ក្រុមហ៊ុនបញ្ជាទិញធំពីរព្រមានដកខ្លួនពីកម្ពុជាងាកទៅប្រទេសដទៃប្រសិនបើ EBA បាត់បង់
ក្រុមហ៊ុនបញ្ជាទិញផលិតផលកាត់ដេរធំៗរបស់អឺរ៉ុប បានព្រមានថា ពួកគេនឹងដកអាជីវកម្មរបស់ពួកគេពីប្រទេសកម្ពុជា ហើយងាកទៅរកប្រទេសដទៃទៀតនៅក្នុងតំបន់ ប្រសិនបើប្រព័ន្ធអនុគ្រោះពាណិជ្ជកម្មដែលអឺរ៉ុបផ្ដល់មកកម្ពុជា ត្រូវបានដកហូតនាពេលខាងមុខនេះ។
ប្រព័ន្ធអនុគ្រោះពាណិជ្ជកម្ម «អ្វីគ្រប់យ៉ាងលើកលែងតែអាវុធ» ឬហៅកាត់ថា EBA សម្រាប់ប្រទេសកម្ពុជា កំពុងស្ថិតក្នុងភាពមិនច្បាស់លាស់ បន្ទាប់ពីសហភាពអឺរ៉ុបបានចាប់ផ្ដើមនីតិវិធីត្រួតពិនិត្យឡើងវិញនៅដើមឆ្នាំនេះ ជុំវិញការធ្លាក់ចុះការគោរពសិទ្ធិមនុស្ស និងលទ្ធិប្រជាធិបតេយ្យនៅកម្ពុជា។
ខណៈដែលប្រព័ន្ធអនុគ្រោះពាណិជ្ជកម្មស្ថិតក្នុងស្ថានភាពមិនទាន់ច្បាស់លាស់នៅឡើយនោះ ក្រុមហ៊ុនបញ្ជាទិញធំៗរបស់អឺរ៉ុប បានជួបប្រជុំគ្នានៅក្នុង «កិច្ចប្រជុំកំពូលឧស្សាហកម្មវាយនភណ្ឌអាស៊ីអាគ្នេយ៍ឆ្នាំ២០១៩» ដែលត្រូវបានរៀបចំធ្វើឡើងនៅរាជធានីភ្នំពេញ កាលពីចុងខែតុលាកន្លងមកនេះ។
ក្នុងវេទិកានោះ តំណាងក្រុមហ៊ុនបញ្ជាទិញ Primark និងក្រុមហ៊ុន H&M បានផ្ដល់កិច្ចសម្ភាសដល់ទីភ្នាក់ងារព័ត៌មាន Reuters ដោយបានព្រមានអំពីការបាត់ការងារសម្រាប់កម្មករកម្ពុជារាប់ម៉ឺននាក់ ប្រសិនបើ EBA ត្រូវបានដកហូតមែននោះ។
ប្រធានផ្នែកផលិតកម្មនៃក្រុមហ៊ុន H&M លោក David Savman ត្រូវបានដកស្រង់សម្ដីដោយ Reuters ដែលបាននិយាយថា ក្រុមហ៊ុនមួយនេះនឹងកាត់បន្ថយការបញ្ជាទិញពីកម្ពុជា ហើយងាកទៅរកប្រទេសចិន និងឥណ្ឌូនេស៊ីជំនួសមកវិញ ប្រសិនបើប្រព័ន្ធអនុគ្រោះពាណិជ្ជកម្មសម្រាប់កម្ពុជា ត្រូវបានបញ្ចប់។
H&M គឺជាក្រុមហ៊ុនលក់រាយសម្លៀកបំពាក់របស់ប្រទេសស៊ុយអែត ដែលមានហាងលក់សម្លៀកបំពាក់ជាច្រើនប្រទេសនៅជុំវិញពិភពលោក។
លោក David Savman ត្រូវបានដកស្រង់សម្ដីបន្តថា ក្រុមហ៊ុន H&M បញ្ជាទិញផលិតផលកាត់ដេរពីរោងចក្រប្រហែល ៥០នៅក្នុងប្រទេសកម្ពុជា។
តំណាងក្រុមហ៊ុន Primark ប្រចាំនៅចក្រភពអង់គ្លេស Xiaoxu Liu ដែលទទួលបន្ទុកលើការបញ្ជាទិញនៅប្រទេសចិន និងតំបន់អាស៊ីអាគ្នេយ៍ ត្រូវបានដកស្រង់សម្ដីដោយទីភ្នាក់ងារព័ត៌មាន Reuters ផងដែរ ដែលបាននិយាយថា ការបន្តធ្វើអាជីវកម្មនៅក្នុងប្រទេសកម្ពុជាដោយគ្មានប្រព័ន្ធអនុគ្រោះពាណិជ្ជកម្មនោះ នឹងក្លាយជា«ឧបសគ្គដ៏ធំមួយ»។
បើតាម Reuters ដែលបានសម្ភាស Xiaoxu Liu ឱ្យដឹងថា ក្រុមហ៊ុន Primark បានបញ្ជាទិញផលិតផលកាត់ដេរពីរោងចក្រប្រហែល ២០នៅក្នុងប្រទេសកម្ពុជា។
