ប្រធានការិល័យគយ និងរដ្ឋាករច្រកព្រំដែន ព្រំ ខេត្តប៉ៃលិន លោក រ៉ិត គង់ ទទួលមរណភាពក្នុងហេតុការណ៍គ្រោះថ្នាក់ចរាចរណ៍!
(ប៉ៃលិន)៖
ប្រធានការិល័យគយ និងរដ្ឋាករច្រកព្រំដែន ព្រំ ខេត្តប៉ៃលិន ចេញពីធ្វើការនៅពេលយប់ ត្រឡប់ទៅផ្ទះនៅខេត្តបាត់ដំបងជួបគ្រោះថ្នាក់ចរាចរណ៍ដោយរថយន្តរបស់លោក បុកជាមួយរថយន្តដឹកម៉ៃឃូ ស្លាប់យ៉ាងអាណោចអាធ័ម។
ហេតុការណ៍នេះបានកើតឡើងនៅវេលាម៉ោង១១៖២៥នាទី យប់ថ្ងៃទី១២ ខែកុម្ភៈ ឆ្នាំ២០១៧ នៅចំណុចភូមិរថក្រោះឆេះ នៃខេត្តប៉ៃលិន។
ជនរងគ្រោះឈ្មោះ រ៉ិត គង់ ប្រធានការិយាល័យគយ និងរដ្ឋាករច្រកព្រំដែន ព្រំ នៃសាខាគយ និងរដ្ឋាករខេត្តប៉ៃលិន។សមត្ថកិច្ចនគរបាលខេត្តប៉ៃលិន បានបញ្ជាក់ប្រាប់ នៅព្រឹកថ្ងៃទី១៣ ខែកុម្ភៈ ឆ្នាំ២០១៧នេះថា មុនពេលកើតហេតុ នៅយប់ថ្ងៃទី១២ ខែកុម្ភៈ លោក រ៉ិត គង់ ប្រធានការិយាល័យគយ និងរដ្ឋាករ ច្រកព្រំដែនព្រំ បានធ្វើដំណើរចេញពីកន្លែងធ្វើការ ត្រឡប់ទៅផ្ទះ នៅខេត្តបាត់ដំបង លុះដល់កន្លែងកើតហេតុក៏ជួបគ្រោះថ្នាក់ចរាចរណ៍ រថយន្តរបស់លោក រ៉ិត គង់ ក៏បុកជាមួយរថយន្តធុនធំ ដឹកម៉ៃឃូ បណ្តាលឲ្យស្លាប់ នៅកន្លែងកើតហេតុតែម្តង៕
