គណៈកម្មការអឺរ៉ុប ចេញសេចក្តីប្រកាសព័ត៌មាន រំលឹកឲ្យមានដំណោះស្រាយ ឬប្រឈមការដកហូត EBA
ភ្នំពេញ៖ «មន្ត្រីពីគណៈកម្មការអឺរ៉ុប (European Commission) និងចាត់វិធានការសេវាកម្មខាងក្រៅ (External Action Service) បានមកបំពេញបេសកកម្មនៅកម្ពុជា ពីថ្ងៃទី០៣-១០ ខែមិថុនា ដែលជាផ្នែកមួយនៃការតាមដាន និងការវាយតម្លៃ នៅក្រោមនីតិវិធី ដែលអាចឈានដល់ការដក ហូតជាបណ្តោះអាសន្ន នៃការអនុគ្រោះពាណិជ្ជកម្ម របស់កម្ពុជា នៅក្រោមគម្រោង ពាណិជ្ជកម្ម «អ្វីគ្រប់យ៉ាង លើកលែងតែសព្វាវុធ EBA» បន្ទាប់ពីមានការព្រួយបារម្ភ លើកំណត់ត្រារំលោភ សិទ្ធិមនុស្សស្នូល និងអនុសញ្ញា ស្តីពីសិទ្ធិការងារ។ នេះបើតាមសេចក្តីប្រកាស កាលពីថ្ងៃទី១១ មិថុនា ឆ្នាំ២០១៩ ។
គណៈកម្មការអឺរ៉ុប មកបំពេញបេសកកម្ម នៅកម្ពុជា ពីថ្ងៃទី០៣-១០ ខែមិថុនា ដោយជួបពិភាក្សា ការងារជាមួយថ្នាក់ដឹកនាំ កំពូលៗរបស់រាជរដ្ឋាភិបាលកម្ពុជា ដើម្បីស្វែងយល់ ដោយផ្ទាល់ពីស្ថានភាព ប្រទេសកម្ពុជា ។
បើតាមសេចក្តីប្រកាស បេសកកម្មនេះពិនិត្យមើលបញ្ហាចម្បងនៃការព្រួយបារម្ភនៅកម្ពុជា រួមទាំងការរំលោភជាសក្តានុពលនៃ សិទ្ធិនយោបាយ សេរីភាពខាងការ បញ្ចេញមតិ និងសេរីភាពសមាគម សិទ្ធិរៀបចំ និងការតថ្លៃសមូភាព និងការរឹបអូសយក ទ្រព្យសម្បត្តិរបស់គ្រួសារ ដែលបង្កឡើងដោយដីសម្បទាន សេដ្ឋកិច្ច ជាពិសេស ក្នុងវិស័យស្ករអំពៅ។
រយៈពេលនៃការតាមដាន និងការវាយតម្លៃនេះ នឹងបញ្ចប់នៅពាក់កណ្តាលខែសីហា។ បន្ទាប់ពីកាល បរិច្ឆេទនោះ សហភាពអឺរ៉ុប នឹងចេញរបាយការណ៍មួយ ស្តីពីការរកឃើញ និងសេចក្តីសន្និដ្ឋាន របស់ខ្លួន។ កម្ពុជានឹងមានពេលមួយខែ ដើម្បីឆ្លើយតបចំពោះ របាយការណ៍នោះ។
ទិសដៅរបស់សហភាពអឺរ៉ុប ត្រូវដោះស្រាយការ ព្រួយបារម្ភផ្នែកសិទ្ធិមនុស្ស និងសិទ្ធិការងារ ។ សហភាពអឺរ៉ុបប្តេជ្ញាធ្វើការ ជាមួយអាជ្ញាធរ កម្ពុជា ដើម្បីសម្រេចទិសដៅនេះ។ កម្ពុជាត្រូវតែបង្ហាញឲ្យឃើញនូវការកែលម្អ ពិតប្រាកដ ជឿទុកចិត្តលើបញ្ហាជា ការព្រួយបារម្ភ ដើម្បីបញ្ចៀសការដកហូត ការអនុគ្រោះ EBA»។
សូមបញ្ជាក់ថា កាលពីខែកុម្ភៈ ឆ្នាំ២០១៩ កន្លងទៅ សហភាពអឺរ៉ុប បានប្រកាស ចាប់ផ្តើមដំណើរការនីតិវិធី ដែលអាចនាំឱ្យមានការ ផ្អាកជាបណ្តោះអាសន្ន នូវប្រព័ន្ធអនុគ្រោះពន្ធ Everything But Arms (EBA)។ ប្រព័ន្ធ EBA អាចនឹងលុបចោលប្រសិនបើ រកឃើញថាប្រទេស ទទួលផលនេះ មិនគោរពសិទិ្ធមនុស្ស និងសិទ្ធិការងារសំខាន់ៗ ។ នេះបើយោងតាមសេចក្តី ជូនដំណឹងរបស់ គណៈកម្មការអឺរ៉ុប ចេញផ្សាយនៅថ្ងៃទី១១ ខែកុម្ភៈ ឆ្នាំ២០១៩។
