សមត្ថកិច្ចឃាត់ខ្លួន៣នាក់ដោយផ្ទុកនូវសារធាតុញៀន!
ខេត្តប៉ៃលិន៖ជនសង្ស័យ ជាមុខសញ្ញា ជួូញដូរនិងប្រើប្រាស់គ្រឿងញៀន យ៉ាងសកម្មចំនួន ៣នាក់ ត្រូវបានសមត្ថកិច្ចឃាត់ខ្លួនជាបន្ត បន្ទាប់និងរឹបអូសបាន០៣កញ្ចប់ធំបញ្ជូនទៅតុលាការ។
កាលពីវេលាម៉ោង១៣:២០នាទីថ្ងៃច័ន្ទ ៧រោច ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០១ ខែតុលា ឆ្នាំ២០១៨ កម្លាំងជំនាញប្រឆាំងបទល្មើសគ្រឿងញៀននៃអធិការដ្ឋាននគរបាលក្រុងប៉ៃលិន បានហៅជនសង្ស័យ ០២នាក់ មកធ្វើការសាកសួរ និងបានធ្វើតេស្តរកសារធាតុញៀន ជាលទ្ធិផលឃើញមានផ្ទុកនូវសារធាតុញៀនទាំងពីរនាក់៖០១-ឈ្មោះ សឿន តុលា ហៅអាក្រវិលធំ ភេទប្រុស អាយុ២៩ឆ្នាំ សញ្ជាតិខ្មែរ មុខរបរមិនពិតប្រាកដ មានទីលំនៅបច្ចុប្បន្នភូមិក្រចាប់លើ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។
០២-ឈ្មោះ សឿម សុភ័ក្រ ភេទប្រុស អាយុ២៦ឆ្នាំ សញ្ជាតិខ្មែរ មុខរបរកសិករ មានទីលំនៅបច្ចុប្បន្នភូមិភ្នំដំបង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។ក្រោយមកក៏បានស្នើសុំយោបល់ពីលោកព្រះរាជអាជ្ញានៃអយ្យការអមសាលាដំបូងខេត្តប៉ៃលិន ដើម្បីពន្លាតទឹកដី ដោយសហការជាមួយកម្លាំងជំនាញប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តប៉ៃលិន និងកម្លាំងនៃអធិការដ្ឋាននគរបាលស្រុករតន:មណ្ឌល ចុះឆែកឆេរបន្ទប់ជួលមួយកន្លែងនៅចំណុចទល់មុខសៃឡូចិន ស្ថិតក្នុងភូមិតាគ្រក់ ឃុំត្រែង ស្រុករតន:មណ្ឌល ខេត្តបាត់ដំបង បានរកឃើញម្សៅក្រាមពណ៌ស (ICE) ចំនួន ០៣កញ្ចប់ធំ នៅចំណុចគំនរសំរាមខាងក្រោយផ្ទះ និងសម្ភារ:សម្រាប់ជក់មួយចំនួន ក្នុងបន្ទប់ និងឃាត់ខ្លួនបានជនសង្ស័យម្នាក់ជាប្រពន្ធឈ្មោះ ម៉ង់ ស្រីលីស ភេទស្រី អាយុ៣០ឆ្នាំ សញ្ជាតិខ្មែរ មុខរបរលក់គុយទាវ មានទីលំនៅបច្ចុប្បន្នទីកន្លែងកើតហេតុខាងលើ ចំណែកម្ចាស់ផ្ទះជាប្តីបានរត់គេចខ្លួនបាត់ ។បច្ចប្បន្នជនសង្ស័យត្រូវបានជំនាញប្រឆាំងបទល្មើសគ្រឿងញៀន នៃអធិការដ្ឋាននគរបាលក្រុងប៉ៃលិន ធ្វើការសាកសួរ និងកសាងសំណុំរឿងទៅតាមនិតិវីធី ។
![]()
![]()
![]()