ដីឡើងថ្លៃព្រះសង្ឃក៏ដេញដែរ ព្រះសង្ឃវត្តអូរដំរី ខេត្តព្រះសីហនុ រងការបណ្ដេញចេញដោយបង្ខំ និង គំរាមដើម្បីយកដីលក់ ខណៈដីកំពុងឡើងថ្លៃខ្លាំង
ខេត្តព្រះសីហនុ៖ ប្រជាពលរដ្ឋ និងពុទ្ធបរិស័ទជាង ៤០នាក់ បានជួបជុំគ្នាក្នុងបរិវេណវត្តនៅថ្ងៃទី៤ ឧសភា បានប្រកាសជំហរប្រឆាំងការបណ្ដេញព្រះសង្ឃ ដែលគង់នៅ វត្តអូរដំរី ឃុំអូរត្រេះ ខេត្តព្រះសីហនុ និងបានផ្តិតមេដៃ ទាមទារដីវត្តមកវិញ។
ពលរដ្ឋជាង ៤០នាក់តំណាងឲ្យពលរដ្ឋ ១៤៩គ្រួសារ រស់នៅភូមិ៥ ឃុំអូរត្រេះ ស្រុកស្ទឹងហាវព្រមានលើកគ្នាតវ៉ា នៅសាលាខេត្តព្រះសីហនុ និងអាជ្ញាធរថ្នាក់ជាតិ ប្រសិនបើអាជ្ញាធរមិនដោះស្រាយវិវាទដីធ្លី នៅវត្តអូរដំរី ដែលកំពុងទទួលរងការរំលោភបំពានយ៉ាងអយុត្តិធម៌ ពីសំណាក់បុគ្គលមានធនធាន និងឥទ្ធិពល។ ពួកគេទាមទារឲ្យអាជ្ញាធរថែរក្សាវត្តនេះទុក និងអនុញ្ញាតឲ្យព្រះសង្ឃគង់នៅបន្តទៀត។
តំណាងពលរដ្ឋលោក ម៉ន ស៊ីណា ឲ្យដឹងនៅថ្ងៃទី៤ ឧសភា ថា អ្នកភូមិបានពិភាក្សាគ្នារួចហើយ បំណងថែរក្សា វត្តអូរដំរីឲ្យគង់វង្ស នៅគ្រាដែលទីផ្សារដី ហក់ឡើងខ្ពស់។ លោកថា មេគុណខេត្តបានបង្ខំឲ្យព្រះសង្ឃគង់នៅវត្តនេះ ចុះចេញជាបន្ទាន់ ដែលទំនងចង់បានដីវត្តប្រគល់ឲ្យឈ្មួញ៖ «ខាងមន្ទីរធម្មការ ខាងមេគុណ គាត់ជឿក្រុមអនាធិបតេយ្យ មិនដែលមានដី មិនដែលរស់នៅ មិនដែលជាម្ចាស់កម្មសិទ្ធិមកលើហ្នឹងផង រឿងអីគាត់មកសម្រេច ដេញព្រះសង្ឃចេញពីវត្តអូរដំរី ពីព្រោះខ្ញុំជាម្ចាស់មូលដ្ឋាន ជាម្ចាស់រស់នៅហ្នឹងពិតប្រាកដ ខ្ញុំមិនគាំទ្រការដេញព្រះសង្ឃទេ។ ប្រសិនជាអាជ្ញាធរខេត្តក៏ដូចជា ប្រធានមន្ទីរធម្មការមេគុណ មិនឲ្យលោកគង់នៅហ្នឹងទេ ប្រជាជនបានផ្តិតមេដៃ ដាក់ទៅប្រធានមន្ទីរធម្មការ និងគ្រោងហែគ្នាទៅរាជធានីភ្នំពេញទៀត»។
ពលរដ្ឋរស់នៅឃុំអូរត្រេះ ឲ្យដឹងថា ជិត ២ទសវត្សរ៍មកហើយ មានពុទ្ធបរិស័ទ ១៤៩គ្រួសារ បានមូលមតិគ្នា ប្រគល់ដី ៥ហិកតារ ជាសម្បត្តិរួម ដើម្បីកសាងវត្តអារាម ហើយកាលពី ឆ្នាំ២០០៩ អ្នកភូមិបានដាក់ពាក្យស្នើសុំ ឲ្យព្រះសង្ឃគង់ចាំព្រះវស្សា ក្នុងវត្តនេះ។ មកទល់ពេលនេះ ដីវត្តអូរដំរី នៅសល់តែជាង ១ហិកតា។
ចៅអធិការវត្តអូរដំរី ព្រះតេជគុណ មាន់ ភក្តី មានថេរដីកាថា មេគុណខេត្ត បានចេញលិខិតឲ្យព្រះអង្គចុះចេញពីវត្តនេះជាបន្ទាន់ ហើយព្រះអង្គក៏បង្ខំចិត្តផ្ដិតមេដៃព្រម ដោយសាររងការគំរាមកំហែងចាប់ផ្សឹក។ ព្រះអង្គមានថេរដីកាបន្ថែមថា សូម្បីតែដើមឈើធំៗ ក្នុងបរិវេណវត្ត ត្រូវជនខិលខូច កាប់បំផ្លាញចោលអស់ ដើម្បីគំរាមកំហែងព្រះសង្ឃឲ្យចុះចេញពីវត្ត និងប្រគល់ដីឲ្យពួកគេ៖ «គេចង់បានដីវត្ត គេព្យាយាមដេញរឿយៗ ក៏ប៉ុន្តែធ្វើអត់ចេញ ដល់អីចឹងគេពឹងទៅមេគុណហ្នឹង។ កាប់ដើមឈើនៅវត្តអស់ ឡើងវាលអស់ហើយ ដើមឈើជិត ២០ឆ្នាំឡើងក្តៅ ពុទ្ធបរិស័ទមក មិនបានជ្រកម្លប់ ក្នុងចិត្តមិនព្រមទេ តែឥឡូវមិនដឹងធ្វើម៉េច? បើយើងមិនព្រមមានការងារផ្សេងរបស់គេទៀត។ បើសិនជារឹងមាត់ និយាយអស់ស្ដាប់អាចដល់ មានខោអាវឲ្យស្លៀក»។