កិច្ចព្រមព្រៀង អនុគ្រោះ ពន្ធ ឬ EBA (Everything But Arms) ជាកិច្ចព្រមព្រៀង ដែលសហភាព អឺរ៉ុប បានផ្តល់ ឲ្យកម្ពុជា និង ប្រទេស អភិវឌ្ឍ តិចតួច ផ្សេងទៀតនៅលើពិភពលោក នូវឱកាស នាំគ្រប់ផលិតផល ទាំងអស់ (លើកលែងតែ អាវុធ) ចូលទៅក្នុង ទីផ្សាររួមតែមួយ របស់សហភាព អឺរ៉ុប ដោយមិនជាប់ពន្ធគយ និង មិនជាប់កូតា។
ការផ្តួចផ្តើមគំនិតនេះ មិនមានន័យថា សហភាពអឺរ៉ុប ចាប់ផ្តើមព្យួរប្រព័ន្ធ អនុគ្រោះពន្ធភ្លាមៗ ឬជាស្វ័យប្រវត្តិនោះឡើយ គ្រាន់តែជាពេល វេលាដែលចាប់ផ្តើមបើក នីតិវិធីពិគ្រោះ យោបល់ជាផ្លូវការតែប៉ុណ្ណោះ។ កម្ពុជាមានរយៈពេល៦ខែ ក្នុងការជជែកតវ៉ា និងលើកហេតុផលផ្សេងៗពន្យល់ ទៅគណៈកម្មការអឺរ៉ុប។
ប្រសិនបើគណៈកម្មការ អឺរ៉ុបមិនទទួលយកការពន្យល់ របស់កម្ពុជា ហើយនៅតែសម្រេច ព្យួរប្រព័ន្ធអនុគ្រោះពន្ធនេះមែន គឺត្រូវប្រើរយៈពេល ចំនួន ១៨ខែ គិតចាប់ពីថ្ងៃចាប់ផ្តើម (១២ កុម្ភៈ ២០១៩) រហូតដល់ការចូលជាធរមាន។ ពោលទំនិញរបស់កម្ពុជា នៅតែបន្តនាំចូលទៅកាន់សហភាពអឺរ៉ុប ដោយមិនជាប់ពន្ធរយៈពេលជាង ១ឆ្នាំទៀត មុននឹងមានការ សម្រេចជាថ្មី។
រាជរដ្ឋាភិបាលកម្ពុជា ចាត់ទុកថា ការសម្រេចចិត្តអឺរ៉ុបនេះ ជារឿងភាពអយុត្តិធម៌បំផុត ព្រោះនេះ បង្ហាញឲ្យឃើញថា សហភាពអ៊ឺរ៉ុបបាន បដិសេធដោយចំហរ អំពីវឌ្ឍនភាពគួរឲ្យកត់ សម្គាល់ដែលប្រទេស កម្ពុជាសម្រេចបាន ។
ទោះជាយ៉ាងណា រាជរដ្ឋាភិបាលកម្ពុជា ក៏បានត្រៀមខ្លួន រួចជាស្រេច ព្រមទាំងដាក់ចេញនូវយន្តការផ្សេងៗ ទៀត ដើម្បីឆ្លើយតប នឹងការដកប្រព័ន្ធអនុគ្រោះពន្ធ EBA ផងដែរ។
EBA គឺជាគំនិតផ្តួចផ្តើម របស់សហគមន៍អឺរ៉ុប ដើម្បីជួយបណ្តាប្រទេសក្រីក្រ ឲ្យនាំចូលទំនិញទៅទីផ្សារអឺរ៉ុបដោយមិនបាច់ បង់ពន្ធ ហើយកម្មវិធីអនុគ្រោះពន្ធនេះ អាចត្រូវបាន ដកចេញវិញ ក្នុងករណីមានការ រំលោភបំពានសិទ្ធិមនុស្សធ្ងន់ធ្ងរ។
យោងតាមតួលេខផ្លូវការ ទំនិញដល់ទៅ ៤០ភាគរយនៃ ទំនិញទាំងអស់ ដែលនាំចេញ ពីកម្ពុជាទៅទីផ្សារអន្តរជាតិ គឺបាននាំចេញទៅ កាន់ទីផ្សារសហគមន៍អឺរ៉ុប។
បន្ទាប់ពី ទស្សនកិច្ចនៅកម្ពុជា កាលពីថ្ងៃទី១៩ និងថ្ងៃទី២០ ខែមីនា ឆ្នាំ២០១៩ កន្លងទៅ អឺរ៉ុបបាននិយាយថា ខ្លួនសង្ឃឹមថា នឹងមានការរីកចម្រើនដោយនិរន្តរភាព និងការវិវត្តន៍ដ៏រឹងមាំក្នុងវិស័យ ពាក់ព័ន្ធដែលស្ថិត ក្រោម EBA ហើយសង្ឃឹមថា កម្ពុជានឹងចាត់វិធានការចាំបាច់ ជាបន្ទាន់ដើម្បីរក្សាការទទួលផល ប្រយោជន៍ពីប្រព័ន្ធអនុគ្រោះពន្ធ EBA នេះ។
នៅពេលនោះ សហគមន៍អឺរ៉ុបក៏បាននិយាយផងដែរថា ទស្សនកិច្ចនៅកម្ពុជាគឺជាឱកាស ដំបូងសម្រាប់កិច្ចពិភាក្សា ក្នុងអំឡុងពេលតាមដាន និងវាយតម្លៃបន្ទាប់ពី អឺរ៉ុបបានប្រកាសនូវនីតិវិធីដែលអាច នាំឱ្យមានការដក EBA ជាបណ្តោះអា សន្នពីកម្ពុជា៕
