រថយន្តប្រភេទទួរីសចំនួន ៦គ្រឿងខុសបច្ចេកទេស ដឹកហួសទម្ងន់ត្រូវបានបង្រ្កាប!
បាត់ដំបង ៖ រថយន្តប្រភេទទួរីសចំនួន ៦គ្រឿងខុសបច្ចេកទេស ដឹកហួសទម្ងន់ត្រូវបានបង្រ្កាបនិងអោយចូលមកកែតម្រូវអោយត្រូវបច្ចេកទេសវិញ។
ក្រោយពីមានបទបញ្ជារពីលោកឧត្តមសេនីយ៍ទោ ស ថេត ស្នងការនគរបាលខេត្តបាត់ដំបង កម្លាំងនគរបាលចរាចរណ៍ផ្លូវគោកចុះត្រួតពិនិត្យរថយន្ត កែច្នៃខុសលក្ខណៈបច្ចេកទេស តទ្រុង តសាក់ស៊ី បន្ថែមកង់ និងដឹកលើសចំណុះ ដោយបានធ្វើការចរាចរណ៍នៅលើដងផ្លូវក្នុងភូមិសាស្ត្រខេត្តបាត់ដំបង។
ប្រភពបានឲ្យដឹងថាៈដោយមានការសុំអង្វរពីម្ចាស់រថយន្តដឹកទំនិញ ចំពោះឯកឧត្តម ស ថេត តាមរយៈលោកវរសេនីយ៍ឯក សាត គឹមសាន ឯកឧត្តម បានអនុញ្ញាតម្ចាស់រថយន្ត ធ្វើកិច្ចសន្យាបញ្ឈប់និងកែតម្រូវអោយរថយន្តតាមមលក្ខណ:បច្ចេកទេសវិញ ក៏ប៉ុន្ដែ ម្ចាស់រថយន្តទាំងនោះមិនបានគោរពពាក្យសន្យារបស់ខ្លួន ជាមួយនឹងពាក្យស្នើសុំអធ្យាស្រ័យពី ឯកឧត្តម ស ថេត ស្នងការនៃស្នងការដ្ឋាននគរបាលខេត្តបាត់ដំបងឡើយ។
ជាមួយនិងទង្វើខុសច្បាប់ចរាចរណ៍ខាងលើ ការិយាល័យជំនាញ បានចុះចល័ត ធ្វើការបង្រ្កាប បានរថយន្តចំនួន៦គ្រឿងម៉ាក ទួរីស ដែលមិនព្រមកែច្នៃ អោយត្រូវបច្ចេកទេសវិញ នៅថ្ងៃទី០៤ ខែកញ្ញា ឆ្នាំ២០១៧ ត្រង់ចំណុចលោកយាយទេព ភូមិអណ្តូងចេញ សង្កាត់អូរចារក្រុងនិងខេត្តបាត់ដំបង។
ក្រោយពីនាំយករថយន្តទាំងនោះ មកកាន់ស្នងការដ្ឋាននគរបាលខេត្តបាត់ដំបង ការិយាល័យចរាចរណ៍ បានធ្វើការកាត់បំផ្លាញទ្រង់របស់រថយន្តដែលតខុសបច្ចេកទេសនិងដោះកង់ឡានដែលឌុបចេញ ដើម្បីឲ្យត្រឹមត្រូវទៅតាមបច្ចេកទេសដើមវិញ។
សកម្មភាពកាត់បំផ្លាញនេះ គឺមានការសហការជាមួយ លោកហេង ប៊ុនលី ប្រធានការិយាល័យដឹកជញ្ជូន នៃសាធារណៈខេត្តបាត់ដំបង។
ក្នុងនាមស្នងការដ្ឋាននគរបាលខេត្តបាត់ដំបង ការិយាល័យ ចរាចរណ៍ផ្លូវគោក សូមធ្វើការអំពាវនាវដល់ម្ចាស់យានយន្ត ទាំងឡាយណាដែលកែច្នៃ ខុសលក្ខណៈបច្ចេក មិនទាន់បានកែតម្រូវ សូមមេត្តាកែតម្រូវទៅតាបច្ចេកទេសវិញ ៕
![]()
![]()
![]()