ផ្ទេរតំណែងប្រធានប៉ុស្តិ៍អន្តោប្រវេសន៍ ច្រកប៉ោយប៉ែត ទៅច្រកអូរយ៉ាដាវវិញ

បន្ទាយមានជ័យ៖ លោកវរសេនីយ៍ឯក ខឹម ចិត្រា អត្ថលេខ ២០៧៥៧ ទើបតែបានឡើងកាន់តំណែង នៅខែមករា២០១៩កន្លងទៅនេះ ត្រូវបានផ្លាស់ប្ដូរពីនាយប៉ុស្តិ៍នគរបាលអន្តោប្រវេសន៍ ច្រកទ្វាព្រំដែនអន្តរជាតិប៉ោយប៉ែត នៃនាយកដ្ឋានច្រកទី១ ទៅជានាយប៉ុស្តិ៍នគរបាលអន្តោប្រវេសន៍ ច្រកព្រំដែនអន្តរជាតិអូរយ៉ាដាវ នៃនាយកដ្ឋានច្រកទ្វារទី ២។ ហើយលោកឧត្តមសេនីយ៍ត្រី អុី ចំរើន អត្តលេខ៥៨៥៩១ ត្រូវបានផ្លាស់ប្ដូរពីនាយប៉ុស្តិ៍នគរបាលច្រកទ្វាព្រំដែនអន្តរជាតិអូរយ៉ាដាវ មកជានាយប៉ុស្តិ៍នគរបាល ច្រកទ្វាព្រំដែនអន្តរជាតិប៉ោយប៉ែត ជំនួសលោក ខឹម ចិត្រា វិញ។

 

សូមបញ្ជាក់ថា លោក ខឹម ចិត្រា ត្រូវបានប្រកាសទទួលមុខតំណែងជានាយប៉ុស្តិ៍នគរបាល អន្តោរប្រវេសន៍ច្រកទ្វារព្រំដែនអន្តរជាតិប៉ោយប៉ែត ច្រកទ្វាទី១នៃអគ្គនាយកដ្ឋានអន្តោប្រវេសន៍ ជំនួសលោកឧត្តមសេនីទោ សុឹម សំអាត កាលពីរសៀលថ្ងៃទី១៧ ខែមករា ឆ្នាំ២០១៩ កន្លងទៅ មកដល់ពេលនេះមិនដល់១ឆ្នាំផង បែរជាផ្លាស់ប្តូរចេញបាត់ មិនដឹងថាលោកមានស្នាដៃល្អ ឬក៏មានកំហុសអ្វីនោះទេ។

 

ការសម្រេចផ្លាស់ប្តូរនេះ ធ្វើឡើងតាមប្រកាស១២៦ ៨៤ប្រក របស់ក្រសួងមហាផ្ទៃ ចុះថ្ងៃទី០៧ ខែធ្នូ ឆ្នាំ២០១៩នេះ ដែលចុះហត្ថលេខាដោយ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ៕