នារីក្រមុំកូនមន្រ្តីរដ្ឋសភាម្នាក់ ត្រូវជនចោរចូលទៅរឹតកសម្លាប់ ដល់ក្នុងបន្ទប់ដេក ប្លន់យកគ្រឿងអលង្ការ និងទូរស័ព្ទ នៅខណ្ឌច្បារអំពៅ!
ភ្នំពេញ៖
នារីក្រមុំម្នាក់ដែលជាកូនរបស់មន្រ្តីរដ្ឋសភា ត្រូវជនល្មើសមិនស្គាល់អត្តសញ្ញាណ ចូលទៅរឹតកសម្លាប់ដល់ក្នុងបន្ទប់ដេក ប្លន់យកទ្រព្យសម្បត្តិជាគ្រឿងអលង្ការ និងទូរស័ព្ទដៃ បង្កឲ្យមានការភ្ញាក់ផ្អើលទាំងព្រឹកខណៈឪពុកម្តាយរបស់នាង បានចេញទៅធ្វើការអស់។
ហេតុការណ៍នេះ បានកើតឡើងនៅវេលាម៉ោងជាង១១ ថ្ងៃទី១០ ខែកុម្ភៈ ឆ្នាំ២០១៧ចំណុចផ្ទះលេខ៤៤៣ តាមផ្លូវបេតុង ស្ថិតនៅភូមិព្រែកជាងព្រហ្ម សង្កាត់វាលស្បូវ ខណ្ឌច្បារអំពៅ រាជធានីភ្នំពេញ។
សពនារីរងគ្រោះឈ្មោះ ពៅ សុភ័ក្រ្ត អាយុ២២ឆ្នាំ មុខរបរនៅផ្ទះ ត្រូវបានជនដៃដល់យកខ្សែភ្លើង រឹតកបណ្ដាលសម្លាប់ក្នុងបន្ទប់ដេក។
តាមសេចក្តីរាយការណ៍ពីជិតខាង បានឲ្យដឹងថា អំពើឃាតកម្មនេះ បានដឹងដោយសារតែក្មេងស្រីតូចម្នាក់ ដែលជាប្អូនស្រីរបស់នារីរងគ្រោះ បានស្រែកយំយ៉ាងខ្លាំង។ នៅពេលកើតហេតុនេះ ខណៈឪពុកម្តាយរបស់នាង បានចេញទៅធ្វើការបាត់។
នៅពេលមានករណីនេះកើតឡើងទាំងអាជ្ញាធរ និងសមត្ថកិច្ចជំនាញបានចុះទៅសួរនាំ ដើម្បីស្រាវជ្រាវតាមចាប់ខ្លួនជនដៃដល់។ ជុំវិញបញ្ហានេះ មជ្ឈដ្ឋាន ជុំវិញ បាន លើកឡើងថា បច្ចុប្បន្ន នេះ នៅទីក្រុងភ្នំពេញ ពិតជាគួរ ឲ្យខ្លាច មែនទែនព្រោះតែសកម្មភាព ចោរប្លន់ កាន់តែសាហាវ ហើយសូម្បីតែផ្ទះតំណាងរាស្ត្រក៏លោកចោរ មិនញញើតក្នុងការប្លន់ដែរ៕