គយចល័តរបស់ក្រសួងកៀបសង្កត់ដាក់ខែក្រៅផ្លូវការធ្ងន់ពេកម្ចាស់រថយន្តដឹកទំនិញនិងម្ចាស់ឃ្លាំងទំនិញពួកគាត់គ្រោងផ្តិតមេដៃប្តឹងអង្គភាពប្រឆាំងអំពើរពុករលួយ!

 

បន្ទាយមានជ័យ: សន្លឹកឆ្នោត របស់គណបក្ស ប្រជាជនកម្ពុជា ក្នុងខេត្ត បន្ទាយមានជ័យ ត្រូវបានរហែកដោយសារតែ មន្ត្រីគយចល័តរបស់ក្រសួងប្រចាំខេត្តនេះកៀបសង្កត់ ប្រជាពលរដ្ឋជាពិសេសអ្នករត់ឡានដឹកទំនិញនិងអាជីវករម្ចាស់ឃ្លាំងស្ទើរលៀតអណ្តាតទ្រាំមិនបាននិងការកៀបសង្កត់របស់គយចល័តរបស់ក្រសួងដែលប្រព្រឹត្តអំពើរពុករលួយដាក់ខែក្រៅផ្លូវការពីរថយន្តដឹកទំនិញនិងម្ចាស់ឃ្លាំងទំនិញពួកគាត់ផ្តិតមេដៃប្តឹងអង្គភាពប្រឆាំងអំពើរពុករលួយ។

ជាក់ស្តែងកាលពី ព្រឹកថ្ងៃទី ៤ខែមិថុនា ឆ្នាំ ២០១៨  នេះមានសេចក្តី រាយការណ៍ថា កម្លាំងគយចល័តរបស់ ក្រសួង ប្រចាំ ខេត្ត បន្ទាយមានជ័យ ដឹកនាំដោយលោក អាតអឿន អនុប្រធានទទួលបន្ទុកត្រួតពិនិត្យ ឃ្លាំងទំនិញ បានដឹកនាំកម្លាំងធ្វើការបង្ក្រាប រថយន្ត យីឌុក ផ្ទុកដោយទំនិញ ពេញដែលបានយកមកទំលាក់អោយឃ្លាំងមួយនៅផ្លូវលេខ៤ ក្បែរស្នាក់ការភូមិសូភី សង្កាត់ កំពង់ស្វាយក្រុងសិរីសោភ័ណ ខេត្ត បន្ទាយមានជ័យដោយគ្រាន់តែមកដល់ចំណុចកើតហេតុភ្លាមៗ ដែលបានធ្វើមានការភ្ញាក់ផ្អើល ដល់ប្រជាពលរដ្ឋយ៉ាងខ្លាំងហើយគេសង្ស័យជាទំនិញគេចពន្ធ ដោយសមត្ថកិច្ចគយបានយកយករថយន្តនោះទៅកាន់ប៉ុស្តិ៍ត្រួតពិនិត្យតែម្តង។

ជុំវិញករណីនេះអ្នកសារព័ត៌មាន ខ្មែរជាយដែន បានព្យាយាមទំនាក់ទំនងទៅលោកអាតអឿនតាមរយះលេខ ទូរស័ព្ទ ដើម្បីសួរនាំ ករណី បង្ក្រាបរថយន្តយីឌុកនោះដែរតែមិនអាចទាក់ទងបានដោយគ្មានអ្នកទទួលប្រភពបែកធ្លាយមួយបានអោយដឹងថា: តាមពិតទៅ រាល់ថ្ងៃនេះក្រុមអាជីវករម្ចាស់

ឃ្លាំងទំនិញនៅខេត្ត បន្ទាយមានជ័យ  កំពុង ស្រែក ដូចក្ងាន  ខណ:  ពេលដែល គយចល័ត របស់ក្រសួង  សង្កត់  ក  ដោយទារប្រាក់ដាក់ខែ ក្រៅផ្លូវការ ឃ្លាំងមួយក្នុង១ខែ  ១៥០០ដុល្លា ទៅ២៥០០ដុល្លា សរុបទូទាំងខេត្ត បន្ទាយមានជ័យមាន ចំនួន ២៨ឃ្លាំង។

