សកម្មភាពទន្ទ្រានកាន់កាប់ដីព្រៃរបស់រដ្ឋកើតឡើងយ៉ាងរាលដាលនៃសង្កាត់ស្មាច់មានជ័យ ខេត្តកោះកុង
ខេត្តកោះកុង: ប្រជាពលរដ្ឋអំពាវនាវដល់លោកស្រី មិថុនា ភូថង អភិបាលខេត្តកោះកុង ឲ្យចាត់វិធានការទប់ស្កាត់ជាបន្ទាន់ព្រោះបច្ចុប្បន្នមានមន្ត្រីពុករលួយឃុបឃិតគ្នាលក់ដូរដីព្រៃរបស់រដ្ឋ ហើយនាំគ្នាទន្ទ្រានកាន់កាប់យ៉ាងអនាធិបតេយ្យប្រភពពីប្រជាពលរដ្ឋរស់នៅភូមិ៣ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង បានឲ្យដឹងថា បច្ចុប្បន្នដីព្រៃរបស់រដ្ឋដែលនៅក្រោមការគ្រប់គ្រងរបស់ខណ្ឌរដ្ឋបាលព្រៃឈើខេត្តកោះកុង កំពុងត្រូវអ្នកមានលុយ អ្នកមានអំណាច ទន្ទ្រានកាន់កាប់ជាកម្មសិទ្ធិឯកជនយ៉ាងគឃ្លើន។ ជុំវិញបញ្ហាខាងលើនេះប្រជាពលរដ្ឋបានលើកឡើងថា ប្រសិនបើគ្មានការឃុបឃិតពីប្រធានមន្ទីរពាក់ព័ន្ធនិងមន្ត្រីអាជ្ញាធរមូលដ្ឋានទេនោះ គឺគ្មាននរណាអាចទន្ទ្រានកាន់កាប់ដីព្រៃរបស់រដ្ឋយកធ្វើជាកម្មសិទ្ធិបានឡើយ។ ប្រភពពីប្រជាពលរដ្ឋក្នុងសង្កាត់ស្មាច់មានជ័យ បានឲ្យដឹងថា អ្នកទន្ទ្រានកាន់កាប់ដីព្រៃរបស់រដ្ឋដែលនៅក្រោមការគ្រប់គ្រងរបស់រដ្ឋបាលព្រៃឈើខេត្តកោះកុង មានឈ្មោះ សុខ រដ្ឋា ដែលជាមន្ត្រីយោធា ហើយមានឈ្មោះ ហេង ផាន ទទួលខុសត្រូវក្នុងការពុះជាដីឡូត៍លក់យ៉ាងរលូន។ ចំណែកប្រធានមន្ទីរកសិកម្មខេត្តកោះកុង ក៏ដូចជាមេរដ្ឋបាលព្រៃឈើខេត្តកោះកុង បែរជារក្សាភាពស្ងៀមស្ងាត់មិនចាត់វិធានការទប់ស្កាត់បទល្មើសដែលកំពុងកើតឡើងយ៉ាងរាលដាលនោះទេ។ ហេតុនេះហើយទើបមានការសង្ស័យថា ប្រធានមន្ទីរកសិកម្មខេត្តកោះកុង និងមេរដ្ឋបាលព្រៃឈើខេត្តកោះកុង ជាអ្នកឃុបឃិតឲ្យជនល្មើសទន្ទ្រានកាន់កាប់ដីព្រៃឈើរបស់រដ្ឋក្នុងភូមិ៣ សង្កាត់ស្មាច់មានជ័យ ក្រុងខេមរភូមិន្ទ យ៉ាងអនាធិបតេយ្យដូចសព្វថ្ងៃនេះ។ តាមសេចក្ដីរាយការណ៍ពីប្រជាពលរដ្ឋក្នុងភូមិ៣ សង្កាត់ស្មាច់មានជ័យ បានឲ្យដឹងថា បច្ចុប្បន្នក្រុមជនល្មើសកំពុងបន្តសកម្មភាពទន្ទ្រានកាន់កាប់ដីព្រៃរបស់រដ្ឋយ៉ាងគឃ្លើនដោយគ្មានញញើតអ្វីទាំងអស់ ព្រោះមានការឃិបឃិតជាប្រព័ន្ធពីសំណាក់ក្រុមមន្ត្រីពុករលួយ។ ដូច្នេះលោកស្រី មិថុនា ភូថង អភិបាលខេត្តកោះកុង មិនគួរបណ្ដែត បណ្ដោយតទៅទៀតទេ ហើយត្រូវចាត់វិធានការទប់ស្កាត់ប្រកបដោយប្រសិទ្ធភាព ក៏ដូចជាចាត់ការទៅលើក្រុមមន្ត្រីខិលខូចដោយមិនត្រូវមើលលើកលែងដល់ពួកគេឡើយ។ បើមិនដូច្នេះទេដីព្រៃរបស់រដ្ឋក្នុងសង្កាត់ស្មាច់មានជ័យ ក្រុងខេមរភូមិន្ទ ត្រូវក្រុមជនល្មើសធ្វើសកម្មភាពទន្ទ្រានកាន់កាប់ជាកម្មសិទ្ធិឯកជនតាមអំពើចិត្តជាមិនខាន ព្រោះមន្ត្រីអាជ្ញាធរមូលដ្ឋាននិងប្រធានមន្ទីរពាក់ព័ន្ធត្រូវបានគេដឹងថា ជាអ្នកឃុបឃិតឲ្យមានបទល្មើសដើម្បីជាថ្នូរនឹងផលប្រយោជន៍ផ្ទាល់ខ្លួន។ ជាក់ស្ដែងឈ្មោះ សុខ រដ្ឋា ដែលជាមន្ត្រីយោធា និងឈ្មោះ ហេង ផាន កំពុងធ្វើសកម្មភាពទន្ទ្រានកាន់កាប់ដីព្រៃរបស់រដ្ឋក្នុងភូមិ៣ សង្កាត់ស្មាច់មានជ័យ ដោយគ្មានញញើតអ្វីទាំងអស់៕
![]()
![]()
![]()