សម្ដេចសខេងចេញបទបញ្ជា១២ចំណុចឲ្យមន្ត្រីក្រោមឱវាទក្រសួងមហាផ្ទៃ ត្រូវធ្វើជាគំរូក្នុងការគោរព ប្រតិបត្តិច្បាប់ចរាចរណ៍ផ្លូវគោក!
ភ្នំពេញ: សម្តេចក្រឡាហោមសខេងឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃកាលពីថ្ងៃទី០៨ធ្នូឆ្នាំ២០១៧នេះបានចេញបទបញ្ជា១២ចំណុចដើម្បីឱ្យមន្រ្តីក្រោមឱវាទក្រសួងមហាផ្ទៃទាំងអស់ធ្វើជាគំរូក្នុងការគោរពប្រតិបត្តិច្បាប់ស្តីពីចរាចរណ៍ផ្លូវគោក។
ការដាក់ចេញបទបញ្ជានេះគឺដើម្បីចូលរួមចំណែកក្នុងការទប់ស្កាត់ និងកាត់បន្ថយការបាត់បង់ជីវិត រងរបួស និងខូចខាតទ្រព្យសម្បត្តិ ដោយគ្រោះថ្នាក់ចរាច រណ៍ផ្លូវគោក ដែលជាបញ្ហាប្រឈមមុខ និងយូរអង្វែង ដែលមាន១២ចំណុចដូចខាងក្រោម៖
ទី១-ត្រូវពាក់មួកសុវត្ថិភាពជានិច្ច ទាំងអ្នកបើកបរ និងអ្នករួមដំណើរ ក្នុងពេលធ្វើដំណើរតាមទោចក្រយានយន្ត។
ទី២-ត្រូវពាក់ខ្សែក្រវ៉ាត់សុវត្ថិភាពជានិច្ច ក្នុងពេលធ្វើដំណើរតាមរថយន្ត។
ទី៣- ត្រូវត្រួតពិនិត្យលក្ខណៈបច្ចេកទេសយានយន្តជានិច្ច ពិសេសត្រួតពិនិត្យកង់ ចង្កូត ហ្វ្រាំង ភ្លើងបំភ្លឺ។ល។
ទី៤- ត្រូវមានបណ្ណសម្គាល់និងស្លាកលេខបំពាក់យានយន្ត មានបណ្ណបើកបរក្នុងការបើកបររថយន្ត និងមានវិញ្ញាបនបត្រពិនិត្យលក្ខណៈបច្ចេកទេសយានយន្ត។
ទី៥-ត្រូវគោរពសិទ្ធិអាទិភាព គោរពភ្លើងសញ្ញា ឬសញ្ញាចរាចរណ៍ និងប្រកាន់ស្តាំជានិច្ច។
ទី៦-មិនត្រូវផ្ទុកអ្នកដំណើរ ឬទំនិញលើសច្បាប់កំណត់។
ទី៧- មិនត្រូវបើកបរលើសល្បឿនកំណត់ជាដាច់ខាត។
ទី៨- មិនត្រូវបើកបរក្រោមឥទ្ធិពល នៃគ្រឿងស្រវឹងជាដាច់ខាត។
ទី៩- មិនត្រូវបត់ ឬវ៉ាជែងក្នុងភាពប្រថុយប្រថាន ឬប្រើទូរស័ព្ទដោយគ្មានឧបករណ៍សម្លេងភ្ជាប់ទំនាក់ទំនង។
ទី១០- មិនត្រូវបើកបរក្នុងស្ថានភាពងងុយដេកជាដាច់ខាត។
ទី១១-ត្រូវបើកបរក្នុងស្មារតី ប្រុងប្រយ័ត្នជានិច្ច ប្រកបដោយសីលធម៌យោគយល់អធ្យាស្រ័យ។
និងទី១២-ត្រូវធ្វើការផ្សព្វផ្សាយអប់រំបន្តដល់សមាជិកគ្រួសារ និងមិត្តភក្តិឲ្យចូលរួមប្រតិបត្តិខ្ជាប់ខ្ជួននូវច្បាប់ស្តីពីចរាចរណ៍ផ្លូវគោក ឬប្រការដែលបានចែងខាងលើ។
ក្នុងការជំរុញអនុវត្តបទបញ្ជាផ្ទៃក្នុងនេះ ទន្ទឹមនឹងការអប់រំផ្សព្វផ្សាយដល់មន្ត្រី ស្នើថ្នាក់ដឹកនាំគ្រប់អង្គភាពក្រោមឱវាទក្រសួងមហាផ្ទៃ ចាត់ធ្វើការត្រួតពិនិត្យជាប្រចាំថ្ងៃនៅគ្រប់គោលដៅច្រកចេញចូលក្រសួង ឬអង្គភាពក្រោមឱវាទ អំពីសកម្មភាពប្រតិបត្តិច្បាប់ស្តីពីចរាចរណ៍ផ្លូវគោករបស់មន្ត្រីគ្រប់រូប នូវការពាក់មួកសុវត្ថិភាពក្នុងពេលធ្វើដំណើរតាមទោចក្រយានយន្ត ការពាក់ខ្សែក្រវ៉ាត់សុវត្ថិភាពចំពោះអ្នកអង្គុយកៅអីខាងមុខនៃរថយន្ត និងការបំពាក់ស្លាកលេខយានយន្ត ដើម្បីមានវិធានការអប់រំណែនាំជាក់ស្តែង និងជូនដំណឹងជាបន្ទាន់ទៅសាម៉ីអង្គភាពក្នុងករណីល្មើសមិនរាងចាល ដើម្បីចាត់វិធានការរដ្ឋបាល ៕
