តាមសេចក្ដីរាយការណ៍ជាច្រើនដែលបង្ហោះនៅលើបណ្ដាញសង្គមគឺបានបង្ហាញរូបភាពនៃការជួបជុំថ្នាក់ដឹកនាំនិងសកម្មជនរបស់អតីតគណបក្សសង្គ្រោះជាតិដែលបានប្រមូលផ្ដុំគ្នានៅទីក្រុងបាងកក។ ទាំងលោកស្រីមួរ សុខហួរ និង លោកអេងឆៃអ៊ាងបានបង្ហាញរូបភាពដូចនេះដោយបញ្ចេញកាយវិការសន្យាវិលចូលចកម្ពុជាវិញនៅថ្ងៃ៩ វិច្ឆិកាឱ្យខានតែបាន។លោកសម   រង្ស៊ីប្រធានស្ដីទីនៃគណបក្សសង្គ្រោះជាតិដែលជាមេដឹកនាំការធ្វើមាតុភូមិនិវត្តន៍នេះនៅមិនទាន់មកកាន់ទីក្រុងបាងកកនៅឡើយទេ ។ គេរំពឹងថាលោកនឹងមកកាន់ទីក្រុងបាងកកនេះនៅថ្ងៃទី៣ វិច្ឆិកាគឺមុនប៉ុន្មានថ្ងៃប៉ុណ្ណោះនៃការវិលចូលកម្ពុជា។ លោកសម រង្ស៊ីបានប្រកាសថារូបលោកនិងអ្នកអមដំណើរជាមួយលោកនៃបណ្ដាប្រទេសមួយចំនួនក្នុងសហភាពអឺរ៉ុប២៨ប្រទេស រួមនឹងអង្គការជាតិ និងអន្ដរជាតិដែលលោកអះអាងថាបានកំពុងរៀបចំទិញសំបុត្រហោះធ្វើដណើរមកកាន់តំបន់អាស៊ីអាស៊ីអាគ្នេយ៍។ សម្រាប់លោកសមរង្ស៊ីដែលជាគូប្រជែងនយោបាយដ៏ខ្លាំងបំផុតជាមួយនឹងសម្ដេចនាយករដ្ឋមន្រ្ដីហ៊ុន សែនបានអះអាងថាវត្តមានរបស់លោកនៅពេលនេះគឺដើម្បីស្រោចស្រង់ស្ថានការណ៍នយោបាយឡើងវិញហើយ និងជួយទប់កុំឱ្យបាត់បង់ប្រព័ន្ធអនុគ្រោះEBAដែលសហភាពអឹរ៉ុបកំពុងតែរៀបចំផ្ដាច់ពីកម្ពុជានៅដើមឆ្នាំ២០២០នេះ។ យ៉ាងណាក៏ដោយទាំងលោកសម រង្ស៊ី លោកស្រីមួរ សុខហួរ លោកអេង ឆៃអ៊ាង និងថ្នាក់ដឹកនាំដទៃទៀតនៃគណបក្សសង្គ្រោះជាតិចំនួន៩រូបរួមទាំងលោកស្រីជូ ឡុងសួមួរ៉ា ភរិយាលោកសម រង្ស៊ីផងដែរសុទ្ធតែត្រូវបានតុលាការសម្រេចចេញដីកាឱ្យប្រទេសនៅក្នុងសមាគមអាស៊ានជាពិសេសគឺប្រទេសថៃឃាត់ខ្លួនពួកគាត់ដើម្បីចាប់បញ្ចូនមកអនុវត្តទោសនៅកម្ពុជាដែលតុលាការកាត់ទោសពីបទប៉ុនប៉ងផ្ដួលរលំរដ្ឋាភិបាល។ តែយ៉ាងនេះក្ដីថ្នាក់ដឹកនាំគណបក្សសង្គ្រោះជាតិទាំងនោះបានសច្ចារថាត្រូវតែវិលចូលកម្ពុជានៅថ្ងៃ៩ វិច្ឆិកាទោះជារងការគម្រាមកំហែងចាប់ខ្លួនក៏ដោយ៕