មន្រ្តីយោធាឈរជើងនៅប៉ុស្តិ៍៦លោកសយ ហឿន រកសុីបទល្មើសព្រៃឈើគ្មានណាហ៊ានប៉ះ
ខេត្តមណ្ឌលគិរី៖ តាមប្រភពព័ត៌មាន ពីប្រជាពលរដ្ឋបានបង្ហើបឱ្យដឹងថា មានមន្រ្តីយោធាម្នាក់ដែលឈរជើងនៅប៉ុស្តិ៍៦ស្ថិតក្នុងភូមិសាស្រ្ត ស្រុកពេជ្រា ដា បាននឹងកំពុងកាក់កបដោយសារការរកសុីបទល្មើសព្រៃឈើ យោធាម្នាក់នោះត្រូវបានគេស្គាល់ថា ឈ្មោះ សយ ហឿន ។
ប្រភពដដែលបានឱ្យដឹងថា មន្រ្តីយោធាខាងលើ បានរកសបទល្មើសព្រៃឈើជាយូរមកហើយ ដោយញុះញុង់ជនជាតិដើមភាគតិច ឱ្យកាប់បំផ្លាញឈើនៅម្តុំប៉ុស្តិ៍៦យកមកលក់អោយខ្លួន ក្នុងមួយថ្ងៃៗមិនក្រោមពី៣ទៅ៤គោយន្ត ឬរថយន្តឡង់គ្រីស័រដែលមន្រ្តីយោធារូបនេះ យកទៅលក់ឱ្យឈ្មួញជនជាតិវៀតណាម តាមប៉ស្តិ៍៦យ៉ាងរំភើយ ដោយគ្មានខ្លាចញញើតច្បាប់អីបន្តិចសោះឡើយ ប្រហែលជាមានការបើកដៃពីមន្រ្តីជំនាញ សមត្ថកិច្ច និងអាជ្ញាធរស្រុកពេជ្រា ដា ដោយសារបានទទួលប្រយោជន៍ពីមន្រ្តីយោធាឈ្មោះ សយ ហឿន ហើយមើលទៅ ពីព្រោះការរកសុីបទល្មើសព្រៃឈើនេះ កើតឡើងជាយូរមកហើយ មិនដែលឃើញមន្រ្តីជំនាញ សមត្ថកិច្ច និងអាជ្ញាធរស្រុកពេជ្រា ដា ចុះបង្ក្រាបម្តងណាឡើយ។
ជុំវិញទៅ នឹងការចោទប្រកាន់ខាងលើ មន្រ្តីយោធាឈ្មោះ សយ ហឿន បានបដិសេដថាខ្លួនមិនបានរកសុី បទល្មើសព្រៃឈើនោះទេ តែបើតាមប្រភពព័ត៌មាន ពីជាជនជាតិដើមភាគតិចនៅក្នុង ស្រុកពេជ្រា ដា ថាការឆ្លើយបដិសេដរបស់មន្រ្តីយោធាឈ្មោះ សយ ហឿន គ្រាន់តែជាការដោះសារ តែប៉ុណ្ណោះ ដំរីងាប់យកចង្អេរទៅក៏បាំងមិនជិតដែរ។
ជនជាតិដើមភាគតិចចាំមើលថា តើលោក សាន គឹមអឿន មេបញ្ជាការប្រតិបត្តិការ សិករងមណ្ឌលគិរី លោក ឡោ សុខា ស្នងការនគរបាលខេត្តមណ្ឌលគិរី លោកស្វាយ សំអ៊ាង អភិបាលខេត្តមណ្ឌលគិរី មានចំណាត់ការយ៉ាងណា រឺមួយទុកឱ្យមន្រ្តីយោធាឈ្មោះ សយ ហឿន ធ្វើផ្គរធ្វើភ្លៀងស្រេចតែអំពើចិត្ត៕
