បន្ទាប់ពីអញ្ជើញមកពីអឺរ៉ុប នៅថ្ងៃទី១៩តុលាស្អែកនេះ សម្តេចតេជោ ហ៊ុន សែន អញ្ជើញទៅឥណ្ឌូនេស៊ី
(ភ្នំពេញ)៖ សម្តេចតេជោ នាយករដ្ឋមន្ត្រី ហ៊ុន សែន បានអញ្ជើញមកដល់រាជធានីភ្នំពេញ កាលពីម៉ោង ៧ព្រឹក ថ្ងៃទី១៨ ខែតុលា ឆ្នាំ២០១៩ បន្ទាប់ពីសម្តេច អញ្ជើញបំពេញទស្សនកិច្ចផ្លូវការ នៅអឺរ៉ុប ក្នុងប្រទេស ៣ គឺប្រទេសឆេក ហុងគ្រី និងប្រទេសប៊ុលហ្ការី ចាប់ពីថ្ងៃទី១៣-១៧ ខែតុលា ឆ្នាំ២០១៩។
តាមកម្មវិធី ដែលបានគ្រោងទុក នៅម៉ោង ២ និង ៣០នាទី រសៀលថ្ងៃទី១៩ ខែតុលា ឆ្នាំ២០១៩ សម្តេចតេជោ ហ៊ុន សែន នឹងអញ្ជើញដឹកនាំគណៈប្រតិភូជាន់ខ្ពស់នៃរាជរដ្ឋាភិបាលកម្ពុជា ទៅប្រទេសឥណ្ឌូនេស៊ី។
នៅម៉ោង ៨ យប់ថ្ងៃទី២០ ខែតុលា ឆ្នាំ២០១៩ សម្តេចតេជោ ហ៊ុន សែន នឹងអញ្ជើញវិលត្រឡប់ពីប្រទេសឥណ្ឌូនេស៊ី មកដល់ភ្នំពេញវិញ។
ក្រសួងការបរទេស បានប្រកាសថា សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងដឹកនាំគណៈប្រតិភូជាន់ខ្ពស់ អញ្ជើញទៅចូលរួមជាភ្ញៀវកិត្តិយស ក្នុងពិធីស្បថចូលកាន់តំណែងថ្មី របស់លោក ចូកូ វីដូដូ (Joko Widodo) ជាប្រធានាធិបតី និងលោក ម៉ារូហ្វ អាម៉ឺន (Ma ruf Amin) ជាអនុប្រធានាធិបតី នៃសាធារណរដ្ឋឥណ្ឌូនេស៊ី នៅថ្ងៃទី២០ ខែតុលា ឆ្នាំ២០១៩ នៅទីក្រុងហ្សាកាតា។
សេចក្ដីប្រកាសព័ត៌មាន លើកឡើងថា ក្នុងពិធីស្បថចូលកាន់តំណែងនេះ នឹងមានការអញ្ជើញចូលពីសំណាក់ ប្រមុខរដ្ឋ/រដ្ឋាភិបាល និងតំណាងប្រទេសសមាជិកអាស៊ានឯទៀតផងដែរ។
ក្រសួងការបរទេស បានលើកឡើងថា គណៈប្រតិភូ ដែលនឹងអញ្ជើញអមដំណើរសម្តេចតេជោ ទៅកាន់ប្រទេសឥណ្ឌូនេស៊ី រួមមាន លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ លោក អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស ព្រមទាំងឥស្សរៈជនជាន់ខ្ពស់ នៃរាជរដ្ឋាភិបាលមួយចំនួនផងដែរ។
ក្រសួងការបរទេស លើកឡើងថា សម្តេចតេជោនាយករដ្ឋមន្ត្រី ហ៊ុន សែន នៅប្រទេសឥណ្ឌូនេស៊ី នឹងជួបដោយឡែកជាមួយលោក ចូកូ វីដូដូ ដើម្បីជូនពរជ័យដល់លោក ដែលបានបន្តជាប់ឆ្នោតជាប្រធានាធិបតីឥណ្ឌូនេស៊ី នៅអាណត្តិទី២ ហើយនិងធ្វើការផ្លាស់ប្តូរយោបល់ អំពីកិច្ចសហប្រតិបត្តិការទ្វេភាគី និងពហុភាគី និងបញ្ហានានាដែលមាន ការចាប់អារម្មណ៍ដូចគ្នា។
ការបោះឆ្នោត នៅប្រទេសឥណ្ឌូនេស៊ី កាលពីថ្ងៃទី១៧ ខែមេសា ឆ្នាំ២០១៩ បង្ហាញថា លោក ចូកូ វីដូដូ បានជាប់ឆ្នោត ជាប្រធានាធិបតី នៅអាណត្តិទី២ ចាប់ពីឆ្នាំ២០១៩-២០២៤៕
