បាត់ដំបង៖បុរសម្នាក់មកពីស្រុកឆ្ងាយត្រូវបានប្រជាកសិករប្រទះឃើញស្លាប់អង្គុយនិងមានខ្សែចងពីក្រោយថែមទៀត។សមត្ថកិច្ចសន្និដ្ឋានថាជាការធ្វើអត្តឃាតដោយខ្លួនឯងតែមហាជនបានសន្និដ្ឋានថាជាអំពើឃាតកម្មយ៉ាងពិតប្រាកដដោយសារតែការសម្លឹងមើលទៅតាមក្រសែភ្នែកអាចនិយាយថាមានការសម្លាប់រួចយកមកចងភ្ជាប់នឹងដើមឈើតែម្តង។

 

ការភ្ញាក់ផ្អើលនេះ  គឺនៅវេលាម៉ោងប្រហែល ១០ និង ៣០នាទីព្រឹកថ្ងៃទី២៤ខែមករាឆ្នាំ២០១៧នៅទួលមួយកន្លែងកណ្តាលវាលស្រែ ត្រង់ ចំណុច បឹងអំពិល ភូមិជ្រោយស្នា ឃុំខ្នាចរមាស ស្រុកបវេល ខេត្តបាត់ដំបង។ ខណៈប្រជាពលរដ្ឋដើរទៅកាប់ដើមស្នោ ហើយក៏បានប្រទះឃើញមនុស្សស្លាប់នៅនឹងទួលនោះក្នុងព្រៃរបោះ។

ក្រោយពីបានទទួលនូវសេចក្តីរាយការណ៍រួចមកសមត្ថកិច្ចនៃអធិការដ្ឋាននគរបាលស្រុកបវេលរួមនិងកម្លាំងនគរបាលខេត្ត(ព្រហ្មទណ្ឌនិងបច្ចេកទេស )ដោយមានលោកឧត្តមសេនីយ៍ត្រីជេតវណ្ណនីស្នងការរងទទួលផែនយុត្តិធ៌មបានចុះទៅត្រួតពិនិត្យសពជនរងគ្រោះ ដែលជាមនុស្សប្រុសអាយុប្រហែល៤៥ឆ្នាំ មិនស្គាល់សាវតានៅត្រង់ចំណុចកើតហេតុគឺសមត្ថកិច្ចជំនាញបានអះអាងថាសពត្រូវបានចងកដោយខ្សែអង្រឹងទៅនឹងដើមពង្រលើដីទួលគឺចុងខ្សែម្ខាងចងកនិងចុងខ្សែម្ខាងទៀតគឺរុំនឹងប្រអប់ដៃខាងឆ្វេង និងស្លាប់មានលក្ខណៈអង្គុយអាចមើលមួយភ្លែតគឺនិយាយបានថាវាជាអំពើឃាតកម្មសុទ្ធសាធ។ក្រោយពីបច្ចេកទេស វិទ្យាសាស្រ្ត ពិនិត្យរួចមកក៏បានធ្វើការ សន្និដ្ឋានថានេះជាករណីធ្វើអត្តឃាតដោយខ្លួនឯងមិនក្រោមពី៤៨ម៉ោងនោះឡើយដោយសារតែសពមានហើមនិងមានក្លិនស្អុយឯរន្ធភ្នែកទាំងសងខាងមានដង្កូវតូចៗដោយសារតែជនរងគ្រោះ  មានហូរទឹកកាម និងលាមកមកជាមួយហើយជុំវិញបរិវេណកើតហេតុគ្មានអ្វីដែលជាស្លាកស្នាមក្នុងករណីឃាតកម្មនោះឡើយ។លោកស្នងការរងបានសង្កត់ធ្ងន់ថាបើទោះបីជាករណីនេះជាការធ្វើអត្តឃាតក៏ដោយក៏លោកនិងកំលាំងជំនាញនៅតែបន្តធ្វើការស្រាវជ្រាវដើម្បីរកសាវតាជនរងគ្រោះនិងឈានដល់ការដឹងអំពីមូលហេតុដែលនាំអោយជនរងគ្រោះធ្វើអត្តឃាតនៅទីឆ្ងាយបែបនេះព្រោះនៅក្នុងតំបន់ខាងលើគ្មានអ្នកណាស្គាល់នោះឡើយ ៕