អ្នកជំនាញសិទ្ធិមនុស្ស អ.ស.ប នឹងមកបំពេញទស្សនកិច្ចជាថ្មី នៅកម្ពុជា ចាប់ពីថ្ងៃទី២៩ ខែមេសា ឆ្នាំ២០១៩ ដល់ថ្ងៃទី០៩ ខែឧសភា ឆ្នាំ២០១៩នេះ ។
ភ្នំពេញ៖ អ្នករាយការណ៍ពិសេសអង្គការ សហប្រជាជាតិ ទទួលបន្ទុកសិទ្ធិមនុស្ស ប្រចាំកម្ពុជា លោកស្រី រ៉ូណា ស្មីត នឹងមកបំពេញទស្សន កិច្ចនៅប្រទេសកម្ពុជា ចាប់ពីថ្ងៃទី២៩ ខែមេសា ដល់ថ្ងៃទី០៩ ខែឧសភា ឆ្នាំ២០១៩។ ដំណើរទស្សនកិច្ចជាថ្មី នៅកម្ពុជា របស់លោកស្រី រ៉ូណាល់ ស្មីត លើកនេះ តាមការអញ្ជើញ របស់រាជរដ្ឋាភិបាល។ នេះបើតាមសេចក្តីប្រកាស។
សេចក្តីប្រកាសព័ត៌មាន របស់អង្គការសហប្រជាជាតិ បង្ហាញថា លោក ស្រី ស្មីត បានមានប្រសាសន៍ថា “ខ្ញុំនឹងផ្តោតបេសកកម្មរបស់ ខ្ញុំ ទៅ លើស្ថានភាព សិទ្ធិមនុស្ស នាពេលបច្ចុប្បន្ន និងតាមដានពីដំណើរវិវត្តន៍នានា ចាប់តាំងពីបេសកកម្មរបស់ខ្ញុំ កាលពីខែវិច្ឆិកាកន្លងមក។
លោកស្រី ស្មីត លើកឡើងថា “ខ្ញុំមានបំណងបន្តការ ពិនិត្យផងដែរ ទៅលើវិស័យសិទិ្ធមនុស្ស ទាក់ទងនឹងគោលដៅអភិវឌ្ឍន៍ ប្រកបដោយចីរភាព ដោយពិនិត្យជាពិសេសទៅលើការមិនរើសអើង និងសមភាព ព្រមទាំងការចូលរួម និងគណនេយ្យភាព ។
សេចក្តីប្រកាសបន្តថា ក្នុងអំឡុងពេលដំណើរ ទស្សនកិច្ចរយៈពេល ១១ ថ្ងៃ អ្នកជំនាញរូបនេះ គ្រោងជួបប្រជុំ ជាមួយមន្ត្រីជាន់ខ្ពស់របស់រដ្ឋាភិ បាល តំណាងសង្គមស៊ីវិល និងសមាជិកសហគមន៍ការទូតនានា ។ លោកស្រី ស្មីត នឹងបំពេញទស្សនកិច្ចផងដែរ ទៅតាមតំបន់ផ្សេងដើម្បី ប្រមូលព័ត៌មានដោយផ្ទាល់។
សេចក្តីប្រកាសបន្តថា អ្នករាយការណ៍ ពិសេស អ.ស.ប បំពេញបេសក កម្មផ្លូវការ ជាប្រចាំមកកាន់ប្រទេសកម្ពុជា និងធ្វើរបាយការណ៍ប្រចាំឆ្នាំ ទៅក្រុមប្រឹក្សាសិទ្ធិមនុស្ស ដែលក្រុមប្រឹក្សានេះ បានតែងតាំងលោក ស្រី នៅក្នុងខែមីនា ឆ្នាំ២០១៥ ។ លោកស្រីនឹងបង្ហាញរបាយការណ៍ បន្ទាប់របស់លោកស្រី ទៅក្រុមប្រឹក្សាសិទ្ធិមនុស្សក្នុងខែកញ្ញា ឆ្នាំ២០១៩
អ្នកស្រី ស្មីត នឹងបញ្ចប់ដំណើរទស្សនកិច្ចរបស់ លោកស្រី ដោយមានធ្វើសន្និសីទ សារព័ត៌មានមួយ ដើម្បីពិភាក្សាអំពី លទ្ធផលស្រាវជ្រាវបឋមនៃដំណើរ ទស្សនកិច្ចរបស់លោកស្រី ដែលសន្និសីទនេះ នឹងប្រ ព្រឹត្តទៅ នៅថ្ងៃព្រហស្បតិ៍ ទី០៩ ខែឧសភា នៅវេលាម៉ោង ០៣:០០ រសៀល ម៉ោងក្នុងស្រុក នៅការិយាល័យ ឧត្តមស្នងការអង្គការសហ ប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា ដែលមានអាសយដ្ឋាន នៅអគារលេខ៤ ផ្លូវលេខ២៧១ ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
អង្គការសហប្រជាជាតិ បង្ហាញថា សាស្ត្រាចារ្យ រ៉ូណា ស្មីត ជនជាតិអង់គ្លេស ត្រូវបានក្រុមប្រឹក្សាសិទ្ធិមនុស្ស អ.ស.ប តែងតាំងជាអ្នករាយ ការណ៍ពិសេស ស្តីពីស្ថានភាពសិទ្ធិមនុស្សនៅកម្ពុជាក្នុងខែ មីនា ឆ្នាំ ២០១៥ ។
អ្នករាយការណ៍ពិសេស គឺជាផ្នែកមួយនៃអ្វី ដែលគេស្គាល់ថា ជានីតិវិធីពិសេសរបស់ក្រុម ប្រឹក្សាសិទ្ធិមនុស្ស។ នីតិវិធីពិសេស (ស្ថាប័នដ៏ធំបំផុតមួយនៃអ្នកជំនាញ ឯករាជ្យនៅក្នុងប្រព័ន្ធ សិទ្ធិមនុស្ស អ.ស.ប) គឺជាឈ្មោះទូទៅមួយ នៃយន្តការឃ្លាំមើល និងស្វែងរកការពិតឯករាជ្យរបស់ ក្រុមប្រឹក្សានេះ។ អ្នកកាន់អាណត្តិនីតិវិធីពិសេស គឺជាអ្នកជំនាញឯករាជ្យ ដែលក្រុមប្រឹក្សាសិទ្ធិមនុស្ស បានតែងតាំងឡើង ដើម្បីធ្វើការងារពាក់ ព័ន្ធ នឹងស្ថានភាពសិទ្ធិមនុស្សរបស់ប្រទេសមួយជាក់លាក់ ឬបញ្ហាសិទ្ធិ មនុស្សតាម វិស័យនីមួយៗ នៅគ្រប់តំបន់ទាំងអស់នៃពិភពលោក ។ ពួកគាត់មិនមែនជាបុគ្គលិក អ.ស.ប ទេ ហើយធ្វើការឯករាជ្យពី រដ្ឋាភិ បាល ឬអង្គការណាមួយ។ ពួកគាត់បម្រើការក្នុងសមត្ថភាព បុគ្គលផ្ទាល់របស់ខ្លួន ហើយមិនទទួលប្រាក់បៀរវត្សរ៍ លើការងារនេះឡើយ ៕
