ឃាត់ខ្លួនជនជាតិជាតិថៃម្នាក់ពាក់ព័ន្ធនឹងលួចលុយ ក្រុមហ៊ុនកាស៊ីណូ ផារ៉ាម៉ិច (សែសិបប្រាំពីរម៉ឺន ប្រាំពាន់បាត)
បន្ទាយមានជ័យ៖សមត្ថកិច្ចកងរាជអាវុធហត្ថខេត្តបន្ទាយមានជ័យឃាត់ខ្លួនជនសង្ស័យជនជាតិថៃម្នាក់ជាបុគ្គលិកផ្នែកគ្រប់គ្រងទិន្នន័យហិរញ្ញវត្ថុក្នុងក្រុមហ៊ុនកាស៊ីណូ ផារ៉ាម៉ិចបញ្ជូនទៅតុលាការ ។ខណៈដែលរូបគេលួចប្រាក់ក្រុមហ៊ុនដែលមានទឹកប្រាក់សរុបចំនួន ៤៧៥.០០០បាត(សែសិបប្រាំពីរម៉ឺន ប្រាំពាន់បាត)ផ្ញើរចូលទៅក្នុងគណនីធនាគាររបស់មិត្តភ័ក្តដែលរស់នៅក្នុងប្រទេសថៃ ចំនួន ០៣នាក់ ។
សមត្ថកិច្ចបង្ហើបឲ្យដឹងថាដោយយោងពាក្យបណ្តឹងរបស់ឈ្មោះ គីទីផុន ប៊ូណយ ភេទ ប្រុស អាយុ ៣៥ឆ្នាំ (ជនជាតិថៃ)បច្ចុប្បន្នស្នាក់នៅបណ្តោះអាសន្នក្នុងក្រុងប៉ោយប៉ែត មុខរបរ ប្រធានក្រុមហ៊ុន កាស៊ីណូ ផារ៉ាម៉ិច ស្ថិតនៅភូមិក្បាលស្ពាន ១ សង្កាត់ប៉ោយប៉ែត ក្រុងប៉ោយប៉ែត កាលពីថ្ងៃទី១៧ ខែ ធ្នូ ឆ្នាំ ២០១៧ ស្តីពីការបាត់បង់ប្រាក់ចំណូលរបស់ក្រុមហ៊ុន ។
ភ្លាមៗនោះ មន្ត្រីជំនាញរបស់កងរាជអាវុធហត្ថខេត្ត សហការជាមួយកងកម្លាំងកងរាជអាវុធហត្ថក្រុងប៉ោយប៉ែត ដែលដឹកនាំដោយលោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារយុត្តិធម៌បានចុះធ្វើការស្រាវជ្រាវដល់កន្លែងកើតហេតុ ។
លុះដល់ថ្ងៃទី១៨ ខែ ធ្នូ ឆ្នាំ ២០១៧ មន្ត្រីជំនាញកងរាជអាវុធហត្ថបានស្រាវជ្រាវរកឃើញមុខសញ្ញាជនសង្ស័យ ហើយបានធ្វើសំណើទៅលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត ។ នៅវេលាម៉ោង ១៦ និង ៣៦នាទី ថ្ងៃខែឆ្នាំដដែល កងកម្លាំងអាវុធហត្ថបានចុះធ្វើការឃាត់ខ្លួនបានជនសង្ស័យ០១នាក់ដើម្បីយកមកធ្វើការសាកសួរនិងស៊ើបអង្កេតលើអង្គហេតុ ។
លោកវរសេនីយ៍ឯក ម៉ែន ភិរម្យបានបញ្ជាក់ឲ្យដឹងថា ជនសង្ស័យមានឈ្មោះ ធីរ៉ាផាត់ ទីឆាគុណ ភេទ ប្រុស អាយុ ២៦ឆ្នាំ មានស្រុកកំណើត នៅខេត្តឈៀងម៉ៃ ប្រទេសថៃ បច្ចុប្បន្នស្នាក់នៅខេត្តបវ័ញ្ច ប្រទេសថៃ ជាបុគ្គលិកផ្នែកគ្រប់គ្រងទិន្នន័យហិរញ្ញវត្ថុក្នុងក្រុមហ៊ុនកាស៊ីណូ ផារ៉ាម៉ិច ។
តាមចម្លើយសារភាពរបស់ជនសង្ស័យថាខ្លួនពិតជាបានលួចផ្ទេរប្រាក់របស់ក្រុមហ៊ុនជាច្រើនលើមកហើយ ចាប់តាំងពីដើមខែធ្នូឆ្នាំ២០១៧រហូតមកដល់ថ្ងៃទី១៧ ខែ ធ្នូ ឆ្នាំ ២០១៧ ។ ក្នុងការផ្ទេរមួយលើកៗ យ៉ាងច្រើនបំផុត ៥០.០០០បាត (ប្រាំម៉ឺនបាត) ដែលមានទឹកប្រាក់សរុបចំនួន ៤៧៥.០០០បាត (សែសិបប្រាំពីរម៉ឺន ប្រាំពាន់បាត) ហើយទឹកប្រាក់ទាំងនេះគឺខ្លួនបានលួចផ្ទេរផ្ញើរចូលក្នុងគណនីធនាគាររបស់មិត្តភ័ក្តដែលរស់នៅក្នុងប្រទេសថៃ ចំនួន ០៣នាក់ ។
ទឹកប្រាក់ទាំងអស់គឺខ្លួនមិនទាន់បានប្រើប្រាស់នៅឡើយទេ ។ក្រោយពីបានស្តាប់ការបំភ្លឺរបស់ជនរងគ្រោះ និងស្តាប់ចម្លើយសារភាពរបស់ជនសង្ស័យឃើញមានភាពស៊ីសង្វាក់គ្នាយ៉ាងជាក់លាក់ចំពោះករណីខាងលើ មន្ត្រីជំនាញកងរាជអាវុធហត្ថខេត្តបានកសាងសំណុំរឿងបញ្ជូនជនសង្ស័យទៅតុលាការដើម្បីធ្វើចំណាត់ការទៅតាមនីតិវិធី ។
![]()
![]()
![]()