វប្បធម៌នយោបាយថ្មីគ្មានសង្ឃឹមបានជួបជជែងគ្នារវាងបក្សកាន់អំណាច និងបក្សប្រឆាំងនោះទេ
រាជធានីភ្នំពេញ៖ ទោះបីជាមាន ក្រុមប្រឆាំងចង់បង្កើតវប្បធម៌ នយោបាយថ្មី ដើម្បីជួប ចរចាជាមួយគណបក្ស កាន់អំណាចជាថ្មីយ៉ាងណាក្តី ក៏គ្មានផ្លូវដែរព្រោះអ្វីៗត្រូវបានបញ្ចប់ និងកន្លងហួសដោយសារ ក្រមប្រឆាំងទៅហើយ ។ នេះបើតាមការឲ្យដឹង ពីមន្ត្រីជាន់ខ្ពស់គណបក្សកាន់អំណាច ។
មន្ត្រីជាន់ខ្ពស់គណ បក្សប្រជាជនកម្ពុជា និងជាអ្នកនាំពាក្យ លោកសុខ ឥសាន បានឲ្យដឹងនៅថ្ងៃទី១៤ ខែមិថុនា វប្បធ៌មនយោបាយថ្មី របស់ក្រុមប្រឆាំង គឺគេចង់ឲ្យមានការជជែកពិភាក្សា សម្របសម្រួលគ្នា រវាងអ្នកនយោបាយ ។ លោកបានបញ្ជាក់ថា យ៉ាងដូច្នេះថា៖ «តើចង់ឲ្យជជែកគ្នានោះ មានខ្លឹមសារអ្វីទៅ ? នេះគឺជាល្បិចនយោបាយទេ ។ ពីមុនមកគេមិនដែលនិយាយ ពីការជជែកគ្នាទេ ។ ទើបតែគេ បរាជ័យងើបមុខ មិនរួចទើបគេលើកយកការ ជជែកមកនិយាយ» ។
លោកក៏បានរំឮកនូវ សំណួរមួយចំនួនយ៉ាងដូច្នេះថា តើអ្នកណាបំផ្លាញការជជែកនោះ? តើអ្នកណាបង្កើតពាក្យមាន ស៊ីអត់សែន និងមានសែនអត់ស៊ី? ឥឡូវមនុស្ស ដដែលនឹកឃើញការជជែក តាមការពិត គឺគេ(សម រង្ស៊ី) ហ្នឹងហើយ ជាអ្នកបំផ្លាញ ការជជែក ។ នៅពេលគេចាញ់ សន្លប់ទៅហើយនោះ ។ លោក សុខ ឥសាន បានអះអាងថា គ្មានការជែកគ្នានោះទេ សម្រាប់បក្សកាន់អំណាច និងអតីតក្រុមប្រឆាំង ពោលគឺរឿងនេះមិនអាចបក ក្រោយវិញបានទេ ។ «វាអាយុជីវិតជាតិ មិនអាចឲ្យជាតិ ទាំងមូលស្លាប់តាម ពួកអ្នកចាញ់បានទេ» ។ នេះបើតាមគូស បញ្ជាក់របស់អ្នកនាំពាក្យដដែល ។
ជាមួយគ្នានោះ ដែលលោក សុខ ឥសាន ក៏បានឆ្លើយតប ចំពោះការចង់ឲ្យមានការដោះ លែងលោកកឹម សុខា ជាការមិនអាច ទៅរួចដែរ ព្រោះតុលាការកំពុងបន្ត នីតិវិធី ។ លោកសង្កត់ធ្ងន់ថា៖ «ការដែលគេចង់បាន ពិតប្រាកដ គឺដោះលែងកឹម សុខា ឲ្យបក្សប្រឆាំងរស់ឡើងវិញ ឲ្យក្រុមប្រឹក្សា មកធ្វើការវិញ ដែលមិនអាចទៅ រួចឡើយ» ។
សូមជម្រាបថា ការលើកឡើងរបស់អ្នកនាំ ពាក្យគណបក្សកាន់ អំណាចនេះ បន្ទាប់ពីក្រុម ប្រឆាំងចង់ឲ្យមាន វប្បធម៌ថ្មី នៃការចរាចរ នយោបាយឡើងវិញ ។ ពិសេសនោះចង់ ឲ្យមានការ ដោះលែងលោកកឹម សុខា ឲ្យមានសេរីភាពផងដែរ ។ នេះបើតាមការបញ្ជាក់ របស់លោក យែម បុញ្ញឬទ្ធិ អតីតអ្នកនាំ ពាក្យគណបក្សសង្គ្រោះជាតិ ។ លោកយ៉ែម បុញ្ញឬទ្ធិ បានសរសេរលើបណ្តាញ សង្គមយ៉ាងដូច្នេះថា ៖ «យើងនាំគ្នាយកឱកាសបម្រើរាស្ត្ររៀបចំ សង្គមកសាងកែលម្អប្រព័ន្ធគ្រប់គ្រង ឱ្យកាន់តែល្អប្រសើរឡើង។ ព្យាយាមរកមធ្យោបាយកសាង កម្លាំងសេដ្ឋកិច្ច កម្លាំងធនធានមនុស្ស ពោល គឺកម្លាំងជាតិ ។ យើងត្រូវតែនាំគ្នា បន្តកសាងទំនុកទុក ចិត្តគ្នារវាងខ្មែរ និងខ្មែរ គោរពផ្ដល់តម្លៃគ្នា ទៅវិញទៅមកលុបបំបាត់វប្បធម៌ លាបពណ៌ មួលបង្កាច់ ជេរប្រមាថ ដែលនាំឱ្យមានការបែកបាក់ដល់សង្គមជាតិយើង» ។
លោកក៏បានបន្ថែមថា ក្ដីសង្ឃឹមលើកិច្ចសហប្រតិបត្តិការអន្តរជាតិល្អរក្សាផលចំណេញពី EBA GSP ស្តារ និងពង្រឹងលទ្ធិប្រជាធិបតេយ្យ ការគោរពសិទ្ធិមនុស្ស សិទ្ធិសេរីភាព យុត្តិធម៌សង្គម ការដោះលែងលោក កឹម សុខា ។ ដើម្បីផ្សះផ្សាជាតិឯកភាពជាតិ អភិវឌ្ឍន៍ ពង្រឹងកម្លាំងជាតិ និងកម្លាំងសេដ្ឋកិច្ច ៕
