ទិវាគ្រូបង្រៀនពិភពលោកសមាគមន៍គ្រូបង្រៀនឯករាជ្យដាក់ញត្តិទៅក្រសួងអបរំទាមទារលក្ខខណ្ឌ១០ចំណុច!
ភ្នំពេញ៖នៅព្រឹកថ្ងៃទី៥តុលានេះក្នុងឱកាសទិវាគ្រូបង្រៀនពិភពលោកសមាគមគ្រូបង្រៀនឯករាជ្យ បានដាក់ញត្តិទៅកាន់ក្រសួងអប់រំ យុវជន និងកីឡាដើម្បីស្នើសុំលក្ខខណ្ឌ ១០ចំណុច ដោយទាមទារដំឡើងប្រាក់បៀវត្ស អប្បបរមាចំនួន ២លានរៀលក្នុង១ខែៗ។
អ្នកគ្រូ អ៊ុក ឆាណាវី ប្រធានសមាគមគ្រូបង្រៀនឯករាជ្យបានថ្លែងថាលក្ខខណ្ឌដែលក្រុមគ្រូបង្រៀនទាមទារមានដូចតទៅ៖
១. ដំឡើងប្រាក់បៀវត្ស អប្បបរមាចំនួន ២លានរៀលក្នុង១ខែៗ ជូនគ្រូបង្រៀន។
២. ត្រូវមានវិធានការទប់ស្កាត់ និងស៊ើបអង្កេតអំពើពុករលួយ នៅក្នុងស្ថាប័នអប់រំគ្រប់កម្រិត។
៣. ដំឡើងប្រាក់អត្ថប្រយោជន៍ផ្សេងៗជូនគ្រូបង្រៀន៖
ប្រាក់ឧបត្ថម្ភកូន ចំនួន ៤ម៉ឺនរៀលក្នុង១ខែ
ប្រាក់ឧបត្ថម្ភប្រពន្ធកូនចំនួន ៥ម៉ឺនរៀលក្នុង១ខែ
ប្រាក់គរុកោសល្យចំនួន ៤ម៉ឺនរៀលក្នុង១ខែ ជូនគ្រូបង្រៀន
ប្រាក់ថ្ងៃព្រហស្បតិ៍ចំនួន ២ម៉ឺនរៀលក្នុង១ខែ ជូនគ្រូបង្រៀន
ប្រាក់ទ្រទ្រង់សុខភាពចំនួន ៦ម៉ឺនរៀលក្នុង១ខែ ជូនគ្រូបង្រៀន
ប្រាក់ម៉ោងបន្ថែមចំនួន ១ម៉ឺនរៀល ក្នុង១ម៉ោងសម្រាប់គ្រូអនុវិទ្យាល័យ និងចំនួន ១៥០០០រៀល ក្នុង១ម៉ោង សម្រាប់គ្រូវិទ្យាល័យ
ប្រាក់ឧបត្ថម្ភបុណ្យជាតិនីមួយៗចំនួន ១៥ម៉ឺនរៀល ជូនគ្រូបង្រៀន (បុណ្យភ្ជុំបិណ្ឌ និងបុណ្យចូលឆ្នាំ)
៤. សាលារៀនគ្រប់កម្រិតទាំងអស់ ត្រូវផ្សព្វផ្សាយរបាយការណ៍ហិរញ្ញវត្ថុ និងគម្រោងថវិកា (PB) និង (SIG) របស់សាលា ជូនគ្រូបង្រៀន និងសហគមន៍។
៥. ត្រូវផ្តល់កុំព្យូទ័រ សម្ភារៈពិសោធន៍ សម្ភារៈឧបទ្ទេសដល់គ្រប់អនុវិទ្យាល័យ វិទ្យាល័យសាលាគរុកោសល្យ និងវិក្រឹតការ។
៦. បញ្ឈប់ការរើសអើង ជាមួយសមាគម និងផ្តល់សិទ្ធិសេរីភាពឲ្យគ្រូបង្រៀនមានសិទ្ធិបង្កើតសហជីព។
៧. ត្រូវផ្តល់អគារ និងគ្រូបង្រៀនទៅដល់តំបន់ជនបទ ដាច់ស្រយាល ឲ្យបានគ្រប់គ្រាន់ រួមទាំងផ្តល់សៀវភៅមេរៀនសម្រាប់សិស្ស និងគ្រូ មិនឲ្យខ្វះខាតបន្តទៀត។
៨. ធានាថាគ្រូបង្រៀនទាំងអស់ទទួលបានការបណ្តុះបណ្តាលមូលដ្ឋាន និងមានឱកាសទទួលបានការអភិវឌ្ឍអាជីពវិជ្ជាជីវៈរបស់ខ្លួន។
៩. ត្រូវអនុវត្តគោលនយោបាយសំខាន់ៗទាំង៤ចំណុច របស់សមាគម។
១០. រដ្ឋមន្រ្តីក្រសួងអប់រំ ត្រូវគោរព និងអនុវត្តច្បាប់ស្តីពី ការអប់រំជាពិសេស ត្រង់មាត្រា៤០ នៃច្បាប់នេះ។
សូមបញ្ជាក់ថា ក្រសួងអប់រំ បានអនុញ្ញាតឲ្យតំណាងសមាគមចំនួន ៥នាក់ ដាក់ញត្តិនៅក្រសួង៕
![]()
![]()
![]()