កងពលតូចថ្មើរជើងលេខ៥១ ប្រតិកម្មនឹងសម្តី សម រង្ស៊ី ដែលអំពាវនាវឲ្យកងកម្លាំងប្រដាប់អាវុធបែរកាណុងផ្តួលរំលំរាជរដ្ឋាភិបាល, ជាអំពើក្បត់ជាតិសុទ្ធសាធ និងធ្ងន់ធ្ងរបំផុត!
(បន្ទាយមានជ័យ)មេបញ្ជាការ និងកងទ័ពទាំងអស់នៃអង្គភាពកងពលតូចថ្មើរជើងលេខ៥១ ប្រតិកម្មនឹងសម្តី សម រង្ស៊ី ដែលអំពាវនាវឲ្យកងកម្លាំងប្រដាប់អាវុធបែរកាណុងផ្តួលរំលំរាជរដ្ឋាភិបាល, ជាអំពើក្បត់ជាតិសុទ្ធសាធ និងធ្ងន់ធ្ងរបំផុត។
ក្រោយពីវីដេអូមួយដែលទទួលបានពីមន្រ្តីរដ្ឋាភិបាល ជាភស្តុតាងថ្មីមួយទៀត ចំពោះលោក សម រង្ស៊ី ដែលប្រកាសអំពាវនាវឲ្យកងកម្លាំងប្រដាប់អាវុធ បែរកាណុងផ្តួលរំលំរាជរដ្ឋាភិបាលស្របច្បាប់ ដែលដឹកនាំដោយ សម្តេចតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា, នៅព្រឹកថ្ងៃទី១៩ ខែតុលា ឆ្នាំ២០១៧ នេះលោកឧត្តមសេនីយ៍ត្រី សេង ធារិន មេបញ្ជាការរងនាយសេនាធិការ កងពលតូចថ្មើរជើងលេខ៥១ បានប្រកាស ថា សម្តីរបស់លោក សម រង្ស៊ី ខាងលើនេះ គឺជាអំពើក្បត់ជាតិសុទ្ធសាធ និងធ្ងន់ធ្ងរបំផុត។
ជំនួសមុខឲ្យកងទ័ពនៃអង្គភាព កងពលតូចថ្មើរជើងលេខ៥១ «យើងខ្ញុំទាំងអស់គ្នាជាកងទ័ពនៃអង្គភាព កងពលតូចថ្មើរជើងលេខ៥១ ទាំងអស់ សូមធ្វើការប្រកាសប្រឆាំងដាច់ខាតរាល់សកម្មភាពញុះញង់របស់ពួកអគតិ ដែលប៉ុនប៉ងផ្តួលរំលំរាជរដ្ឋាភិបាល ទោះក្នុងកាលៈទេសៈណាក៏ដោយ យើងខ្ញុំស្មោះត្រង់ដាច់ខាត ចំពោះជាតិមាតុភូមិ និងរដ្ឋាភិបាលដែលដឹកនាំដោយសម្តេចតេជោ ហ៊ុន សែន ពួកយើងស្រឡាញ់សម្តេចតេជោ ព្រោះសម្តេចជាអ្នកស្វែងរកសន្តិភាព និងអភិវឌ្ឍន៍ជូនប្រទេសជាតិ ខុសពី សម រង្សី និង កឹម សុខា ដែលចេះតែញុះញង់ធ្វើ ឲ្យខ្មែរបែកបាក់និងក្បត់ជាតិខ្លួនឯង។
យើងខ្ញុំទាំងអស់គ្នា ប្តេជ្ញារក្សាសុខសន្តិភាពជូនជាតិមាតុភូមិ និងប្រឆាំងរាល់ការប៉ុនប៉ងផ្តួលរំលំរាជរដ្ឋាភិបាលស្របច្បាប់ ដែលដឹកនាំដោយសម្ដេចតេជោ ហ៊ុន សែន។
