សាលាឧទ្ធរណ៍សម្រេចឲ្យមេដឹកនាំសហជីព៦រូប រួចពីការចោទប្រកាន់ករណីបាតុកម្មផ្លូវវេងស្រេង
ភ្នំពេញៈ សាលាឧទ្ធរណ៍បានបើកសវនាការ លើបណ្តឹងឧទ្ធរណ៍ របស់មេដឹកនាំសហជីព និងសមាគម ៦រូបរួមមាន៖ លោក អាត់ ធន់ ប្រធានសហភាពការងារកម្ពុជា អ្នកស្រី ម៉ម ញឹម ប្រធានសហព័ន្ធសហជីពជាតិនៃឧស្សាហកម្មវាយនភណ្ឌ លោក ប៉ាវ ស៊ីណា ប្រធានសម្ព័ន្ធសហជីព ចលនាកម្មករកម្ពុជា លោក ជា មុនី អតីតប្រធានសហជីពសេរីកម្មករ នៃព្រះរាជាណាចក្រកម្ពុជា អ្នកស្រី យ៉ាង សោភ័ណ្ឌ ប្រធានសម្ព័ន្ធសហជីពកម្ពុជា និងលោក រ៉ុង ឈុន ប្រធានសហភាពសហជីពកម្ពុជា កាលពីរសៀលថ្ងៃទី២៨ ខែឧសភា ឆ្នាំ២០១៩ ម្សិលមិញនេះ។
ក្រោយពីបញ្ចប់ការសួរ ដេញដោល សភាព្រហ្មទណ្ឌ័ នៃសាលាឧទ្ធរណ៍ បានសម្រេចឲ្យថ្នាក់ដឹកនាំ សហជីពទាំង៥នាក់ និងប្រធានសមាគម ដោយសម្រេច៖ ១-ទទួលបណ្តឹងរបស់ថ្នាក់ដឹកនាំ សហជីពទុកជាត្រឹមត្រូវ តាមទម្រង់ និងគតិច្បាប់។ ២-បដិសេធសាលក្រម សាលាដំបូងរាជធានីភ្នំពេញចោល។ ៣-ឱ្យឈ្មោះ អាត់ ធន់ , ម៉ម ញឹម , ប៉ាវ ស៊ីណា , ជា មុនី , យ៉ាង សោភ័ណ្ឌ និង រ៉ុង ឈុន រួចខ្លួចពីបទចោទ។
ការសម្រេចនេះ កំបាំងមុខអ្នកស្រី ម៉ម ញឹម លោកប៉ាវ ស៊ីណា លោកជា មុនី អ្នកស្រី យ៉ាង សោភ័ណ្ឌ និងលោក រ៉ុង ឈុន។
សូមជម្រាបថា កាលពីថ្ងៃទី១១ ខែធ្នូ ឆ្នាំ២០១៨ តុលាការក្រុង ភ្នំពេញបានកាត់ទោសមេដឹកនាំសហជីព ៦រូប ក្នុងនោះរួមមានលោក អាត់ ធន់ លោក ជា មុនី អ្នកស្រី យ៉ាង សោភ័ណ្ឌ លោក ប៉ាវ ស៊ីណា លោក រ៉ុង ឈុន និងអ្នកស្រី ម៉ម ញឹម ឲ្យជាប់ពន្ធនាគារ ២ឆ្នាំកន្លះ តែទោសនេះត្រូវព្យួរ ហើយបង្គាប់ឲ្យមេដឹកនាំ សហជីពទាំង ៦រូបនេះ បង់សំណងជំងឺចិត្ត ៣៥លានរៀល ស្មើនឹងប្រមាណជិត ៩ពាន់ដុល្លារអាមេរិក ពាក់ព័ន្ធនឹងបទចោទប្រព្រឹត្តិអំពើហឹង្សា ដោយចេតនា កាលពីអំឡុងឆ្នាំ២០១៤ នៅមុខសួនកាណាឌីយ៉ា ផ្លូវវេងស្រេង៕
