មន្ត្រីកាំរកុងត្រូលច្រកទ្វារអន្តរជាតិប៉ោយប៉ែតបើកដៃអោយឈ្មួញនាំអាហារខូចគុណភាពមកបំផ្លាញសុខភាពប្រជាពលរដ្ឋ!
បន្ទាយមានជ័យ៖បែកធ្លាយរឿងអាស្រូវមន្ត្រីជំនាញកាំកុងត្រូលច្រកទ្វារប៉ោយប៉ែត បើកដៃអោយឈ្មួញនាំចូលសាច់មាន់ ឆ្អឹងមាន់ និងប្រហិតខូចគុណភាពពីប្រទេសសៀម មកបំផ្លាញសុខភាព ប្រជាពលរដ្ឋ ខ្មែរយ៉ាងពេញបន្ទុក។
ប្រភពពីប្រជាពលរដ្ឋរស់នៅតាមតំបន់ព្រំដែនក្នុងក្រុងប៉ោយប៉ែត ខេត្តបន្ទាយមានជ័យ បានឲ្យដឹងថាលោក ហុង លៀង អនុប្រធានសាខាកាំកុងត្រូលខេត្តបន្ទាយមានជ័យ និងមន្ត្រីក្រោមឱវាទគឺជាអ្នកឃុបឃិតឲ្យឈ្មួញនាំចូលសាច់មាន់ ឆ្អឹងមាន់ និងប្រហិតខូចគុណភាពពីប្រទេសសៀមចូលស្រុកខ្មែរតាមច្រកទ្វារអន្តរជាតិប៉ោយប៉ែត យ៉ាងពេញបន្ទុក។ គ្រឿងឧបភោគបរិភោគដែលខូចគុណភាពនិងមានផ្ទុកសារធាតុគីមីត្រូវបានគេយកទៅលក់ចែកចាយលើទីផ្សារក្នុងខេត្តបន្ទាយមានជ័យ និងទីផ្សារនៃបណ្ដាខេត្ត
ផ្សេងទៀត។
ប្រភពខ្លះបានឲ្យដឹងថា ឈ្មួញធំៗមួយចំនួនដែលនាំចូលប្រភេទទំនិញដូចខាងលើ គឺមានការឃុបឃិតពីសំណាក់លោក ហុង លៀង និងបក្ខពួកទើបអាចឆ្លងផុតពីច្រកទ្វារព្រំដែនចូលមកដល់ទីផ្សារ។
ចំណែកកម្មករអូសរទេះដែលលួចបង្កប់សាច់មាន់ ស្លាបមាន់ ជង្គង់មាន់ និងប្រហិតជាដើមដែលមិនបានបង់ប្រាក់អោយលោកហុងលាងទេ ច្បាស់ជាសមត្ថកិច្ចជំនាញធ្វើការបង្ក្រាបនិងហៅទូរទស្សន៍កាសែតក្នុងស្រុកមកផ្សព្វផ្សាយយកស្នាដៃ បង្អួតមេ។
ទោះជាយ៉ាងជុំវិញការចោទប្រកាន់ខាងលើគួរតែលោក ម៉ក់ ពេជ្ជរិទ្ធ អគ្គនាយកនៃអគ្គនាយកដ្ឋានកាំកុងត្រូល គួរពិនិត្យឡើងវិញជាបន្ទាន់ចំពោះទង្វើមិនប្រក្រតីនិងអំពើពុករលួយរបស់លោក ហុង លៀង អនុប្រធានសាខាកាំកុងត្រូលខេត្តបន្ទាយមានជ័យ ដែលធ្វើអ្វីៗតាមអំពើចិត្តបែបនេះ៕
