ប្រជាសហគមន៍ជនជាតិដើមភាគតិច បាននាំគ្នាប្តឹងលោក ហាន សាខន មេព្រៃភ្នំព្រេច ដែលតែងតែនាំបក្ខពួកកាប់បំផ្លាញ់ព្រៃឈើនៅខេត្តមណ្ឌលគិរី ទៅតុលាការ
មណ្ឌលគិរី៖ ប្រជាសហគមន៍ជនជាតិដើមភាគតិចថ្មូន កាលពីថ្ងៃទី១៦ ខែឧសភា ឆ្នាំ២០១៩ ម្សិលមិញ បានសម្រេចនាំគ្នា ដាក់ពាក្យប្តឹងលោក ហាន សាខន នាយដែនជម្រកសត្វព្រៃភ្នំព្រេច (លំផាត់-កោះញែក) និងបក្ខពួក ចូលអយ្យការអមសាលាដំបូង ខេត្ត មណ្ឌលគិរី ពីបទគំរាមកំហែង។
យោងតាមពាក្យបណ្តឹង ចុះថ្ងៃទី១៦ ខែឧសភា ឆ្នាំ២០១៩ មានឈ្មោះ ប្រង់ ណច, ក្រាង ញាណ, ចៃ រិទ្ធិ និងឈ្មោះ ប្រង់ ងច ជាដើមបណ្តឹង និងជាតំណាងឲ្យប្រជាសហគមន៍ ដែលរងគ្រោះព្រោះលោក ហាន សាខន និងបក្ខពួកគំរាមកំហែង។
ពាក្យបណ្តឹងរបស់តំណាងប្រជាសហគមន៍ បានរៀបរាប់ថា កាលពីថ្ងៃទី០១ ខែឧសភា ឆ្នាំ២០១៩ ប្រជាសហគមន៍ជនជាតិដើមភាគតិចថ្មូនជាច្រើននាក់ បាននាំគ្នាចុះល្បាតដីសហគមន៍ ក្នុងគោលបំណងការពារដីធ្លី និងធនធានធម្មជាតិរបស់រដ្ឋ នៅចំណុចអូរដក្លាន់, អូរស្ងួត និងអូរព្រះ ស្រាប់តែលោក ហាន សាខន នាយដែនជម្រកសត្វព្រៃភ្នំព្រេច ដឹកនាំកូនចៅចំនួន ០៨នាក់ ទៅហាមឃាត់មិនឲ្យប្រជាសហគមន៍ចូលល្បាតព្រៃនោះទេ។ លោក ហាន សាខន នាយដែនជម្រកសត្វព្រៃ បានគំរាមចាប់ប្រជាសហគមន៍ ដាក់គុក ប្រសិនបើនៅតែរឹងទទឹង ហ៊ានតវ៉ា និងទាមទារការពារដីព្រៃ ទាំងនោះតទៅទៀត។
ពាក់ព័ន្ធករណីនេះ សារព័ត៌មាន ខ្មែរជាយដែន ពុំទាន់អាចសុំការបញ្ជាក់ពីលោក ហាន សាខន នាយដែនជម្រកសត្វព្រៃភ្នំព្រេច បាននៅឡើយទេ ដោយសារទូរស័ព្ទដៃ របស់លោក មិនអាចទាក់ទងបាន។
យោងតាមសេចក្តីរាយការណ៍ ពីប្រជាសហគមន៍ បានឲ្យដឹងថា លោក ហាន សាខន នាយដែនជម្រកសត្វព្រៃភ្នំព្រេចបានសហការគ្នាយ៉ាងល្អ ជាមួយប្អូនជីដូនមួយឈ្មោះ ញឹម វណ្ណៈ ជានាយរងដែនជម្រកសត្វព្រៃភ្នំព្រេច បើកដៃ ឲ្យមានការកាប់បំផ្លាញព្រៃឈើ ក្នុងដែនជម្រកការពារភ្នំព្រេច យ៉ាងគគ្រឹកគ្រេង។
កាលពីចុងខែមេសា ឆ្នាំ២០១៩ សមត្ថកិច្ចជំនាញធ្លាប់បានចាប់ខ្លួន ជនជាតិខ្មែរ ៨នាក់ និងជនជាតិវៀតណាម ២នាក់ បញ្ជូនទៅតុលាការ ពាក់ព័ន្ធបទល្មើសលួច ចូលកាប់បំផ្លាញឈើខុសច្បាប់ ក្នុងដែនជម្រកសត្វព្រៃភ្នំព្រេច ដែលស្ថិតក្រោមការគ្រប់គ្រងរបស់លោក ហាន សាខន និងលោក ញឹម វណ្ណៈ។
សេចក្តីរាយការណ៍បន្ថែមថា លោក ញឹម វណ្ណៈ ជានាយរងដែនជម្រកសត្វព្រៃភ្នំព្រេច ក៏ជាអ្នកកាប់បំផ្លាញព្រៃឈើក្នុងតំបន់ ដែលខ្លួនការពារនោះផងដែរ។ ពាក់ព័ន្ធករណីនេះ លោក ញឹម វណ្ណៈ ធ្លាប់ប្រាប់អ្នកសារព័ត៌មានថា លោកកាប់ព្រៃឈើក្នុងតំបន់ដែនជម្រកសត្វព្រៃភ្នំព្រេចបាន ព្រោះលោកមានលិខិតអនុញ្ញាត ដឹកផលអនុផលព្រៃឈើ (PC) ពីក្រសួងត្រឹមត្រូវ។
ព្រោះតែមានលិខិត PC នេះហើយ ទើបលោក ញឹម វណ្ណៈ បានសហការគ្នាជាមួយលោក ហាន សាខន បានកាប់ និងដឹកឈើចេញពីដែនជម្រកសត្វព្រៃភ្នំព្រេច ជាច្រើនម៉ែត្រគូប យកទៅរក្សាទុកនៅផ្ទះ ម្តាយក្មេករបស់លោក ញ៊ឹម វណ្ណៈ នៅក្នុងខេត្តកណ្តាល និងខ្លះទៀត ត្រូវរក្សាទុកនៅផ្ទះរបស់លោក ញ៊ឹម វណ្ណៈ ក្នុងភូមិតាកែវ ឃុំពាមន្ទារ ស្រុកកំពង់ត្របែក ខេត្តព្រៃវែង មុនពេលនាំចេញទៅលក់បន្តនៅ ប្រទេសវៀតណាម៕