លោក Ken Loo អគ្គលេខាធិការសមាគមរោងចក្រកាត់ដេរនៅកម្ពុជា (GMAC) បានប្រាប់ថា ក្រុមហ៊ុន H&M គឺជាអ្នកបញ្ជាទិញផលិតផលកាត់ដេរដ៏ធំមួយពីប្រទេសកម្ពុជា។
តំណាង GMAC រូបនេះ បានប្រាប់ថា ការព្រមានពីតំណាងក្រុមហ៊ុនបញ្ជាទិញទាំងនោះ គឺជាសិទ្ធិរបស់ពួកគេ។
នៅពេលត្រូវបានសាកសួរអំពីអនាគតនៃឧស្សាហកម្មកាត់ដេរកម្ពុជានាពេលអនាគតនោះ ក្រោយពីក្រុមហ៊ុនបញ្ជាទិញព្រមានបែបនេះនោះ លោក Ken Loo ប្រាប់ថា៖ «យើងរង់ចាំមើលអ្វីៗឱ្យប្រាកដសិន មុននឹងសម្រេចចិត្តអំពីផែនការអនាគត»។
លោក Ken Loo ត្រូវបានដកស្រង់សម្ដីដោយ Reuters ដែលបាននិយាយថា៖ «អ្នកអាចឃើញរួចហើយនូវផលប៉ះពាល់ នេះគ្រាន់តែមានការគំរាមកំហែងដកហូតប៉ុណ្ណោះ»។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បានចាត់ទុកការលើកឡើងរបស់ក្រុមហ៊ុនបញ្ជាទិញទាំងនោះថា បាននិយាយដើម្បីធ្វើឱ្យសាធារណជនមើលឃើញថា ម៉ាកយីហោរបស់ពួកគេល្អ។
លោក ហេង សួរ ប្រាប់ថា៖ «ប្រសិនបើគេដកចេញ គេនឹងក្លាយទៅជាម៉ាកដែលយកប្រាក់ចំណេញជាត្រីមុខ […] គាត់អាចនិយាយគ្រប់រឿងដែលមើលទៅឱ្យឃើញម៉ាកគាត់ល្អប៉ុណ្ណោះ»។
ប្រធានសហភាពការងារកម្ពុជា លោក អាត់ ធន់ បានឱ្យដឹងថា តួនាទីរបស់ក្រុមហ៊ុន H&M និងក្រុមហ៊ុន Primark មានសារសំខាន់សម្រាប់ឧស្សាហកម្មកាត់ដេរកម្ពុជា ដោយសារតែទំហំនៃការបញ្ជាទិញរបស់ក្រុមហ៊ុនទាំងពីរនេះ មានទំហំខ្ទង់ ១០ភាគរយនៃការបញ្ជាទិញផលិតផលកាត់ដេរទាំងមូលពីប្រទេសកម្ពុជា។
លោក អាត់ ធន់ ប្រាប់ថា៖ «អញ្ចឹង បើក្រុមហ៊ុនពីរនេះមានការព្រមាន វាមិនមែនជារឿងល្អសម្រាប់វិស័យឧស្សាហកម្មកាត់ដេរទេ ក្នុងករណីយើងអត់មាន EBA។ អញ្ចឹង ខ្ញុំគិតថា វាកាន់តែបញ្ជាក់ឱ្យឃើញថា ការព្រួយបារម្ភរបស់អ្នកបញ្ជាទិញ និងអ្នកពាក់ព័ន្ធផ្សេងៗហ្នឹង វាអាចនឹងជះឥទ្ធិពលមិនល្អ ក្នុងករណីដែលយើងអត់មាន EBA ហ្នឹងឯងនាពេលខាងមុខ»។
កាលពីខែឧសភាកន្លងមក ក្រុមហ៊ុនអន្តរជាតិធំៗចំនួន ២០ដែលបញ្ជាទិញផលិតផលកាត់ដេរពីប្រទេសកម្ពុជា បានផ្ញើលិខិតមួយទៅលោកនាយករដ្ឋមន្ត្រី ហ៊ុន សែន ដោយបានបង្ហាញរួចមកហើយនូវក្ដីបារម្ភរបស់ខ្លួនអំពីផលប៉ះពាល់នៃការបាត់បង់ប្រព័ន្ធអនុគ្រោះពន្ធ EBA មកលើកម្មករ និងគ្រួសាររបស់ពួកគេ។
សហភាពអឺរ៉ុបនឹងសម្រេចថា ដក ឬមិនដក EBA សម្រាប់ប្រទេសកម្ពុជានៅក្នុងខែកុម្ភៈឆ្នាំក្រោយ បន្ទាប់ពីខ្លួនបានបញ្ជូនរបាយការណ៍វាយតម្លៃបឋមមួយមករដ្ឋាភិបាលកម្ពុជារួចរាល់ហើយកាលពីដើមសប្ដាហ៍នេះ ដែលរបាយការណ៍នោះជាលទ្ធផលនៃការស៊ើបអង្កេតលើក្ដីកង្វល់ជុំវិញអ្វីដែលសហភាពអឺរ៉ុបហៅថា ការធ្លាក់ចុះការគោរពសិទ្ធិមនុស្ស និងលទ្ធិប្រជាធិបតេយ្យនៅកម្ពុជា៕
![]()
![]()
![]()