លោក ហាក់ សាខន និងលោកញឹម វណ្ណៈ ថ្លើមធំរួមដៃគ្នាហ៊ានប្រព្រឹត្តិបទល្មើសព្រៃឈើ ក្នុងដែនជម្រកសត្វព្រៃភ្នំព្រេច ដែលខ្លួនកំពុងមានតួរនាទីការពារ ។
មណ្ឌលគិរីៈ លោក ហាក់ សាខន ជាប្រធាន និងលោកញ៉ឹម វណ្ណៈ ជាអនុប្រធានដែនជម្រកសត្វព្រៃភ្នំព្រេច ខេត្តមណ្ឌលគិរី បានដឹកជញ្ជូនឈើចេញពីតំបន់ព្រៃការពារប្រមាណជា ៣០ម៉ែត្រគូប ធ្វើឲ្យភ្ជាក់ផ្អើលដល់អាជ្ញាធរ និងប្រជាពលរដ្ឋនៅក្នុងតំបន់។ ឈើកម្រជាច្រើនប្រភេទ ប្រវែងជាង១០ម៉ែតឡើង និងឈើសរសរផ្ទះមុខធំៗ រួមនិងគ្រឿងសង្ហារឹមប្រណិតៗ ដែលលោក ញ៉ឹម វណ្ណៈ ដឹកមកដាក់ផ្ទះម្តាយក្មេកនៅឯខេត្កណ្តាល និងផ្ទះផ្ទាល់ខ្លួន នៅខេត្តព្រៃវែង ស្រុកកំពង់ត្របែក ឃុំពាមន្ទារ ភូមិតាកែវជាបន្តបន្ទាប់ ធ្វើឲ្យពលរដ្ឋក្នុងតំបន់ ស្ងើចសរសើរមិនដាច់ពីម៉ាត់ថា… (ហេតុតែគេជាមន្ត្រីអភិរក្សព្រៃឈើនៃក្រសួងបរិស្ថាន គេមានឈើប្រណិតល្អៗជាច្រើនទុកប្រើប្រាស់ បើទោះជាគ្មានកន្លែងទុកដាក់… ក៏គេគ្របតង់ទុកចោលដែរ… ហ្ម៎…មើលទៅគួរឲ្យស្ងប់ស្ញែញណាស់ បើយកលុយទៅទិញវិញ ត្រូវចំណាយលុយមិនតិចម៉ឺនដុល្លាទេ… ហើយមិនដឹងថាដឹកមកដល់ផ្ទះឬអត់ផង..? តែហេតុតែគេជាមន្រ្តីអភិរក្សព្រៃឈើ ចង់ដឹកបែបណាក៏បានដែរ ព្រោះគេជាអ្នកអនុវត្តច្បាប់ស្រាប់ទៅហើយ…)។
នៅថ្ងៃទី២៦ ខែមករា ឆ្នាំ២០១៩ បន្ទាប់ពីទទួលបានការរាយការណ៍ពីប្រជាពលរដ្ឋដែលឃើញហេតុការណ៍ ថាមានសកម្មភាពដឹកជញ្ជូនឈើដោយរថយន្តធន់ធំខុសពីធម្មតា ឆ្លងកាត់តាមស្ពានថ្មតូចៗដែលស្ទើទ្រទំងន់ឡានធន់ធំនេះមិនរួច ចុះពីផ្លូវជាតិលេខ១ ចូលទៅភូមិតាកែវ ឃុំពាមន្ទារ អ្នកសារព័ត៌មានយើងមួយក្រុម ក៏បានទៅផ្តឹតយករូបភាពនៃការដឹកជញ្ជូនឈើទាំងនេះ។
នៅពេលចុះទៅដល់ទីតាំង លោកញ៉ឹម វណ្ណៈ ក្នុងតួនាទីជា អនុប្រធានទទួលបន្ទុកដែនជម្រក សត្វព្រៃ ភ្នំព្រេច បានហាមឃាត់អ្នកសារព័ត៌មានថាមិនមានសិទ្ធិគ្រប់ គ្រាន់ដើម្បី សួរនាំពី ប្រភពឈើទាំង នេះ ទេ ដោយលោកបានបញ្ជាក់ថា “យើងមានច្បាប់ដឹកជញ្ជូនរួចហើយ… !” ។ លោក វណ្ណៈ មិនអនុញ្ញាតិឲ្យមើលលិខិតអនុញ្ញាតិដឹកជញ្ជូន ដែលលោកអះអាងថា ជាឈើស្របច្បាប់នេះទេ។ អនុប្រធានការិយាល័យទទួលបន្ទុកដែនជម្រកសត្វព្រៃភ្នំព្រេច បានចោទសួរពីតួរនាទី និងភារកិច្ចរបស់អ្នកសារព័ត៌មានថាគួរធ្វើអ្វីតាមគោលការណ៍ច្បាប់..! បន្ថែមលើនេះលោកបាន ជំរុញឲ្យអ្នកសារព័ត៌មាន ចុះផ្សាយតាមភាពជាក់ស្តែងនេះចុះ។
