មន្ត្រីបំរើរាស្ត្រ សាលាក្រុង ដូនកែវ ខេត្តតាកែវ ចង់ប្រែក្លាយយករាស្ត្រជាសត្រូវ !

កាលពីថ្ងៃទី ២៨ ខែកុម្ភៈ ឆ្នាំ២០១៩ ពលរដ្ឋរិះគន់ មន្រ្តីទទួលបន្ទុកការងារ អាត្រានុគោលដ្ឋាន សាលាក្រុងដូនកែវ ខេត្តតាកែវ ថា មានអាកប្បកិរិយាមិនសមរម្យចំពោះរាស្រ្ត ខេត្តតាកែវ ។  ពលរដ្ឋដែលមានលំនៅដ្ឋាននៅក្រុងដូនកែវ ខេត្តតាកែវ បានសំដែងការមិនពេញចិត្តចំពោះការបំរើសេវា សាធារណៈរបស់មន្រ្តីការិយាល័យរដ្ឋបាលដែលទទួលបន្ទុកធ្វើសេចក្តីចំលងឬ កែតម្រូវ អត្រានុគោលដ្ឋាន នៃសាលាក្រុងដូនកែវ ខេត្តតាកែវ។ ពលរដ្ឋបានរិះគន់ចំៗថា ពួកគាត់តែងទទួលអារម្មណ៍ក្តៅក្រហាយ ខឹងសម្បារ ចំពោះអកប្បកិរិយា មិនចង់ផ្តល់សេវាសាធារណៈជូនរាស្រ្តរបស់មន្រ្តីទាំងនោះ ដោយពួកគេមានសំដីគំរោះគំរើយ អាកប្បកិរិយាទ្រគោះបោះបោក ធ្វើព្រងើយកន្តើយ ព្រមទាំងមានភាពយឺតយ៉ាវ សាំញាំច្រើន មិនបានបង្ករលក្ខណៈងាយស្រួលដល់ពលរដ្ឋដែលមករកសេវាឡើយ ពួកគាត់ពិបាកនឹងពលរដ្ឋទទួលយកបានណាស់។ ពួកគាត់បានបន្ថែមថា ពេលពួកគាត់យកអាត្រានុគោលដ្ឋានទៅធ្វើសេចក្តីចម្លងឬកែរតម្រូវ នៅការិយាល័យរដ្ឋបាលសាលាក្រុងដូនកែវ ដូចទៅរង់ចាំ សុំភ្លើងយក្សចឹង។ គួរបញ្ជាក់ផងដែរថា ថ្មីៗនេះទើបតែមានការផ្លាស់ប្តូរ អភិបាលក្រុងដូនកែវ ដោយលោក មូល វិចិត្រ អតីតអភិបាលក្រុងដូនកែវ ត្រូវបានតែងតាំងជាអភិបាលរងខេត្តតាកែវ ហើយ លោក កង អាណាន់ អភិបាលរងក្រុងដូនកែវ ត្រូវបានតែងតាំងជាអភិបាលក្រុងដូនកែវផងដែរ។ ពលរដ្ឋសូមសំណូមពរដល់ លោក កង អាណាន់ អភិបាល ក្រុងដូនកែវ ដែលទើបតែងតាំងថ្មី សូមជួយពិនិត្យការងារកូនចៅក្រោមឱវាទ របស់សាលាក្រុងដូនកែវ ឡើងវិញ ផង ដើម្បីអនុវត្តគោលនយោបាយរបស់រាជរដ្ឋាភិបាលអោយបានល្អក្នុងការបំរើសេវាសាធារណៈជូនពលរដ្ឋក្នុងមូលដ្ឋាន និងបញ្ចប់ភាពថ្នាំងថ្នាក់របស់ពលរដ្ឋ ចំពោះអាជ្ញាធរមូលដ្ឋាន។ ពាក់ព័ន្ធនឹងការរិះគន់ខាងលើ អ្នកសារព័ត៍មានយើងមិនទាន់អាចសុំការស្រាយបំភ្លឺពីអាជ្ញាធរពាក់ព័ន្ធនៃសាលាក្រុងដូនកែវបាននៅឡើយទេ៕