គ្រុំខៀវក្នុងដែនសមុទ្រខ្មែរ កំពុងពេញនិយមនៅលើទីផ្សារក្នុងប្រទេសថៃ!
រយៈពេលប៉ុន្មានខែនេះ គ្រុំខៀវដែលជនជាតិថៃអោយឈ្មោះថា«ហយម៉្លែភូ»
កំពុងពេញនិយមជាទីបំផុត នៅលើទីផ្សារតាមបណ្តាខេត្តមួយចំនួននៅក្នុងប្រទេសថៃ ដោយសារតែគ្រុំប្រភេទនេះមានតែមួយរដូវដែលមានរយៈពេល៤ខែតែប៉ុណ្ណោះ ក្នុង១ឆ្នាំម៉្យាងវិញទៀតគ្រុំខៀវដែលនាំចេញពីកម្ពុជា ទៅលើទីផ្សារក្នុងប្រទេសថៃ មានខ្នាតធំជាងគ្រុំដែលនៅក្នុងដែនសមុទ្រថៃ ។
អុំស្រី សិរី អាំផន អាយុ៧២ឆ្នាំ រស់នៅក្នុងខេត្តត្រាត ប្រទេសថៃ បានរៀបរាប់ថា អុំស្រីបានប្រកបមុខរបរជាអ្នកទិញលក់ នូវគ្រុំខៀវនេះ ពីដែនសមុទ្រខ្មែរ មកកាន់ទីផ្សារ
ប្រទេសថៃ អស់រយៈពេលជាច្រើនឆ្នាំណាស់មកហើយ រហូតមានការទុកចិត្តគ្នាជាមួយនឹងជនជាតិខ្មែរ ដែលជាអ្នកចិញ្ចឹមគ្រុំខៀវនៅក្នុងខេត្តកោះកុង ថែមទៀតផង ។
អុំស្រីបានបន្តថា ចាប់ពីដើមខែធ្នូ រហូតដល់ចុងខែមីនា គឺជារដូវនៃការប្រមូលពពួក« ហយម៉្លែងភូ » គ្រុំខៀវ ដើម្បីចែកចាយទៅតាមទីផ្សារហើយ ដោយគ្រុំនេះនៅក្នុងដែនសមុទ្រថៃក៏មានអ្នកចិញ្ចឹមដូចដែនសមុទ្រខ្មែរដែរ ប៉ុន្តែមូលហេតុដែលតម្រូវអោយគាត់ឈានជើងទៅទទួលយកពីខាងខ្មែរយកមកលក់ និងចែកចាយតាមទីផ្សារក្នុង ប្រទេសថៃ ដោយសារតែរបស់ខ្មែរមានខ្នាតធំជាងគ្រុំថៃ ដែលធ្វើអោយអ្នកបរិភោគចូលចិត្តព្រោះវាមានឱជារសឆ្ងាញ់ពិសារ ។
ស្ត្រីវ័យចំណាស់រូបនេះ បានលើកឡើងអំពីមូលហេតុដែលគ្រុំខៀវមានខ្នាតខុសគ្នាគឺ គ្រុំខៀវរបស់ខ្មែរដែលគេចិញ្ចឹមដោយប្រើប្រាស់បង្គោលរាប់រយដើមបោះនៅក្នុងផ្ទៃទឹកសមុទ្រដើម្បីអោយគ្រុំប្រភេទនេះតោងរហូតដល់ធំ គឺមានរយៈពេល១ឆ្នាំពេញទើបប្រមូលយកមកលក់ ។
ដោយឡែកគ្រុំខៀវនៅដែនសមុទ្រថៃចិញ្ចឹមបានតែពី៦ទៅ៧ខែតែប៉ុណ្ណោះ ត្រូវបង្ខំចិត្តចាប់លក់ ព្រោះបើមិនដូច្នេះទេ គ្រុំនេះនឹងត្រូវវិនាស ទៅវិញដោយសារតែជួបនឹងការផ្លាស់ប្តូរ និងការប្រែប្រួលយ៉ាងឆាប់រហ័សនៃអាកាសធាតុ។
នៅរៀងរាល់ឆ្នាំ គឺអុំស្រី ជាអ្នកទំនាក់ទំនងលើកយកគ្រុំខៀវពីជនជាតិខ្មែរដែលរស់នៅក្នុងខេត្តកោះកុង ក្នុងតំលៃ១គីឡូក្រាម ៨បាត ដោយគាត់បានប្រើប្រាស់កម្មករខ្មែរ ប្រមាណជាង២០នាក់ សម្រាប់ច្រកគ្រុំចូលការ៉ុង និងលើកដាក់ទៅអោយអាជីវករដទៃទៀត ដែលមកទិញគ្រុំពីគាត់ គឺគាត់លក់ចេញវិញក្នុងតម្លៃ១គីឡូក្រាម ១០ បាតហើយគ្រុំខៀវដែលច្រកហើយ ក្នុង១ការ៉ុង ៣៦គីឡូក្រាម ។
ក្នុងមួយថ្ងៃៗ ម៉ូយធំៗរបស់គាត់មាន៣នាក់ ដែលបានមកលើកយកជាប្រចាំ ដោយម្នាក់ៗ ទិញពីគាត់ចំនួន ៤ ០០០ គីឡូក្រាម ក្នុង១ថ្ងៃ ដូច្នេះគាត់ត្រូវទទួលយកមកពីភាគីកម្ពុជាក្នុង១ថ្ងៃចំនួន១២ ០០០ គីឡូក្រាម ស្មើនឹង១២ តោន ក្នុង១ថ្ងៃសម្រាប់ចែកចាយទៅតាមបណ្តាខេត្តមួយចំនួនដូចជាខេត្ត ឈុនបុរី សមុទ្រប្រាកាន បាងកក ត្រាត រៈយ៉ង ឆាក់ឈើងសៅ ស្រះកែវ ។ល។ លោក ឆាវ សម្បត្តិ អាយុ៤០ឆ្នាំ រស់នៅខេត្ត ឆាក់ឈើងសៅ ប្រទេសថៃ បាននិយាយថារូបលោកផ្ទាល់ ក៏ដូចជាប្រជាពលរដ្ឋថៃដទៃទៀតដែរ គឺចូលចិត្តបរិភោគ ហយម៉្លែងភូ ជាទីបំផុត ព្រោះវាមានរសជាតិឆ្ងាញ់ ម៉្យាងទៀតគឺយើងអាចទទួលទានវាបានតែ៤ខែប៉ុណ្ណោះក្នុង១ឆ្នាំ ដោយតម្លៃនៅតាមទីផ្សារ ក្នុងខេត្តឆាក់ឈើងសៅ គឺ ចាប់ពី ២០ បាត ទៅ៣០ បាត ក្នុង១គីឡូក្រាម ទៅតាមខ្នាតតូច ធំ ប៉ុន្តែសម្រាប់រូបលោក គឺចូលចិត្តគ្រុំខៀវណាដែលមានខ្នាតធំទើបឆ្ងាញ់ ដោយបច្ចុប្បន្នគ្រុំខៀវ នៅតែពេញនិយមតាមបណ្តាទីផ្សារ នានាក្នុងប្រទេសថៃ ៕
