ក្រសួងសម្រេចបំពេញបំណងភរិយាកវីម្ចាស់ស្ទឹងសង្កែ គង្គ ប៊ុនឈឿន!
រាជធានីភ្នំពេញ៖ ក្រសួងវប្បធម៌ សម្រេចប្រគល់សិទ្ធិ គ្រប់គ្រងមតកសាសន៍នូវបទចម្រៀងចំនួន ៤១បទ របស់កវីម្ចាស់ស្ទឹងសង្កែគង្គ ប៊ុនឈឿន ជូនលោកស្រី គាត គឹមលន ដែលជាភរិយា ដើម្បីរក្សាការពារសិទ្ធិអ្នកនិពន្ធ និងស្នាដៃកវីម្ចាស់ស្ទឹងសង្កែ។ នេះបើយោងតាមសេចក្ដីសម្រេចស្ដីពីការប្រគល់សិទ្ធិគ្រប់គ្រងមតកសាសន៍ បទចម្រៀងរលោក គង្គ ប៊ុនឈឿន ចុះថ្ងៃ កាលពីថ្ងៃទី២៥ ខែកក្កដាឆ្នាំ២០១៧។
ក្នុងលិខិតផ្លូវការខាងលើ លោកជំទាវរដ្ឋមន្ត្រី ភឿង សកុណា បានបញ្ជាក់ថា ការសម្រេចនេះគឺធ្វើឡើងតាមសំណើ និងការសុំគ្រប់គ្រងមតកសាសន៍របស់ភរិយា លោក គង្គ ប៊ុនឈឿន ប៉ុន្តែក្នុងករណីមានបណ្តឹងជំទាស់ ដោយភ្ជាប់នឹងភស្តុតាងផ្ទុយពីភាគីពាក់ព័ន្ធផ្សេងៗ ក្រសួងនឹងធ្វើការពិនិត្យ និងសម្របសម្រួលលើការប្រគល់សិទ្ធិគ្រប់គ្រងបទចម្រៀងខាងលើឡើងវិញ។
បទចម្រៀងស្នាដៃរបស់កវីម្ចាស់ស្ទឹងសង្កែទាំង៤១បទនោះ មានចំណងជើងដូចខាងក្រោមនេះ៖ ១.ស្ពានឈើអភ័ព្វ ២.ស៊ីបាយបោកឆ្នាំង ៣.ទិញស្រាឱ្យឪ ៤.សម្រស់នាងចែវទូកដ ៥.នេះឬជីវិត? ៦.លាហើយស៊ូម៉ាត្រា ៧.រាហ៊ូចាប់ច័ន្ទ ៨.អនុស្សាវរីយ៍ខ្នងភ្នំសំពៅ ៩.អូរជ្រៅរណ្ដៅស្នេហ៍ ១០. កំលោះហុងដាកញ្ញាប៉េសេ ១១.ទំនួញបទុមសុរិយា។
១២. បេះដូងកំព្រា ១៣. កណ្ដុរលេងសួន ១៤.ផ្គរលាន់ប៉ៃលិន ១៥. អ្នកបើកត្រាក់ទ័រ ១៦. បទុមសុរិយាអូន ១៧.សាយណ្ហក្រោយផ្នូរ ១៨. បូតសណ្ដែក ១៩.បងដើរកាត់ភ្លៀង ២០. មេឃាភ្នំពេញតារាបាត់ដំបង ២១.រសស្នេហ៍ឧត្តម ២២.សែនស្ដាយថ្ពាល់ស្ដាំ ២៣.ទំនួញហ្គីតាមាស ២៤. មន្ថាមាសបង ២៥.ស្ពានអូរតាគី ២៦.ស្នាមក្រែមជាប់ថ្ពាល់ ២៧.នាងដើរទៅណា ២៨. កូនស្រីអ្នកនេសាទ ២៩ .ជ្រោះពេជ្រចិន្ដា ៣០.ស្បៃអក្ខរាចំប៉ាបាណន់ ៣១.អារសាច់ជូនម្ដាយ ៣២.ព្រោះនាងមានប្ដី ៣៣. សារ៉ាវ៉ាន់ស្លៀកខ្យល់ ទី៣៤ ម្លប់ដូងទី១០ ៣៥. កន្ដ្រិបទ្រឹមៗ ៣៦.ខ្មាសអស់បក្សា ៣៧. ថ្មគោលស្រមោលស្នេហ៍ ៣៨.រំដួលដងស្ទឹងសង្កែ ៣៩. កុំខឹងណាថ្លៃ ៤០. វិញ្ញាណផ្នូរខ្ញុំ និង៤១. ចម្រៀងមរណៈ។
គួររម្លឹកផងដែរថា កវីម្ចាស់ស្ទឹងសង្កែ គង់ ប៊ុនឈឿន កើតនៅថ្ងៃ ១៨ ខែតុលា ឆ្នាំ ១៩៣៩ នៅភូមិចំការសំរោង ឃុំចំការសំរោង ស្រុក បាត់ដំបង ខេត្តបាត់ដំបង ហើយបានទទួលមរណភាពកាលពីថ្ងៃទី ១៧ ខែមេសា ឆ្នាំ២០១៦នៅប្រទេស ណរវេស ដោយនៅក្នុងវ័យជរាពាធ៕
![]()
![]()
![]()