មេទ័ពត្រៀមទប់ស្កាត់ ការវិលត្រឡប់របស់ លោក សម រង្ស៊ី តែអ្នកនយោបាយខ្លះថាជារឿងតូចតាច
លោក ទៀ បាញ់ រដ្ឋមន្រ្តីក្រសួងការពារជាតិ បានប្រាប់កងយោធពលខេមរភូមិន្ទថា ត្រូវត្រៀមលក្ខណៈឱ្យបានស្រេច ដើម្បីអនុវត្តបទបញ្ជាថ្នាក់លើក្នុងការការពារ និងទប់ស្កាត់ រាល់ការប៉ុនប៉ងផ្តួលរំលំរាជរដ្ឋាភិបាលស្របច្បាប់ដែលកើតចេញពីការបោះឆ្នោត។ នេះបើតាមហ្វេសប៊ុករបស់លោក ទៀ បាញ់។
ការប្តេជ្ញាអនុវត្តបទបញ្ជារបស់ប្រមុខការពារជាតិរូបនេះ គឺបន្ទាប់ពីប្រមុខរដ្ឋាភិបាល សម្តេច ហ៊ុន សែន នៅថ្ងៃទី៧តុលា បានព្រមានថា នឹងបញ្ចេញកម្លាំងទ័ព ហើយអនុញ្ញាតឲ្យប្រើអាវុធទំនើបៗ ដើម្បីទប់ស្កាត់គ្រប់សកម្មភាព ដែលគាំទ្រ លោក សម រង្ស៊ី ក្នុងការវិលចូលស្រុកវិញ ចាប់ពីពេលនេះរហូតដល់ថ្ងៃ៩វិច្ឆិកាខាងមុខ ខណៈលោកបញ្ជាឲ្យបន្តចាប់ខ្លួនសកម្មជនបក្សប្រឆាំងដោយមិនបន្ធូរដៃ។
សម្រាប់ លោកបណ្ឌិត ឡៅ ម៉ុងហៃ «បើការវិលត្រឡប់របស់ សម រង្ស៊ី ជាគ្រោះថ្នាក់ធ្ងន់ធ្ងរដល់ជាតិ ត្រូវប្រកាសដាក់ប្រទេសក្នុងភាពអាសន្ន ដើម្បីអាចរិតត្បិតសិទ្ធិប្រជាពលរដ្ឋ»។ នេះបើតាមហ្វេសប៊ុករបស់លោក។
ចំណែក លោក សម រង្ស៊ី បានសរសេរនៅលើហ្វេសប៊ុកនៅថ្ងៃទី៨តុលា ដោយដកស្រង់ពីសារព័ត៌មាន រ៉យទ័រថា «ការទាមទារឲ្យលោក ហ៊ុន សែន ចុះចេញពីតំណែង គឺជាការទាមទារមួយដ៏ស្របច្បាប់ ពីព្រោះគណបក្សសង្គ្រោះជាតិ ដែលជាគណបក្សប្រឆាំងតែមួយគត់ ត្រូវបានលោក ហ៊ុន សែន រំលាយ ហើយលោក ហ៊ុន សែន មិនយល់ព្រមឲ្យមានការបោះឆ្នោតដោយសេរី និងយុត្តិធម៌ ក្នុងពេលខាងមុខ។ ដូច្នេះ ការងើបឈរដោយប្រជារាស្ត្រ ដើម្បីផ្តួលរំលំរបបផ្តាច់ការ និងខុសច្បាប់សព្វថ្ងៃ គឺជាជម្រើសតែមួយគត់ សម្រាប់អ្នកប្រជាធិបតេយ្យខ្មែរ ដែលចង់បានការផ្លាស់ប្តូរឈានទៅរកលទ្ធិប្រជាធិបតេយ្យ»។
ប៉ុន្តែ គណបក្សប្រជាធិបតេយ្យមូលដ្ឋានវិញ បានចាត់ទុក ការប្រកាសវិលចូលស្រុករបស់ លោក សម រង្ស៊ី ថ្ងៃ៩វិច្ឆិកាថាជា «រឿងតូចតាចមិនសូវបានការបែរជាធ្វើទៅជារឿងធំឱ្យគេចាប់អារម្មណ៍ ធ្វើឱ្យខ្មែរខឹងសម្បារនិងស្អប់ខ្ពើមគ្នា»។
បើតាមគណបក្សប្រជាធិបតេយ្យមូលដ្ឋាន គឺអ្នកនយោបាយខ្មែរ «សូមបញ្ឈប់ធ្វើរឿងអត់ប្រយោជន៍សម្រាប់ជាតិ ព្រោះពេលនេះ ជាពេលដែលខ្មែរត្រូវខំប្រឹងអភិវឌ្ឍខ្លួន រាជរដ្ឋាភិបាលត្រូវយកចិត្តទុកដាក់ផ្តល់សេវាសាធារណៈល្អនិងសហការគ្នាកសាងមោទនភាពជាតិខ្មែរឡើងវិញ»។ ការលើកឡើងយ៉ាងដូច្នេះរបស់គណបក្សនេះ គឺស្របពេលគណបក្សប្រជាធិបតេយ្យមូលដ្ឋានបានចេញសេចក្តីថ្លែងការណ៍មួយផ្សេងទៀតដោយសំដែងក្តីបារម្ភពីរឿងចុះហត្ថលេខាទទួលស្គាល់ការបោះបង្គោលព្រំដែនកម្ពុជានិងវៀតណាមបាន៨៤%ថាធ្វើឡើងដោយមិនបានឆ្លុះបញ្ចាំងពីការឯកភាពជាតិខ្មែរ៕
![]()
![]()
![]()