង៣០នាទីថ្ងៃទី១៧ ខែតុលា ឆ្នាំ២០១៧ នៅចំណុចស្ពានរលុះ ស្ថិតក្នុងភូមិស្ពានក្មេង ឃុំភ្នំដី ស្រុកភ្នំស្រុក ខេត្តបន្ទាយមានជ័យ ជនរងគ្រោះឈ្មោះ ឡាយ.ម៉ាប់ ភេទប្រុស អាយុ៤៨ឆ្នាំ រស់នៅភូមិកណ្តាលខាងលិច ឃុំស្រះជីក ស្រុកភ្នំស្រុក ខេត្តបន្ទាយមានជ័យ។ លោកវរសេនីយ៍ត្រី ស៊ិន ដៀប បានប្រាប់ឲ្យដឹងទៀតថា បើតាមប្រជាពលរដ្ឋដែលនៅកន្លែងកើតហេតុបានរៀបរាប់ឲ្យដឹងថា ពេលជនរងគ្រោះមកពីបាចជីដាក់ស្រែ ជនរងគ្រោះបានចុះលាងម៉ូតូនៅក្បែចំណុចកើតហេតុនោះ ពេលលាងម៉ូតូរួច ជនរងគ្រោះបានជិៈម៉ូតូមកដល់ចំណុចស្ពានបង្ហៀរទឹកក៏វ៉េចង្កូតធ្លាក់ចូលទៅក្នុងទឹកប្រឡាយដែលកំពុងតែហូរខ្លាំង ភ្លាមៗនោះប្រជាពលរដ្ឋដែលនៅក្បែនោះបាននាំគ្នាយកដើមឫស្សីបោះឲ្យជនរងគ្រោះតោង តែជនរងគ្រោះមិនបានតោងនោះទេហើយជនរងគ្រោះក៏លិចបាត់ទៅ ក្រោយមកទៀតប្រជាពលរដ្ឋ និងក្រុមគ្រួសារ បាននាំគ្នាមុជទឹករាវរកក៏ពុំឃើញដែរ ដោយឡែកម៉ូតូត្រូវបានរកឃើញ។ លោកវរសេនីយ៍ត្រី ស៊ិន ដៀប បានប្រាប់ឲ្យដឹងទៀតថា រហូតដល់ថ្ងៃទី១៨ នេះ សពជនរងគ្រោះពុំទាន់រកឃើញនៅឡើយទេ។ បច្ចុប្បន្ន ត្រូវបានក្រុមគ្រួសារកំពុងតែស្វែងរកបន្ត៕