លោក សម រង្ស៊ី បកស្រាយថា ចលនាខ្លួន គឺបង្កើតអំណាចពលរដ្ឋ មិនមែនរដ្ឋប្រហារឡើយ
ម្តងជាពីរដង ទាំងនៅតាមវេទិកាជួបជុំអ្នកគាំទ្រនិងតាមរយៈសំណេរលើបណ្តាញសង្គម លោក សម រង្ស៊ី មេដឹកនាំក្រុមប្រឆាំង ព្យាយាមបរិយាយដដែលៗថា ចលនាក៏ដូចជាផែនការវិលត្រឡប់របស់លោកមកកានក់កម្ពុជា នៅថ្ងៃទី៩ ខែវិច្ឆិកា ឆ្នាំ២០១៩ គឺដើម្បីប្រមូលផ្តុំប្រជាពលរដ្ឋ និង ហើយបង្កើតអំណាចប្រជាពលរដ្ឋ ក្នុងការតវ៉ាស្វែងរកសិទ្ធិសេរីភាព។ លោក បដិសេធថា ចលនានេះ មិនមែនជាការធ្វើរដ្ឋប្រហារនោះទេ។
លោក សម រង្ស៊ី បានយកករណីនៅប្រទេសហ្វីលីពីនមកធ្វើជាឧទាហរណ៍។ លោក លើកឡើងថា អំណាចប្រជាពលរដ្ឋ គឺដើម្បីបង្ខំឲ្យជនផ្តាច់ការចុះចេញពីតំណែង ហើយចាកចេញពីប្រទេស ដូចករណីលោក Ferdinand Marcos អតីតប្រធានាធិបតីហ្វីលីពីន ត្រូវបានប្រជាពលរដ្ឋ បណ្តេញចេញពីតំណែង ក្នុងឆ្នាំ១៩៨៦។
មេដឹកនាំក្រុមប្រឆាំងរូបនេះ សរសរលើទំព័រហ្វេសប៊ុក នៅថ្ងៃទី២ ខែតុលា ឆ្នាំ២០១៩ យ៉ាងដូច្នេះថា៖«អំណាចប្រជាពលដ្ឋ មិនមែនជាបដិវត្តន៍ពណ៌ ហើយក៏មិនមែនជារដ្ឋប្រហារ ដូចអ្វីដែលលោក ហ៊ុន សែន អះអាងនោះទេ។ អំណាចប្រជាពលរដ្ឋ គឺជាការប្រមូលផ្តុំប្រជាពលរដ្ឋរាប់លាននាក់ ដែលរដ្ឋអំណាចមិនអនុញ្ញាតឲ្យចូលរួមការបោះឆ្នោតត្រឹមត្រូវ ហើយសម្រេចចេញមុខតវ៉ាដើម្បីជំរុញឲ្យមានការផ្លាស់ប្តូរ តាមបែបបទប្រជាធិបតេយ្យ ដោយអហិង្សា និងស្របច្បាប់ ពីព្រោះជាការប្រើសិទ្ធិស្របច្បាប់របស់ពលរដ្ឋម្នាក់ៗ ក្នុងការសម្តែងមតិ និង ការប្រមូលផ្តុំគ្នាដោយសន្តិវិធី»។
យ៉ាងណាក៏ដោយ លោក សម រង្ស៊ី និង បក្សពួក បានរងការចោទប្រកាន់ពីសំណាក់រដ្ឋាភិបាល និងតុលាការកម្ពុជារួចទៅហើយ ថាបានរៀបចំគម្រោងធ្វើរដ្ឋប្រហារ ដោយត្រូវប្រឈមនឹងការជាប់ពន្ធនាគារពី១៥ឆ្នាំទៅ៣០ឆ្នាំ។ នៅចុងខែតុលា ឆ្នាំ២០១៩ តុលាការនឹងប្រកាសសាលក្រមលើពួកគេ ពាក់ព័ន្ធនឹងបទល្មើសនេះ។
សម្តេចនាយករដ្ឋមន្ត្រី ហ៊ុន សែន ហៅគម្រោងរបស់លោក សម រង្ស៊ី ថា មិនត្រឹមតែជាការធ្វើរដ្ឋប្រហារឬផ្តួលរំលំរដ្ឋាភិបាលនោះទេ តែថែមទាំងមានបំណងប្តូររបបរាជានិយមថែមទាំងទៀត។ ប្រមុខរដ្ឋាភិបាល ប្រកាសថា នឹងចាត់ការលោក សម រង្ស៊ី បើលោក ពិតជាហ៊ានមកកម្ពុជាមែន។ ក្នុងពិធីក្នុងពិធីប្រគល់សញ្ញាបត្រដល់និស្សិតនៃសាកលវិទ្យាល័យប៊ែលធី នៅព្រឹកថ្ងៃទី២ តុលា មេដឹកនាំកម្ពុជា និយាយបែបនេះថា៖«ខ្ញុំ បន់ឲ្យតែដល់ថ្ងៃនោះទេ [៩វិច្ឆិកា]»។
ផែនការរបស់របស់លោក សម រង្ស៊ី និង បក្សពួក ត្រូវបានរដ្ឋាភិបាល ចាត់ទុកថាជាអំពើក្បត់ជាតិ ដែលមិនអាចអត់ឱនឲ្យបាន។ ទន្ទឹមនេះ មានសកម្មជននិងមន្ត្រីនៃអតីតគណបក្សប្រឆាំងប្រមាណជិត២០ហើយ ដែលកំពុងរស់នៅក្នុងប្រទេស បានរងការចោទ ប្រ កាន់ពីបទរួមគំនិតក្បត់ជាតិ ដោយតុលាការលើកហេតុផលថា ពួកគេ បានដើរបញ្ចុះបញ្ចូលប្រជាពល រដ្ឋ ឲ្យត្រៀមទទួលោក សម រង្ស៊ី។ ក្នុងចំណោមសកម្មជនទាំងនោះ មានអ្នកខ្លះ កំពុងជាប់ឃុំ និងអ្នកខ្លះ រត់គេចខ្លួន៕
![]()
![]()
![]()