ខ្មែរជាយដែនមិនអាចទាក់ទង អភិបាលខេត្តព្រះសីហនុ លោក យន្ត មីន និងប្រធានមន្ទីរធម្មការ លោក កង ឌីណាត បានទេនៅថ្ងៃទី៤ ឧសភាដោយសារតែពួកគេមិនលើកទូរស័ព្ទ។
ទោះបីជាយ៉ាងណា មេគុណខេត្តព្រះសីហនុ ព្រះតេជព្រះគុណ ហ្វាន់ ហឿន មានថេរដីកាថា ហេតុផលដែលព្រះអង្គសរសេរលិខិតឲ្យព្រះសង្ឃ គង់នៅវត្តអូរដំរី ចាកចេញជាបណ្ដោះអាសន្ន ដោយសារបារម្ភពីសុវត្ថិភាព ព្រោះតែដីវត្តកើតមានជម្លោះ។ លើសពីនេះ តុលាការ និងអាជ្ញាធរពាក់ព័ន្ធកំពុងចាត់វិធានការដោះស្រាយរឿងក្តីនេះដែរ ហើយលទ្ធផលយ៉ាងណានោះ អាស្រ័យលើស្ថាប័នជំនាញសម្រេច៖ «អាត្មាដកព្រះសង្ឃយកមក នៅវត្តនេះ និងវត្តនោះសិនទៅ ដល់ពេលដីកាគេសម្រេច ទៅភាគីណា ព្រោះដីហ្នឹង ដីជម្លោះហើយបើអត់មានជម្លោះទៅដកធ្វើអី ទៅនិមន្តលោកចេញ ដើម្បីការពារពុទ្ធសាសនា កុំឲ្យមានរឿងអីច្របូកច្របល់ជាមួយគេ»។
អ្នកនាំពាក្យសមាគមអាដហុក (Adhoc) លោក សឹង សែនករុណា យល់ថា អាជ្ញាធរខេត្តព្រះសីហនុ និងអាជ្ញាធរជាតិគួរតែស៊ើបអង្កេត ករណីនេះឡើងវិញ ធ្វើយ៉ាងណា រកដំណោះស្រាយផ្ដល់យុត្តិធម៌រឿងនេះ ជូនព្រះសង្ឃ និងពុទ្ធបរិស័ទ ដែលចង់អភិរក្សវត្តនេះជាសម្បត្តិរបស់រដ្ឋ។ លោកបញ្ជាក់ថា អាជ្ញាធរមានសមត្ថកិច្ចត្រូវស៊ើបអង្កេតឲ្យស៊ីជម្រៅ ចំពោះបុគ្គលដែលគំរាមកំហែងព្រះសង្ឃ និងអ្នកដែលបំផ្លាញផលដំណាំវត្ត ត្រូវមកទទួលខុសត្រូវចំពោះមុខច្បាប់៖ «ពេលដែលមានបញ្ហាវិវាទ ភាគីទាំងសងខាង ត្រូវខាងដំណោះស្រាយ។ ទី១ បើសិនអ្នកធ្លាប់ប្រើប្រាស់ដី ត្រូវប្រើប្រាស់ធម្មតា ហើយភាគីម្ខាងទៀត បើមិនទាន់មានការសម្រេចណាមួយ ពីខាងតុលាការ មិនអាចធ្វើអ្វីបានទេ។ ដូច្នេះការរង់ចាំដំណោះស្រាយមិនមែនចាំបាច់ចាកចេញពីតំបន់ហ្នឹង ហើយប្រគល់ដីឲ្យភាគីម្ខាងទៀតទាំងមិនមានដីកាសម្រេចត្រឹមត្រូវពីខាងតុលាការ និងអាជ្ញាធរមានសមត្ថកិច្ច អាហ្នឹងផ្ទុយពីវិធានការនៃការរកដំណោះស្រាយ»។
មន្ត្រីសិទ្ធិមនុស្សរូបនេះ ហួសចិត្តសូម្បីតែដីវត្តដែលជាកន្លែងសក្ការបូជាពុទ្ធសាសនា សម្រាប់ពលរដ្ឋធ្វើបុណ្យទាន និងព្រះសង្ឃគង់នៅ ក៏រងការបណ្ដេញចេញដើម្បីយកដីបម្រើមហិច្ឆតាបុគ្គលមានអំណាចដែរ។ លោកថា មេគុណខេត្តព្រះសីហនុ មិនត្រូវចេញលិខិតបណ្ដេញព្រះសង្ឃចេញពីវត្តនោះទេ។ លោកថា ទង្វើនេះនឹងផ្ដល់ឱកាសឲ្យភាគីម្ខាងទៀតចូលប្រើប្រាស់ និងគ្រប់គ្រងដីវត្តនោះ ជាសម្បត្តិបុគ្គលជាមិនខាន៕