កាលពី សម័យលោក ពុធសុខា  មេផ្លូវ៣ខេត្ត បាត់ដំបង  បន្ទាយមានជ័យ  សៀមរាប  ដែលអោយ លោកអាតអឿនជាអនុប្រធានក្តាប់ខេត្តបន្ទាយមានជ័យទទួលបន្ទុកត្រួតពិនិត្យ ឃ្លាំង  និងលោក  ប្រាក់សំអាតទទួលបន្ទុកប្រមូលលុយកាក់ពុករលួយពីរថយន្តដឹកទំនិញឆ្លងកាត់ប៉ោយប៉ែតទៅមកបន្ទាយមានជ័យ។ដោយ តម្រូវអោយក្រុមអាជីវករនិងអ្នករត់ឡានដឹកទំនិញទាំងអស់មកបង់ប្រាក់ចាប់ពីថ្ងៃទី១រហូតដល់ថ្ងៃទី៥ បើលើសថ្ងៃកំណត់គឺគយចល័យមានលោកឈុនសុធាវណ្ណារីនិងលោកប្រាក់សំអាត បញ្ជារកូនចៅឲ្យបើករថយន្ត ប្រដេញចាប់តាមផ្លូវដោយមិនខ្លាចគ្រោះថ្នាក់ចរាចរណ៍ឡើយ។

ប្រភព ព័ត៌មាន បានបង្ហើបប្រាប់ថា: គ្រាន់តែដី៤៨គីឡូម៉ែត្រ សោះបែជាសមត្ថកិច្ចគយ ដាក់ដល់ទៅ៣កន្លែង បណ្តាក់គ្នាដូចខ្យងតែអ្វីដែលគួរឲ្យខ្លាចជាងគេនោះពួកសមត្ថកិច្ចចល័តរបស់ក្រសួងដែលមានទីតាំងនៅខាលលិចគល់ស្ពានទឹកថ្លា ស្ថិតនៅក្នុង ភូមិទឹកថ្លាសង្កាត់ទឹកថ្លាក្រុងប៉ោយប៉ែតខេត្តបន្ទាយមានជ័យ នេះតែម្តង។ ដោយលោក ពុធសុខា  មេផ្លូវ៣ខេត្ត បាត់ដំបង  បន្ទាយមានជ័យ  សៀមរាបដែលអោយលោកអាតអឿនជាអនុប្រធានក្តាប់ខេត្តបន្ទាយមានជ័យទទួលបន្ទុកត្រួតពិនិត្យ ឃ្លាំងនិងលោកប្រាក់សំអាតទទួលបន្ទុកប្រមូលលុយកាក់ពុករលួយពីរថយន្តដឹកទំនិញឆ្លងកាត់ប៉ោយប៉ែតទៅមកបន្ទាយមានជ័យ។

ប្រភពបន្តថា៖ដោយភាពប៉ិនប្រសប់របស់លោក អាតអឿនក្នុងការរកប្រាក់ចិញ្ចឹមមេលោកបានប្រើស្នៀត ថ្មីដោយជំរឿនឃ្លាំងទំនិញនៅទូទាំងខេត្ត បន្ទាយមានជ័យឃើញថាមានចំនួន២៨ឃ្លាំងក្នុងនោះប៉ោយប៉ែតមានឃ្លាំងចំនួន១៣ចំណែកបន្ទាយមានជ័យមានចំនួន១៥ឃ្លាំងដោយលោកគំរាមថានិងធ្វើការ ឆែកឆេរបើមិនបង់ប្រាក់ក្រៅផ្លូវការប្រចាំខែទេនោះដោយដំបូងលោកអាតអឿនទារក្នុង១ខែឃ្លាំងមួយ២៥០០ដុល្លា តែឃ្លាំងខ្លះទារបានតែ១៥០០ដុល្លាប៉ុណ្ណោះ។  

