ពលរដ្ឋខ្មែរនៅកូរ៉េដែលគាំទ្របក្សប្រឆាំងធ្វើបាតុកម្មទាមទារឲ្យស្តារលទ្ធិប្រជាធិបតេយ្យនៅកម្ពុជា
ដូចការគ្រោងទុកក្រុមពលរដ្ឋខ្មែរដែលភាគច្រើនគឺជាយុវជនដែលគាំទ្រគណបក្សប្រឆាំងបាននាំគ្នាធ្វើបាតុកម្មនៅថ្ងៃអាទិត្យនេះនៅកូរ៉េខាងត្បូង ដោយមានអ្នកចូលរួមប្រមាណជាង២០០នាក់។ ជាបាតុកម្មដែលត្រូវបានអ្នករៀបចំអះអាងថា ដើម្បីបង្ហាញទៅសហគមន៍អន្តរជាតិពីបញ្ហាកំពុងកើតឡើងនៅប្រទេសកម្ពុជា និងទាមទារឲ្យស្តារលទ្ធិប្រជាធិបតេយ្យឡើងវិញ។
ការធ្វើបាតុកម្មរបស់ពលរដ្ឋខ្មែរនៅទីក្រុងភូសាន់ ប្រទសកូរ៉េខាងត្បូងដែលមានគ្នាប្រមាណជាង២០០នាក់(បើតាមអ្នករៀបចំ)នៅថ្ងៃអាទិត្យនេះ គឺស្របពេលប្រទេសកូរ៉េធ្វើជាម្ចាស់ផ្ទះនៃកិច្ចប្រជុំកំពូលអាស៊ានកូរ៉េនៅថ្ងៃចន្ទស្អែកនេះ។
លោក យឹម ស៊ីណន ជាអ្នករៀបចំបាតុកម្មនេះបានថ្លែងថា ការធ្វើបាតុកម្មនេះគឺចង់បង្ហាញទៅសហគមន៍អន្តរជាតិពីបញ្ហាកំពុងកើតឡើងនៅប្រទេសកម្ពុជា ដែលមានការរំលាយគណបក្សសង្រ្គោះជាតិ និងការចាប់ខ្លួនលោក កឹម សុខា ដាក់ពន្ធនាគារ និងលោក សម រង្ស៊ី ត្រូវនិរទេសខ្លួន។ បើតាម លោក យឹម ស៊ីណន បាតុកម្មនេះក៏ទាមទារឲ្យប្រទេសកម្ពុជាមានការរៀបចំការបោះឆ្នោតឡើងវិញនៅពេលខាងមុខផងដែរ។
សូមបញ្ជាក់ថា សម្តេចនាយករដ្ឋមន្ត្រី ហ៊ុន សែន បានលុបចោលគម្រោងទៅចូលរួមកិច្ចប្រជុំកំពូលអាស៊ាន-កូរ៉េ នៅពេលនេះដោយសារតែម្ដាយក្មេករបស់លោកកំពុងស្ថិតនៅសង្គ្រោះបន្ទាន់ និងពិនិត្យឃើញថា ពិបាកនឹងសង្គ្រោះបាន។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានអះអាងថា ចំនួនបាតុករដែលធ្វើបាតុកម្មគឺតិចជាងចំនួនពលរដ្ឋដែលគាំទ្រ លោកនាយករដ្ឋមន្ត្រី ហ៊ុន សែន។ លោកថ្លែងថាអ្នកដែលធ្វើបាតុកម្មគឺជាអ្នកដែលមិនយល់ពីលទ្ធិប្រជាធិបតេយ្យ។ លទ្ធិប្រជាធិបតេយ្យនៅកម្ពុជាដែលលោក សុខ ឥសាន អះអាងថា បានផ្តល់ឱកាសឲ្យយុវជនទាំងនោះបានទៅធ្វើការនៅក្រៅប្រទេសដូចពេលនេះ។
យ៉ាងណាក៏ដោយ លោក យឹម ស៊ីណន ជាអ្នករៀបចំបាតុកម្មបានថ្លែងថា ចំនួនមនុស្សចូលរួមតិចឬច្រើនមិនសំខាន់នោះទេ។ អ្វីដែលសំខាន់គឺខ្លឹមសារនៃបាតុកម្ម ដែលទាមទារឲ្យស្តារលទ្ធិប្រជាធិបតេយ្យឲ្យរស់ឡើងវិញនៅកម្ពុជា។
ទោះជាយ៉ាងណា ការដែលចំនួនបាតុករចូលរួមតិចនៅពេលធ្វើបាតុកម្មរបស់ពលរដ្ឋខ្មែរនៅកូរ៉េលើកនេះ ត្រូវបានគេមើលឃើញថា ទំនងមកពីក្រុមអ្នកគាំទ្រអតីតគណបក្សសង្គ្រោះជាតិនៅប្រទេសនេះមានការបែងចែកគ្នាពីរក្រុម៕
![]()
![]()
![]()