ប្រធាន គ.ជ.ប ប្រាប់ប្រតិភូអាមេរិកថា៖ «បើខ្ញុំអនុវត្តតាមស្ដង់ដារមិនបាន ខ្ញុំសុខចិត្តដើរចេញ»
ភ្នំពេញ៖ ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ប្ដេជ្ញាអនុវត្តការងារតាមបែបវិជ្ជាជីវៈ ឱ្យស្របតាមស្ដង់ដារសាកល ដើម្បីធានាភាពអព្យាក្រឹត្យ និងឯករាជ្យ ក្នុងដំណើរការបោះឆ្នោត ។ ហើយបើស្ថាប័នបោះឆ្នោតមួយនេះ ដើរខុសគោលការណ៍ដែលខ្លួនបានកំណត់នោះ ប្រធានគ.ជ.បរូបនេះ នឹងចុះចេញពីតួនាទី។
«ក្នុងការដឹកនាំរបស់ខ្ញុំ ខ្ញុំត្រូវអនុវត្តឱ្យខាងតែបានការគោរពច្បាប់ រដ្ឋធម្មនុញ្ញ គោលការណ៍ដែលខ្ញុំបានជម្រាបជូនខាងលើ ក្នុងនោះមានឯករាជ្យ និងតម្លាភាព»។ នេះជាការអះអាងរបស់លោក ស៊ិក ប៊ុនហុក ប្រធាន គ.ជ.ប នៅចំពោះមុខលោក ប៊ិន ស្ត្រាមែន តំណាងប្រតិភូក្រុមប្រឹក្សាអ្នកដឹកនាំវ័យក្មេងមកពីសហរដ្ឋអាមេរិក (ACYPL) កាលពីថ្ងៃទី១ តុលា។
លោក ស៊ិក ប៊ុនហុក រៀបរាប់ប្រាប់ប្រតិភូអាមេរិកទៀតថា ចាប់តាំងពីលោក ទទួលបានតួនាទីជាប្រធានគ.ជ.ប តាមរយៈការផ្ដល់សេចក្តីទុកចិត្តពីរដ្ឋសភា កាលពីឆ្នាំ២០១៥មក លោកបានស្រាវជ្រាវបទដ្ឋានគតិយុត្តិពាក់ព័ន្ធនឹងការបោះឆ្នោតក្នុងពិភពលោក មុនឈានដល់ការដាក់ចេញគោលការណ៍៧ ចំណុច ដោយក្នុងនោះរួមមាន៖ ឯករាជ្យភាព, អព្យាក្រឹត្យភាព, សុចរិតភាព ,តម្លាភាព ,ប្រសិទ្ធភាព ,វិជ្ជាជីវៈ និងភាពជាអ្នកបម្រើសេវា។ ប៉ុន្តែបើសិនជាការអនុវត្ត មិនស្របតាមគោលការណ៍កំណត់របស់ខ្លួនទេនោះ ប្រធានគ.ជ.បរូបនេះ អះអាងថា លោកនឹងចុះចេញពីតួនាទី ។
តាមរយៈសេចក្តីប្រកាសព័ត៌មានរបស់គ.ជ.ប ដែលបានស្រង់សម្តីលោក ស៊ិក ប៊ុនហុក ក្នុងជំនួបជាមួយប្រតិភូអាមេរិក មកសរសេរដូច្នេះថា៖«ស្ដង់ដារ៣សំខាន់ ក្នុងការរៀបចំការបោះឆ្នោត ដែលទាំងអស់គ្នាអាចទទួលយកបាន គឺត្រូវអនុវត្តការផ្សព្វផ្សាយឱ្យបានទូលំទូលាយដល់ភាគីពាក់ព័ន្ធទាំងអស់ ការបំពេញភារកិច្ចប្រកបដោយវិជ្ជាជីវៈ និងតម្លាភាពការងារ។ ចំណុចទាំង៣នេះ ជាស្ដង់ដារសាកល ដែលគ្មាននរណាម្នាក់បដិសេធទេ ហើយបើខ្ញុំអនុវត្តមិនបាន ខ្ញុំសុខចិត្តដើរចេញពីកន្លែងនេះ»។