ចំណែកលោកប្រាក់សំអាតទទួលបន្ទុកប្រមូលលុយកាក់ពុករលួយពីរថយន្តដឹកទំនិញឆ្លងកាត់ប៉ោយប៉ែតទៅមកបន្ទាយមានជ័យនេះក៏មិនធម្មតាដែរក្នុងការប្រើយុទ្ធសាស្ត្រកៀបសង្កត់ទើបប្រមូលលុយកាក់ពីការដាក់ខែតាមរថយន្តតូចធំកាន់តែច្រើន។ប្រភពមិនផ្លូវការបានអោយដឹងថាគ្រាន់តែរថយន្តប្រភេទកាមរីដឹកទំនិញចេញពីប៉ោយប៉ែតទៅកាន់ខេត្តបន្ទាយមានជ័យ បាត់ដំបងនិងសៀមរាបសរុបទៅមិនតិចជាង៤៧០គ្រឿងទេហើយរថយន្តមួយគ្រឿងត្រូវបង់លុយកាក់ក្រៅផ្លូវការក្នុង១ខែ៦០០០០០រៀល(ហុកសិបម៉ឺនរៀល) ក្នុងនោះដែរ រថយន្ត តួរីស១២កៅអី មានចំនួន៧០គ្រឿងដែលដឹកទំនិញហើយ រថយន្ត១គ្រឿងត្រូវបង់ក្នុងមួយខែ១០០០០០០រៀល(មួយលានរៀល)  ចំណែករថយន្ត ឃ្លុបដែលដឹកទំនិញមានចំនួន១៦២គ្រឿងដោយក្នុង១គ្រឿងត្រូវបង់១ខែចំនួន៣០០០០០០(បីលានរៀល)ចំណែករថយន្តក្រុងដែលដឹកទំនិញមាន៦ក្រុមហ៊ុនតែក្រុមដែលសកម្មក្នុងការដឹកទំនិញជាងគេគឺក្រុមហ៊ុនថោងស៊ីញនិងក្រុមហ៊ុនវរះប៊ុនថាំដោយគយគេគិតជាជើងក្រុមហ៊ុនអីក៏ដោយអោយតែដឹកទំនិញគឺរថយន្តមួយគ្រឿងត្រូវបង់ក្នុងមួយជើង១០០០០០០រៀល(មួយលានរៀល)តែម្តង។

ទោះជាយ៉ាង ណា  ដោយសារការបន់ស្រន់របស់ប្រជាពលរដ្ឋជាពិសេសក្រុមអាជីវករម្ចាស់ឃ្លាំងនិងក្រុមអ្នកដឹកទំនិញទីបំផុតទេវតាជួយកាលពីដើមខែនេះលោកពុតសុខាក៏ត្រូវបានមេកើយដកចេញហើយដាក់ជំនួសវិញនូវលោក សួន សោភា ដែលផ្លាសមកពីផ្លូវជាតិ៧មកជំនួសតំណែងលោក ពុធ សុខា វិញ ។

តែអ្វីដែលគួរអោយកត់សំគាល់នោះគឺផ្លាស់ប្តូរតែមនុស្សទេ គឺសកម្មភាពពុករលួយកៀបសង្កត់ប្រជាពលរដ្ឋ នៅតែមានដដែល ដោយសារមានជំនាញ ចំនួន៣នាក់ ទី១ លោក ឈុន សុធា វណ្ណារី  (ដែលគេស្គាល់ថាជស្គាល់ថា ជាខ្លាចាស់ប្រចាំតំបន់នេះ)  ទី២ គឺលោក ប្រាក់ សំអាត ដែលជាអ្នកប្រមូលលុយ តាមរយន្តដឹកទំនិញគ្រប់ប្រភេទ។  ចំណែកលោក អាត  អឿន គឺជាអ្នកគ្រប់គ្រងប្រមូលលុយកាក់ក្រៅផ្លូវការពីតាមឃ្លាំងទំនិញនៅទូទាំងខេត្តបន្ទាយមានជ័យ។ដូច្នេះលោក សួន សោភាដែលជាមេថ្មីនេះមិនពិបាកក្នុងការប្រម៉ាញ់ទេកូនចៅប្រមូលជូនស្រាប់។

មជ្ឈដ្ឋាននានា លើកឡើងថា ជុំវិញ បើសិនជាមានការកៀបសង្កត់ប្រជាពលរដ្ឋ អាជីវករម្ចាស់ឃ្លាំងទំនិញ អ្នកដឹកទំនិញ គ្រប់ប្រភេទ ពីសំណាក់ក្រុមគយបែបនេះច្បាស់ជា សន្លឹកឆ្នោត របស់គណបក្សប្រជាជន កម្ពុជាខេត្តបន្ទាយមានជ័យនិងត្រូវរហែកឬបាត់បង់ប្រជាប្រិយ៍ភាពដោយសារតែមន្ត្រី ពុករលួយមួយក្តាប់តូចនេះមិនខានទេសង្ឃឹមថាអង្គភាពប្រឆាំង អំពើរពុករលួយក្រោយពីទទួលស្នាមមេដៃដែលប្រជាពលរដ្ឋបានដាក់បណ្តឹងនិងបើកការស៊ើបអង្កេតជុំវិញការលើកឡើងរបស់ប្រជាពលរដ្ឋខេត្តបន្ទាយមានជ័យផងទាន!៕