ករណីសម្លាប់ស្ត្រីម្នាក់កាប់ចិញ្ច្រាំជាច្រើនកាំបិតញាត់ចូលក្នុងធុងទឹកកក ទម្លាក់ចោលក្បែរគល់ស្ពានព្រែកព្រះគន្លងគឺអំពើរប្លន់!
ភ្នំពេញ៖ឈាមស្រែកស្បែកហៅទីបំផុតនគរបាលបំបែកសំណុំរឿង ករណីឃាតកម្មសម្លាប់ស្ត្រីម្នាក់ហើយដាក់ធុងទឹកកកយកទៅបោះចោលនៅស្រុកខ្សាច់កណ្តាលបានហើយគឺជាអំពើរប្លន់ដោយសារជនសង្ស័យចាញ់ល្បែងនិងជំពាក់បំណុលគេច្រើនបែកគំនិតរៀបគំរោងប្លន់ជនរងគ្រោះតែម្តង។
យោងតាមគេហទំព័រអគ្គស្នងការដ្ឋាននគរបាលជាតិបានអោយដឹងថា៖ បន្ទាប់ពីមានករណីឃាតកម្មយ៉ាងឃោឃៅមួយបានកើតឡើងនៅស្ថិតក្នុងភូមិអន្លង់ ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល លោកឧត្តមសេនីយ៍ទោ អ៊ាវ ចំរើន ស្នងការខេត្តកណ្តាលបានដឹកនាំកម្លាំងបញ្ជាផ្ទាល់ដោយសហការជាមួយកម្លាំងនគរបាលព្រហ្មទណ្ឌក្រសួងមហាផ្ទៃ ស្រាវជ្រាវស្វែងរកចាប់ខ្លួនជនល្មើសយកមកផ្តន្ទាទោសតាមផ្លូវច្បាប់។
ជាក់ស្តែងជនសង្ស័យម្នាក់ត្រូវបានកម្លាំងនគរបាលក្រសួងមហាផ្ទៃសហការជាមួយកម្លាំងនគរបាលខណ្ឌសែនសុខនិងនគករបាលខេត្តកណ្តាលបានឃាត់ខ្លួនជនសង្ស័យម្នាក់ពាក់ព័ន្ធករណីឃាតកម្ម។ ប្រតិបត្តិការខាងលើបានធ្វើឡើងនៅថ្ងៃទី១៨ ខែមីនា ឆ្នាំ២០១៨ ក្នុងផ្សារទឹកថ្លា សង្កាត់ទឹកថ្លា នៅខណ្ឌសែនសុខ។
លោកឧត្តមសេនីយ៍ទោ អ៊ាវ ចំរើន ស្នងការខេត្តកណ្តាលបានឲ្យដឹងថាជនសង្ស័យឈ្មោះ សឿន សុខផេង ភេទប្រុស អាយុ២៨ឆ្នាំ ស្រុកកំណើតនៅឃុំព្រៃឈរ ស្រុកព្រៃឈរ ខេត្តកំពង់ចាម។ អាស័យដ្ឋានបច្ចុប្បន្នផ្ទះលេខ៣៣ ផ្លូវសហព័ន្ធរុស្សី ភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ។
យោងតាមចម្លើយសារភាពរបស់ជនសង្ស័យបានឲ្យដឹងថាមូលហេតុដែលគេសម្លាប់ស្ត្រីរងគ្រោះខាងលើបណ្តាលមកពីរូបគេត្រូវការលុយព្រោះជនសង្ស័យលេងល្បែងចាញ់និងជំពាក់លុយគេច្រើន។ ហើយរូបគេ(ជនសង្ស័យ)ជាមនុស្សស្គាល់គ្នារយៈពេល២ទៅ៣ឆ្នាំហើយ។ ជនសង្ស័យបានបន្តថាថ្ងៃកើតហេតុស្ត្រីរងគ្រោះបានមកជួសជុលទូរស័ព្ទនៅកន្លែងជនសង្ស័យ ដោយឃើញជនរងគ្រោះមានគ្រឿងអល័ង្កានៅជាប់ខ្លួនច្រើនជនល្មើសបានរៀបចំគម្រោងសម្លាប់តែម្តង។ ជនសង្ស័យបានបញ្ជាក់ថាខ្លួនចាញ់ល្បែងនិងបានយកម៉ូតូរបស់ខ្លួនមួយគ្រឿងម៉ាកហុងដា DREAM ឆ្នាំ២០១៨ យកទៅបញ្ចាំក្រោយពេលសម្លាប់នារីរងគ្រោះខាងលើជនសង្ស័យបានយកម៉ូតូជនរងគ្រោះម៉ាកZoomer X មួយគ្រឿងទៅលក់និងយកលុយទៅលោះម៉ូតូរបស់ខ្លួនមកវិញ។
សូមបញ្ជាក់ថាៈ កាលពីថ្ងៃទី១៦ ខែមីនា ឆ្នាំ២០១៨ សាកសពស្ត្រីម្នាក់ ត្រូវឃាតកកាប់ចិញ្ច្រាំជាច្រើនកាំបិតញាត់ចូលក្នុងធុងទឹកកក ទម្លាក់ចោលក្បែរគល់ស្ពានព្រែកព្រះគន្លង ស្ថិតក្នុងភូមិអន្លង់ ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល ។
នគរបាលស្រុកខ្សាច់កណ្ដាល បានឱ្យដឹងថា ស្ត្រីរងគ្រោះមានឈ្មោះ ឃឿន ធានី អាយុ២៩ឆ្នាំ រស់នៅភូមិក្រូចសើច ឃុំហានជ័យ ស្រុកកំពង់សៀម ខេត្តកំពង់ចាម។
ប្រភពដដែលបន្តថា ក្រោយពីសមត្ថកិច្ចទទួលបានព័ត៌មានភ្លាម សមត្ថកិច្ចនគរបាលជំនាញ នៃស្នងការដ្ឋាននគរបាលខេត្តកណ្ដាល សហការជាមួយកម្លាំងនគរបាលជំនាញស្រុក នៃអធិការដ្ឋាននគរបាលស្រុកខ្សាច់កណ្ដាល ចុះទៅអន្តរាគមន៍នៅកន្លែងកើតហេតុ។
បច្ចុប្បន្នជនសង្ស័យដែលជាឃាតកសម្លាប់ស្ត្រីរងគ្រោះដាក់ចូលក្នុងធុងទឹកកករួចហើយយកទៅទម្លាក់ចោលនោះកំពុងឃាត់ខ្លួនបណ្តោះអាសន្ននៅស្នងការខេត្តកណ្តាលដើម្បីកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី ៕
![]()
![]()
![]()