អះអាងជំហរខ្លួនបែបនេះហើយ លោក ស៊ិក ប៊ុនហុក ក៏ឆ្លៀតប្រាប់ទៅលោក ប៊ិន ស្ត្រាមែន តំណាងប្រតិភូក្រុមប្រឹក្សាអ្នកដឹកនាំវ័យក្មេងអាមេរិក ក្នុងន័យថា កម្ពុជាចង់រស់នៅក្នុងសុខសន្តិភាព។ «ទុកឱ្យយើងខ្ញុំរស់នៅក្នុងសុខសន្តិភាពដោយឈរលើគោលការណ៍នីតិរដ្ឋ ហើយបើអនុវត្តយ៉ាងដូច្នេះបាន សន្តិភាពនឹងកើតមានពាសពេញពិភពលោក»។ នេះជាការលើកឡើងរបស់ប្រធាន គ.ជ.ប។
ការបោះឆ្នោតជ្រើសរើសតំណាងរាស្ត្រនីតិកាលទី៦ នៅឆ្នាំ២០១៨ កន្លងមក មានប្រជាពលរដ្ឋជាង ៨,៥ លាននាក់ ស្មើនឹង ៨៦, ២៨ ភាគរយ ក្នុងចំណោមអ្នកមានសិទ្ធិបោះឆ្នោតជិត១០លាននាក់ ដែលបានចេញទៅបោះឆ្នោត ។ តួលេខអ្នកចេញទៅបោះឆ្នោតនេះ មានការកើនឡើងបើធៀប ការបោះឆ្នោតកាលពីឆ្នាំ២០១៣ ដែលមានអ្នកទៅបោះចំនួន ៦, ៧៣៥ ,២៤៤នាក់ ស្មើនឹង៦៩,៧១ភាគរយ ក្នុងចំណោមអ្នកមានឈ្មោះក្នុងបញ្ជី ៩ ,៨៧៥ ,៤៥៣នាក់។
ក្នុងដំណើរការបោះឆ្នោត ក៏មានបណ្ដឹងតវ៉ាខ្លះពីគណបក្សដែលចូលរួមប្រកួតប្រជែងបោះឆ្នោតដែរ ប៉ុន្តែបណ្ដឹងទាំងនោះ បានដោះស្រាយទៅវិញ មុននឹងលទ្ធផលជាផ្លូវការ ប្រកាសថា គណបក្សប្រជាជនកម្ពុជា ទទួលបានអាសនៈទាំង១២៥ នៅក្នុងរដ្ឋសភា។
អន្តរជាតិ ហាក់មិនពេញចិត្តចំពោះការបោះឆ្នោតនៅកម្ពុជា ក្នុងអាណត្តិទី៦ កាលពីឆ្នាំ២០១៨ឡើយ។ មិនពេញចិត្ត ក៏ព្រោះតែការបោះឆ្នោតនៅអាណត្តិទី៦ គ្មានវត្តមានអតីតគណបក្សសង្គ្រោះជាតិចូលរួមប្រជែង ដោយសារតែត្រូវបានតុលាការរំលាយ កាលពីថ្ងៃទី១៦ វិច្ឆិកា ឆ្នាំ២០១៧ មុនការបោះឆ្នោតមកដល់។ អន្តរជាតិចេញសេចក្តីថ្លែងការណ៍ជាបន្តបន្ទាប់នៅគ្រានោះ ដោយចាត់ទុកការបោះឆ្នោតនេះ មិនបានឆ្លុះបញ្ចាំង និងបង្ហាញពីឆន្ទៈពលរដ្ឋ ដែលគាំទ្រអតីតគណបក្សសង្គ្រោះជាតិនោះទេ។
ផ្ទុយពីការគិតរបស់អន្តរជាតិនេះ ប្រធាន និងមន្ត្រីគណៈកម្មាធិការជាតិរៀបចំការបោះឆ្នោត បានចេញបកស្រាយជាបន្តបន្ទាប់វិញថា ការរំលាយអតីតគណបក្សសង្គ្រោះជាតិ គឺជាឆន្ទានុសិទ្ធិរបស់តុលាការ ដែលមិនអាចយកបញ្ហានេះ មកផ្សាភ្ជាប់ជាមួយគ.ជ.ប ដែលជាស្ថាប័នរៀបចំដំណើរការបោះឆ្នោតនៅកម្ពុជាបានទេ។ សម្រាប់គ.ជ.ប តួលេខ៨៦, ២៨ ភាគរយ នៃចំនួនអ្នកបោះឆ្នោតនេះ គឺបង្ហាញពីឆន្ទៈរបស់ពលរដ្ឋហើយ៕
![]()
![]()
![]()