ក្រុមតាក់ស៊ីដឹកទំនិញ ធ្វើបាតុកម្មអហិង្សា ធ្វើការតវ៉ា ដោយសារគយយកលុយច្រើន គ្មានវិក័យប័ត្រ

បន្ទាយមានជ័យ: កាលពីថ្ងៃទី ១៤ ខែមករា ឆ្នាំ២០១៨ ក្រុមតាក់ស៊ីដឹកទំនិញ ពីក្រុងប៉ោយប៉ែត ទៅខេត្តបន្ទាយមានជ័យ បាននាំគ្នាប្រមូលផ្តុំធ្វើបាតុកម្មអហិង្សា នៅខាងមុខគយចល័តក្រសួង នៅខាងលិចស្ពានទឹកថ្លា ស្ថិតនៅភូមិ ទឹកថ្លាសង្កាត់ទឹកថ្លាក្រុង សិរីសោភ័ណ ខេត្ត បន្ទាយ មានជ័យ ដោយទាមទារ អោយលោក ពុធ សុខា ប្រធានគយចល័ត បញ្ចុះតំលៃយកលុយប្រចាំថ្ងៃ ឬ ជើង ទៅជាដាក់ខែ ដូចកាលពីឆ្នាំ២០១៧វិញ ។

បើតាមប្រភពពីក្រុមអ្នករត់តាក់ស៊ីដឹកទំនិញ បាននិយាយថាពួកខ្ញុំស៊ីឈ្នួលដឹកទំនិញ តាមឃ្លាំង នីមួយៗនៅក្រុងប៉ោយប៉ែត ដែលមួយជើងចំណេញបាន ត្រឹម ២០០០០ រៀល ក្រោយពី ទូទាត់ថ្លៃសាំង ដោយមិនទាន់គិតអំពីការលើកដាក់ដោយខ្លួនឯងផង ។ កន្លងមកពួកគាត់ធ្លាប់បង់អោយគយ ចល័ត និង គយខេត្ត មានពីរកន្លង ដែលមួយកន្លែងត្រូវបង់ ១០ដុល្លារ ក្នុង១ខែៗ តែរាល់ការបង់ទាំងអស់នេះ មិនមានវិក័យប័ត្រទេ ។ បើសិនពួកគាត់មិន បង់ទេ គយចាប់ផ្តើម បើកឡានប្រដេញតាមចាប់ ។ ទំនិញទាំងឡាយដែលពួកគាត់ដឹកនេះ គឺដឹក ជញ្ជូនចេញពីឃ្លាំ នៅក្នុងទឹកដីខ្មែរ មិនមែននាំចូល ដោយខ្លួនឯងទេ ដោយគ្រាន់ស៊ីឈ្នួលដឹក របស់ថៅកែឃ្លាំងទំនិញ មិនគួរណាមានគយ រហូតដល់បីកន្លែង ចាំចាប់ប្រដេញឡានពួកគាត់ទេ ។ ប្រភពបានបន្ថែមទៀតថា ទើបនៅដើមឆ្នាំ២០១៨ លោក ពុធ សុខា ជាប្រធានគយល័ត របស់ ក្រសួង បានចាប់រឹតបន្តឹង ដោយបានពួកបង់ថ្លៃដឹកទំនិញ ក្នុង១ ជើង ១០ ដុល្លារ ដោយមិនមាន វិក័យ ប័ត្រទេ តែខាងគយមួយនេះ មានឈ្មោះតាក់ស៊ីដែលត្រូវបង់ទាំងអស់ ។ ដោយសារតែមានការរឹត ក បង្ខំអោយបង់លុយ កាក់នេះហើយ ហើយមិនអាចរកលុយចំណេញ ចិញ្ចឹមគ្រួសារ ទើបពួកគាត់បង្ខំចិត្ត ដើម្បីធ្វើបាតុកម្មអហិង្សា ទាមទារមាន:

១.ទាមទារអោយគយក្រសួង ចុះតម្លៃដូចឆ្នាំមុន ក្នុង១ ខែ ចំនួន ១០០ដុល្លារ

២. ទាមទារ អោយអង្គភាពប្រឆាំងអំពើពុករលួយ ចុះពិនិត្យអំពើពុករលួយ ទៅលើមន្ត្រីគយ ដែលកំពុងប្រព្រឹត្តអំពើពុករលួយដុះស្នឹមនេះ
៣.សូមលោកអភិបាលខេត្ត ជួយដោះស្រាយជាបន្ទាន់ ចំពោះមន្ត្រីគយ ដែលបានប្រព្រឹត្ត អំពើពុករលួយនេះ ដោយយកលុយកាក់ពីតាក់ស៊ីដឹកទំនិញ ដោយគ្មានវិក័យប័ត្រ សូមឲ្យបញ្ឈប់ ការយកលុយកាក់នេះ ។

លោក ពុធ សុខា ជាប្រធានគយចល័ត ធ្លាប់បានផ្តល់បទសំភាសន៍ជាមួយវិទ្យុអន្តរជាតិ  RFA ថាៈ ក្រុមតាក់ស៊ីដឹកទំនិញខុសច្បាប់ លោកត្រូវធ្វើការបង្ក្រាប ដើម្បីឲ្យតាក់ស៊ីទាំងអស់នោះ ចូលមកបង់ពន្ធ ។

លោក ស៊ុំ ចន្ទគា មន្ត្រីអង្គការ សមាគមអាដហុក ការពារសិទ្ធិមនុស្ស និងអភិវឌ្ឍន៍នៅកម្ពុជា ប្រចាំ ខេត្តបន្ទាយមានជ័យ បានមានប្រសាសន៍ថាៈ ចំពោះការធ្វើបាតុកម្មអហិង្សា ជាសេរីភាព បញ្ចេញមតិ តែយើងមានការហួសចិត្តដែរ ដោយសារតែកំណាត់ផ្លូវត្រឹម៤៨ គីឡូម៉ែត្រ មានប៉ុស្តិ៍ គយ រហូតដល់ ៣ កន្លែង ចុះទំនិញទាំងអស់នោះចេញតាមច្រកណា ? បើតាមច្រកព្រំដែន មាន មន្ត្រីគយ កាំកុងត្រូល និងជំនាញផ្សេងៗ ចាំពិនិត្យនិងបង់ពន្ធនៅទីនោះ ហើយអ្នករត់តាក់ស៊ី គ្រាន់តែស៊ីឈ្នួលដឹកយកកំរ៉ៃចិញ្ចឹមជីវិត ចិញ្ចឹមគ្រួសារ មិនគួរណាចាប់បង្ខំឲ្យពួកគាត់បង់លុយ កាក់ប្រចាំថ្ងៃ ឬ ខែទេ គួរណាទៅពិនិត្យដល់ឃ្លាំង ហើយនិងច្រកនាំទំនិញជាការល្អជាង ។ ព្រោះ អ្នករត់តាក់ស៊ីយកតែកំរ៉ៃដឹក មិនមែនជាអ្នកដឹកផង ការពារទំនិញផងនោះទេ។ ប្រទេសយើង មានច្បាប់ បើសិនជាមន្ត្រីណាបើកឲ្យនាំទំនិញចូលមិនបង់ពន្ធ ហៅមន្ត្រីនោះមកធ្វើការណែនាំ ហើយ ឬ ឈានដល់ការបញ្ឈប់មុខតំណែងតែម្តងទៅ មិនចាំបាច់អីនាំគ្នា ដាក់កុងត្រូលស្ទាក់ តាមដងផ្លូវ អញ្ចឹងគ្មានមន្ត្រីនៅតាមច្រកទេ? ៕