នៅថ្ងៃទី ២៧ ខែមករា ឆ្នាំ២០១៩ បន្ទាប់ពីទម្លាក់ឈើរួច ក្រោមការបញ្ជារពីថ្នាក់ស្រុក មន្ត្រីប៉ុស្តិ៍នគរបាលមូលដ្ឋានបានចុះទៅពិនិត្យភាពស្របច្បាប់ឈើទាំងនេះ។ ក្រោយពិនិត្យរួចមន្ត្រីប៉ូលីសទាំងនោះ រឹតតែស្ងើចសរសើរមិនដាច់ពីម៉ាត់ថា ពិតជាមិនធម្មតាមែន ឈើប្រណិតល្អៗ រាប់សិបម៉ែត្រគូបដឹកដោយឡានធន់ធំ ឆ្លងកាត់ខេត្តជាច្រើនដោយគ្មានបញ្ហា ព្រោះឈើទាំងនេះមានច្បាប់ដឹកជញ្ជូនពីរដ្ឋបាលព្រៃឈើ។
តែសំណួរដែលជាចំណោទនោះគឺ តើហេតុអ្វីក្នុងតួរនាទីជាអនុប្រធានដែនជម្រកសត្វព្រៃភ្នំព្រេច ជាមន្ត្រីការពារតំបន់ព្រៃការពារ បែជាអាចដឹកឈើទាំងនេះចេញដោយសេរី? តើអ្នកណាជាអ្នកអនុញ្ញាតិឲ្យមន្ត្រីការពារបរិស្ថានដែលកំពុងស្ថិតនៅក្នុងតួរនាទីធ្វើបែបនេះ? តើសកម្មភាពបែបនេះ គួរឲ្យលើកទឹកចិត្តដែរឬទេ? តើគេអាចទទួលបានលិខិតអនុញ្ញាតិបែបនេះតាមរបៀបណា? បើទទួលបានលិខិតដឹកជញ្ជូនអនុផលព្រៃឈើ ពីក្រុមហ៊ុនដោយលោក វណ្ណៈ ជាអ្នករត់ការដឹកជញ្ជូនផ្ទាល់ គឺកាន់តែមានរឿងមិនប្រក្រតី។
បើតាមមន្ត្រីនគរបាលថា៖ លិខិតអនុញ្ញាតិ ប្រើប្រាស់ឈើដ៏ច្រើនសន្ធឹកសន្ធាប់ ក្នុងតួរនាទីជាមន្ត្រីក្រសួងបរិស្ថានបែបនេះ គួរតែទុកសាងសង់ផលប្រយោជន៍សាធារណៈដូចជាសាលារៀន ឬវត្តអារាមជាដើមទើបល្អ មិនសមណាមានលិខិត PC យកមកបម្រើផលប្រយោជន៍បុគ្គលដូច្នេះទេ..។
ច្បាប់ស្តីពីតំបន់ការពារធម្មជាតិ ដែលសម្រេចប្រើប្រាស់ជាផ្លូវការក្នុងជំពូក១ បានកំណត់ច្បាស់ៗថា ច្បាប់នេះធ្វើឡើងដើម្បីធានាការគ្រប់គ្រង ការអភិរក្សជីវៈចម្រុះ និងធានាការប្រើប្រាស់ធនធានធម្មជាតិ ក្នុងតំបន់ការពារប្រកបដោយនិរន្តរភាព។ នៅក្នុងជំពូក២ និយាយពីស្ថាប័នទទួលខុសត្រូវ ត្រង់មាត្រាទី៤ និងមាត្រាទី៥ បានកំណត់យ៉ាងច្បាស់ថា រដ្ឋបាលការពារ និងអភិរក្សធម្មជាតិ មានតួរនាទី រៀបចំយុទ្ធសាស្ត្រដើម្បីការពារធនធានធម្មជាតិ និងត្រូវចាត់វិធានការស្រាវជ្រាវ ទប់ស្កាត់ និងបង្ក្រាបបទល្មើសធនធានធម្មជាតិ នៅក្នងតំបន់ការពារធម្មជាតិ និងកសាងសំណុំបែបបទបញ្ជូនទៅតុលាការ។ មិនតែប៉ុណ្ណោះ ច្បាប់នេះក៏បានកំណត់ឲ្យមន្ត្រីបរិស្ថានដែលស្ថិតក្នុងតំណែង ត្រូវការពារតំបន់ធនធានធម្មជាតិ ត្រូវអប់រំប្រជាពលរដ្ឋ ឲ្យចូលរួមការពារធនធានធម្មជាតិផងដែរ មិនមែនធ្វើជាគម្រូដឹកជញ្ជូនឈើគួរឲ្យស្ងប់ស្ញែញ ដូចលោកអនុប្រធានការិទទួលបន្ទុកដែនជម្រកសត្វព្រៃភ្នំព្រេច ញ៉ឹម វណ្ណៈនោះទេ។
សំនួរដែលបើកបង្ហាញពីភាពមិនប្រក្រតី រួមនិងទិដ្ឋភាពច្បាប់ ជាមូលហេតុដែលក្រុមសារព័ត៌មានយើងធ្វើការស៊ើបអង្គេតករណី លោកញ៉ឹម វណ្ណៈ ក្នុងតួរនាទីជា អនុប្រធានការិទទួលបន្ទុកដែនជម្រកសត្វព្រៃភ្នំព្រេច ប្រើអំណាចដឹកឈើចេញពីតំបន់ដែនជម្រកសត្វព្រៃភ្នំព្រេចដោយសេរី។
យោងតាមដីការស្តីពីការតែងតាំងមន្ត្រីរាជការរបស់រដ្ឋបាលខេត្តមណ្ឌលគិរី ដឹកនាំដោយអភិបាលខេត្ត លោកស្វាយ សំអ៊ាង លេខ០១៩/១៧ ដក.តត ចុះនៅថ្ងៃទី១៣ ខែមិថុនា ឆ្នាំ២០១៧ លោកញ៉ឹម វណ្ណៈ អត្តលេខ៖ ១៨១១៤០០២៣៥ ឋានន្តរស័ក្តិ អនុមន្ត្រីថ្នាក់លេខ១ នៃក្របខណ្ឌមន្ត្រីរដ្ឋបាលជាន់ខ្ពស់ក្រសួងបរិស្ថាន ត្រូវតែងតាំងជានាយករងជម្រកសត្វព្រៃភ្នំព្រេច នៃមន្ទីបរិស្ថានខេត្តមណ្ឌលគិរី។
ក្រោយទទួលបានការតែងតាំងនៅថ្ងៃទី២៩ ខែមិថុនា ឆ្នាំ២០១៧ លោកកែវ សុភគ៍ ប្រធានមន្ទីបរិស្ថានខេត្តមណ្ឌលគិរី បានចេញលិខិតបង្គាប់ការ ចាត់តាំងឲ្យ លោកញ៉ឹម វណ្ណៈ ចូលទៅបម្រើការជានាយករងជម្រកសត្វព្រៃភ្នំព្រេច នៃមន្ទីបរិស្ថានខេត្តមណ្ឌលគិរីចាប់តាំងពីពេលនេះមក។
តាមមន្ត្រីរួមការងារក្នុងមន្ទីរបរិស្ថានខេត្តមណ្ឌលគិរី បានឲ្យដឹងថា មុនចូលម្រើការក្នុងតំបន់ជម្រកសត្វព្រៃភ្នំព្រេច លោកវណ្ណៈ ធ្លាប់មានរឿងអាស្រូវ ទាក់ទងនឹងការប្រើប្រាស់អាវុធខុសច្បាប់ និងបង្ករគ្រោះថ្នាក់ចរាចរណ៍បណ្តាលឲ្យស្លាប់មនុស្សក្នុងកំឡុងពេល លោកប្រដេញអ្នកដឹកជញ្ជូនឈើតាមរថយន្ត។ ករណីគ្រោះថ្នាក់ចរាចរណ៍បណ្តាលឲ្យស្លាប់មនុស្សនេះ មជ្ឈដ្ឋានជាច្រើនចាត់ទុកថា ជាករណីពាលស៊ីពាល ដែលរឿងរ៉ាវនេះ លោកវណ្ណៈ ត្រូវប្រឈមនឹងបណ្តឹងនៅតុលាការ។
