កម្មករជនជាតិចិនជិត ៥០នាក់ លើកបដា តវ៉ានៅស្ថានទូតចិន ទាមទារបើកប្រាក់ខែ មន្ត្រីប៉ូលិសខ្មែរមិនហ៊ានបំបែក

(ភ្នំពេញ)៖ នៅព្រឹកថ្ងៃទី០៩ ខែកុម្ភៈ ឆ្នាំ២០១៨  កម្មករជនជាតិចិន ៤៦ នាក់ ដែលធ្វើការសំណង់ នៅក្រុងព្រះសីហនុ បានមកប្រមូលផ្តុំគ្នា នៅមុខស្ថានទូតចិន ផ្លូវម៉ៅសេទុង សង្កាត់ទួលទំពូង២ ខណ្ឌចំការមន រាជធានីភ្នំពេញ​ ដើម្បីសុំ​អោយស្ថានទូត ជួយអន្តរាគមន៍រឿងថៅកែ មិនបើកប្រាក់ខែអោយ។

​​នៅម៉ោង ០៨ និង ៣០នាទី ព្រឹកថ្ងៃទី៩កុម្ភៈនេះ កម្មករជនជាតិចិន បានធ្វើដំណើរដោយថ្មើរជើង តាមផ្លូវម៉ៅសេទុង ពីស្ថានទូតចិន មកការិយាល័យទីប្រឹក្សា​ពាណិជ្ជ​កម្ម និងសេដ្ឋកិច្ច របស់ស្ថានទូតនៃប្រទេស​ចិន ដែលស្ថិតនៅផ្ទះ៤៣២c ផ្លូវមុន្នីវង្ស ក្នុង​សង្កាត់ទន្លេបាសាក់ ខណ្ឌចំការមន ជិតស្តុបបូកគោ ។

នេះជាលើកទី ១ ហើយដែលជនជាតិចិន បានរស់នៅប្រទេសខ្មែរធ្វើកម្មករ ហើយហ៊ានងើបមុខធ្វើ បាតុកម្មអហិង្សា ទាមទារប្រាក់ខែ  ហើយចំណែកមន្ត្រីប៉ូលិស ឬ ក្រុមប្រជាការពារភូមិ មិនបានទៅធ្វើការ ហាម ឃាត់ឡើយ ដែលខុសពីបាតុកម្ម ដោយក្រុមកម្មករ និង ប្រជាពលរដ្ឋរងនូវការបាត់បង់ដីធ្លី និង លំនៅដ្ឋាន ៕