សម្ដេចហ៊ុន សែន សម្រេចបញ្ចេញថវិកាជួយគ្រួសារអ្នកស្លាប់ និងរបួសក្នុងសោកនាដកម្មរលំបាក់អគារ
នៅមុននេះបន្តិច សម្ដេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានបង្ហោះសារចូលរួមរំលែកទុក្ខដល់គ្រួសាររងគ្រោះក្នុងសោកនាដកម្មរបាក់ស្រុតអគារនៅខេត្តព្រះសីហនុ ពីទីក្រុងបាងកក ដោយសម្រេចជួយដល់គ្រួសារអ្នកស្លាប់ដោយម្នាក់ទទួលបានកញ្ចប់ថវិកាចំនួន ៤០លានរៀល ឬ១ម៉ឺនដុល្លារ និងអ្នករបួស ៥លានរៀល។
តាមរយៈសារនៅលើទំព័រហ្វេសប៊ុក សម្ដេចបានថ្លែងរៀបរាប់ថាទាំងកណ្ដាលយប់មកថា «បងប្អូនជនរួមជាតិជាទីគោរពស្រឡាញ់ សោដនាដកម្មបាក់អគារនៅខេត្តព្រះសីហនុ គឺជារឿងឈឺចាប់របស់ជាតិយើងពិសេសក្រុមគ្រួសារនៃអ្នកដែលបានបាត់បង់ជិវិតដែលជាភរិយា ឬស្វាមី ឬកូនឬឪពុកម្តាយ។ល។ដើម្បីចូលរួមមរណទុក្ខ និងជួយដល់ជីវភាពក្រុមគ្រួសារ ក្នុងនាមរាជរដ្ឋាភិបាល ខ្ញុំសម្រេចបញ្ចេញថវិកាជាតិជួយដល់ក្រុមគ្រួសារអ្នកស្លាប់ក្នុងមួយនាក់៤០លានរៀល(សែសិបលានរៀល) ឬ១មុឺនដុល្លា(10.000$)។
សម្រាប់អ្នកត្រូវរបួសទាំងអស់ត្រូវទទួលបានការព្យាបាលដោយឥតគិតថ្លៃនៅតាមមន្ទីរពេទ្យរដ្ឋ និងទទួលបានជំនួយក្នុងមួយនាក់ចំនួន ៥លានរៀល(ប្រាំលានរៀល)។ ឯកឧត្តមប៊ិន ឈិន ឧបនាយរដ្ឋមន្ត្រីប្រចាំការ និងជារដ្ឋមន្រ្តីទីស្តីការគណៈរដ្ឋមន្ត្រីទទួលចាត់ចែងថវិការនេះជូនបងប្អូន។យប់នេះខ្ញុំនៅបន្តតាមដានការងាររុករក និងសង្រ្គោះជាមួយបងប្អូនតទៅទៀត៕
