បាត់ដំបង ៖ក្រោយពីធ្វើការបង្ក្រាបបានម៉ូតូ២គ្រឿងដែលត្រូវបានគេលួចចេញពីទឹកដីថៃ(ចោរកម្មឆ្លងដែន)នោះនៅព្រឹកថ្ងៃទី ១១ នេះដែរលោក អធិការ ពេជ្រ សារ៉ែន បានដឹកនាំកំលាំងធ្វើការប្រគល់ម៉ូតូទាំង ២ គ្រឿងនេះទៅអោយភាគីថៃវិញ  នៅត្រង់ចំណុចច្រកទ្វារអន្តរជាតិ គីឡូ ១៣ក្នុងទឹកដីស្រុកសំពៅលូនតែម្តងដើម្បីនាំយកទៅប្រគល់អោយម្ចាស់ដើមវិញដែលសកម្មភាពនេះ  សបញ្ជាក់អោយឃើញថាចំណងសាមគ្គីភាពនិងមិត្តភាពរវាងកម្ពុជា ថៃដែលជាប្រទេសមានព្រំដែនជាប់គ្នាគឺកាន់តែស្អិតរមួត និងយូរអង្វែងថែមទៀត។

 

កាលពីព្រលប់ថ្ងៃទី ១០  ខែកញ្ញា  ឆ្នាំ២០១៨  ត្រង់ចំណុចច្រករបៀងមួយកន្លែងក្បែខ្សែបន្ទាត់ព្រំដែន កម្ពុជា ថៃក្នុងភូមិស្ពានយោលឃុំជ្រៃសីមា  ស្រុកសំពៅលូនខេត្តបាត់ដំបងគេបានឮសម្លេងផ្ទុះអាវុធចំនួន ២គ្រាប់ដើម្បីស្ទាក់ចាប់ជនសង្ស័យដែលកំពុងធ្វើសកម្មភាពអូសម៉ូតូឆ្លងដែនចេញពីទឹកដីថៃ មកកាន់កម្ពុជា ។ម៉ូតូធំចំនួន២គ្រឿងដែលសុទ្ធសឹងជាម៉ូតូស៊ែរីទំនើបៗត្រូវបានសមត្ថកិច្ចនៃអធិការដ្ឋាននគរបាលស្រុកសំពៅលូនធ្វើការស្ទាក់ប្រមាញ់និងឃាត់បានព្រមទាំងបានប្រគល់ទៅអោយភាគីថៃវិញដើម្បីអោយទៅម្ចាស់ដែលបានបាត់បង់ម៉ូតូបន្ទាប់ពីមានចោរកម្មឆ្លងដែន ។

យោងតាមរបាយការណ៍របស់សមត្ថកិច្ចបានអោយដឹងថា ក្រោយពីទទួលបានសេចក្តីរាយការណ៍ពីភាគីថៃអោយជួយសហការក្នុងការស្រាវជ្រាវរកមុខសញ្ញាលួចម៉ូតូពីគ្រឿងពីខេត្ត ប្រាជីនបុរីប្រទេសថៃដែលគេសង្ស័យថាក្រុមចោរអាចជាជនជាតិថៃហើយយកមកលក់អោយខ្មែរ  នៅក្នុងខ្សែបន្ទាត់ព្រំដែន ។សេចក្តីរាយការបានអះអាងថា  ម៉ូតូទាំង ២ គ្រឿងនោះ ម៉ាក YAMAHA  ប្រភេទ RG 331/M-Slashពាក់ស្លាកលេខ ប្រាជីនបុរី ១០០៩  និងម៉ូតូម៉ាកHondaប្រភេទ MSXពាក់ស្លាកលេខ ឆៈឈើងសៅ ២១២៥ត្រូវបានក្រុមជនមិនស្គាល់មុខលួចចេញពីខេត្តប្រាជីនបុរីកាលពីព្រឹកថ្ងៃទី ១០ ខែកញ្ញា នេះ ។នៅល្ងាចនោះដែរលោកអធិការ ពេជ្រ សារ៉ែនបានដាក់កំលាំងល្បាតតាមខ្សែបន្ទាត់ព្រំដែនក៏បានប្រទះឃើញជនសង្ស័យកំពុងដឹកម៉ូតូទាំង ២ គ្រឿងនេះ ឆ្លងដែនចូលមកក្នុងស្រុកសំពៅលូន ទើបធ្វើការស្ទាក់ដើម្បីចាប់ខ្លួនយកមកសាកសួរប៉ុន្តែជនសង្ស័យបានផ្តួលម៉ូតូហើយរត់គេចខ្លួនបាត់ស្រមោលបន្ទាប់ពីបានឃើញសមត្ថកិច្ច ។នៅព្រឹកថ្ងៃទី ១១ នេះដែរលោក អធិការ ពេជ្រ សារ៉ែន បានដឹកនាំកំលាំងធ្វើការប្រគល់ម៉ូតូទាំង ២ គ្រឿងនេះទៅអោយភាគីថៃវិញ  នៅត្រង់ចំណុចច្រកទ្វារអន្តរជាតិ គីឡូ ១៣ក្នុងទឹកដីស្រុកសំពៅលូនតែម្តងដើម្បីនាំយកទៅប្រគល់អោយម្ចាស់ដើមវិញដែលសកម្មភាពនេះ  សបញ្ជាក់អោយឃើញថាចំណងសាមគ្គីភាពនិងមិត្តភាពរវាងកម្ពុជា ថៃដែលជាប្រទេសមានព្រំដែនជាប់គ្នាគឺកាន់តែស្អិតរមួត និងយូរអង្វែង ៕