នគរបាលស្រុកសំរោង ចោទតុលាការដោះលែងជនសង្ស័យគ្រឿងញៀន
ខេត្តតាកែវ៖ សមត្ថកិច្ចនគរបាលស្រុកសំរោង កាលពីពេលថ្មីៗនេះបានត្អូញត្អែរថា សាលាដំបូងខេត្តតាកែវ បានធ្វើការដោះលែងជនសង្ស័យគ្រឿងញៀន៥នាក់ ដែលគេបានបញ្ជូនទៅឲ្យចាត់ការតាមនីតិវិធី ដែលនេះបានប្រមាថយ៉ាងធ្ងន់ធ្ងរដល់ការពលិកម្មក្នុងការបង្ក្រាប និងជាមើលងាយដល់ផែនការយុទ្ធសាស្ត្រប្រយុទ្ធប្រឆាំងគ្រឿងញៀន របស់ប្រមុខរាជរដ្ឋាភិបាលផងដែរ។
តាមសេចក្ដីរាយការពីក្រុមសមត្ថកិច្ចថា កាលពីថ្ងៃទី៥ ខែកុម្ភៈ កំលាំងនគរបាលស្រុកសំរោង បានចេញបង្ក្រាមេខ្លោងជួញដូរគ្រឿងញៀនដ៏សកម្មបានចំនួន៥នាក់ រួមទាំងវត្ថុតាងគ្រឿងញៀនជាច្រើនកញ្ចប់ និងម៉ូតូជាច្រើនគ្រឿង។ ក្រោយពេលធ្វើការបង្ក្រាបយ៉ាងក្ដៅគគុគកំលាំងសមត្ថកិច្ចបានកសាងសំណុំរឿងបញ្ជូនជនសង្ស័យ ទៅកាន់សាលាដំបូងខេត្តតាកែវ ដើម្បីការតាមនិតិវិធី។ តែមិនបានប៉ុន្មានថ្ងៃផង គេបែរជាឃើញជនសង្ស័យដើរ ក្នុងភូមិយ៉ាងរំភើយ, ដោយពួកគេថា បានបង់លុយឲ្យតុលាការរួចហើយ។
ជនសង្ស័យទាំងនោះ រួមមានឈ្មោះ ១/មួន ភារ៉ា ភេទប្រុស អាយុ២៨ឆ្នាំ រស់នៅភូមិទឹកអំបិល ឃុំរវៀង ស្រុកសំរោង ២/ធូ បូរិន្ធ ហៅលុគ ភេទប្រុស អាយុ២៧ឆ្នាំ រស់នៅភូមិថ្មី ឃុំរវៀង ស្រុកសំរោង ៣/អួន សុភាព ភេទប្រុស អាយុ២៩ឆ្នាំ រស់នៅភូមិចារ ឃុំរវៀង ស្រុកសំរោង ៤/យន់ សុធីម ភេទប្រុស អាយុ២៤ឆ្នាំ រស់នៅភូមិឃុំជាមួយគ្នា និងទី៥/ជា ឃីម ភេទប្រុស អាយុ៤២ឆ្នាំ រស់នៅបឹងក្រាញ់ខាងជើង ស្រុកសំរោង ខេត្តតាកែវ។ អំឡុងការចាប់នោះ សមត្ថកិច្ចដកហូតបានវត្ថុតាងរួមមានថ្នាំញៀនប្រភេទម្ស៉ៅក្រាមពណ៌សថ្លា ១កញ្ជប់ធំ និង១៤កញ្ជប់ តូចអាវុធឆ្នៃ១ដើម មានគ្រាប់២០គ្រាប់ ម៉ូតូចំនួន២គ្រឿង និងសម្ភារៈប្រើប្រាស់គ្រឿងញៀនមួយចំនួនទៀត។
លោកស្រី អ៊ិន ម៉ានិត ប្រធានសាលាដំបូងខេត្តតាកែវ មិនអាចសុំការបំភ្លឺជុំវិញបញ្ហានេះបានទេ កាលពីព្រឹកមិញ ដោយសារទូរស័ព្ទរបស់លោកស្រីបិទការហៅចូល។
ទាក់ទងករណីនេះលោក ស ដារ៉ា នាយប៉ុស្ដិ៍រដ្ឋបាលឃុំរវៀង បានឲ្យដឹងថា សាលាដំបូងខេត្តតាកែវ ពិតជាបានធ្វើការដោះលែងជនជួញដូរគ្រឿងញៀនទាំង៥នាក់ខាងលើមែន ព្រោះជនសង្ស័យខាងលើជាអ្នករស់នៅក្នុងមូលដ្ឋានរបស់លោក។ ចំណែកលោក មឿង សារុន អធិការស្រុកសំរោង ក៍បានបន្ថែមដែរថា កម្លាំងរបស់លោក បានខិតខំប្រឹងប្រែងបង្ក្រាបមុខសញ្ញាជនជួញដូរគ្រឿងញៀនយ៉ាងសកម្ម ក្នុងមូលដ្ឋានពិតមែន ត្រូវបានខាងតុលាការដោះលែង។
លោកថា ករណីនេះសម្រាប់លោកមិនមានអ្វីនិយាយទេ ព្រោះជាសេចក្ដីសម្រេចរបស់តុលាការ, គឺវាគ្រាន់តែជារឿងដ៍អៀនខ្មាស់សម្រាប់សមត្ថកិច្ច និងប្រជាពលរដ្ឋក្នុងមូលដ្ឋានប៉ុណ្ណោះ។ ព្រោះករណីគ្រឿងញៀនជាបញ្ហារដ៏សំខាន់ ដែលពលរដ្ឋទាមទាឲ្យខាងសមត្ថកិច្ចធ្វើការបង្ក្រាប៕នី ពេជ្រ
