ភ្ញាក់ផ្អើល សមត្ថកិច្ចស្លៀកពាក់ស៊ីវិល គ្មានដីកា គ្មានភស្តុតាង ចុះចាប់វាយខ្នោះ ប៉ះម្ចាស់ផ្ទះខ្លាំងស្រែកថាធ្វើស៊ី
រតនៈគិរីៈ មានហេតុការណ៍ភ្ញាក់ផ្អើលមួយបានកើតឡើងនៅស្រុកបរកែវ ខេត្តរតនគីរី បន្ទាប់ពីសមត្ថកិច្ចស្លៀកពាក់ស៊ីវិលមួយក្រុម ធ្វើសកម្មភាពចុះចាប់ប្រជាពលរដ្ឋដល់ផ្ទះពាក់ព័ន្ធនឹងគ្រឿងញៀន ដោយគ្មានដីកា និងគ្មានភស្តុតាងជាក់ស្ដែង។ ម្ចាស់ផ្ទះ ដែលត្រូវជាបងជនសង្ស័យ មិនសុខចិត្តឱ្យសមត្ថកិច្ចចាប់ប្អូនប្រុសឡើយ គឺនៅប្រកែកតវ៉ា រហូតដល់ប៉ះទង្គិចពាក្យសម្ដីគ្នាយ៉ាងខ្លាំង ឯសមត្ថកិច្ចឃើញដូចនេះ ក៏មិនហ៊ានចាប់ទៅភ្លាមៗដែរ។
បើតាមវីដេអូជាង ៨នាទី ដែលគេថតបានពីសកម្មភាពនោះ បានបង្ហាញថា ក្រុមប៉ូលិសស្លៀកពាក់ស៊ីវិល បានចាប់ជនសង្ស័យម្នាក់វាយខ្នោះរួចទៅហើយ ទើបធ្វើដំណើរមកចាប់ជនសង្ស័យម្នាក់ទៀត។ ពេលមកចាប់វាយខ្នោះនោះ ស្រាប់តែបងប្រុសរបស់ជនសង្ស័យម្នាក់ទៀត មិនព្រមឱ្យវាយខ្នោះដៃឡើយ ដោយសួររកភស្តុតាង និងដីកាបង្គាប់ពីតុលាការ។ ប៉ុន្តែសមត្ថកិច្ច បែរឆ្លើយថាគ្មាន គិតតែព្យាយាមបញ្ជូនជនសង្ស័យទៅប៉ុស្តិ៍។
ពេលនោះ ទាំងសមត្ថកិច្ច និងបងរបស់ជនសង្ស័យទី២ បានទៅបញ្ជាក់សួរជនសង្ស័យដែលចាប់បានទី១ ថាតើជាម្នាក់នេះ ឬមិនមែន។ ប៉ុន្តែជនសង្ស័យទី១ មិនព្រមឆ្លើយទាល់តែសោះ បើទោះសមត្ថកិច្ចថាជាអ្នកទទួលខុសត្រូវក៏ដោយ។ ដោយសារគ្មានដីកា គ្មានភស្តុតាងច្បាស់លាស់ ទើបបងប្រុសជនសង្ស័យទី២ ទាមទារឱ្យដោះខ្នោះដៃប្អូនវិញ តែសមត្ថកិច្ចមិនព្រមនោះទេ បង្កើតជាការប៉ះទង្គិចពាក្យសម្ដីគ្នាយ៉ាងខ្លាំង។
បើតាមបងប្រុសជនសង្ស័យទី២ ដែលជាម្ចាស់ផ្ទះ បានទាមទារឱ្យសមត្ថកិច្ចស្រាវជ្រាវឱ្យបានច្បាស់ជាមុនសិន ដោយអះអាងថា ប្អូនប្រុសរបស់លោក នឹងមិនរត់ទៅណាឡើយ ហើយលោកជាអ្នកទទួលខុសត្រូវគ្រប់បែបយ៉ាង។ ម្ចាស់ផ្ទះ បានស្រែកខ្លាំងៗថា ពីមុនមកលោកធ្លាប់ជាប់ពន្ធនាគារ ដោយសារតែរឿងធ្វើស៊ីករណីគ្រឿងញៀនបែបនេះ។ ប៉ុន្តែសមត្ថកិច្ចនៅតែទាមទារយកទៅជជែកគ្នានៅប៉ុស្តិ៍ដដែល។
វីដេអូបានបញ្ចប់ទៅ ដោយមិនទាន់ដឹងថា តើជនសង្ស័យនោះត្រូវបញ្ជូនខ្លួនទៅបានសម្រេច ឬយ៉ាងណានោះទេ។ មតិមហាជនជាច្រើន ដែលបានឃើញវីដេអូនេះ នាំគ្នារិះគន់សមត្ថកិច្ច ដែលធ្វើការដោយគ្មានមូលដ្ឋានច្បាស់លាស់។ ម្យ៉ាងទៀត ប្រសិនបើសមត្ថកិច្ចមានដីកា ឬមានភស្តុតាងវិញ មិនគួរនៅប្រកែកទេ គឺត្រូវអនុវត្តតាមច្បាប់។ ទោះបែបនេះក្ដី មិនទាន់មានការបញ្ជាក់ពីសមត្ថកិច្ចស្រុកបរកែវជុំវិញករណីនេះទេ ។
