លោក ផែង វណ្ណៈ ចេញពីពន្ធនាគារ ទើបបង្ហោះសារដំបូងលើ Facebook អានហើយរំជួលចិត្ត
ភ្នំពេញ៖ លោក ផែង វណ្ណៈ ដែលជាអ្នកសារព័ត៌មានល្បីតាមបណ្ដាញសង្គម Facebook ត្រូវបានតុលាការសម្រេចដោះលែងកាលពីថ្ងៃទី១៨ ខែមិថុនាកន្លងទៅ បន្ទាប់ពីអនុវត្តទោសបានគ្រប់គ្រប់តាមថ្ងៃកំណត់។ ប៉ុន្តែលោកទើបបង្ហោះលើទំព័រ Facebook ផ្ទាល់ខ្លួននៅថ្ងៃនេះ ដោយមានសារ២ គឺទី១ អរគុណដល់សម្ដេចតេជោ និងទី២ បង្ហាញការនឹករលឹកដល់អ្នកលេងបណ្ដាញសង្គមទាំងអស់គ្នា។
លោក ផែង វណ្ណៈ បានសរសេរបែបនេះថា៖ ខ្ញុំមកវិញហើយ នឹកបងប្អូនទាំងអស់គ្នាខ្លាំងណាស់ ហើយក៏សូមថ្លែងអំណរគុណចំពោះឯកឧត្ដម លោកជំទាវ លោកឧកញ៉ា លោក លោកស្រី បងប្អូនមិត្តភក្តិ និង ប្រជាជនទាំងក្នុងប្រទេស និង ក្រៅប្រទេស ដែលស្រលាញ់ រាប់អានខ្ញុំ បារម្ភពីខ្ញុំ។ ពេលនេះខ្ញុំសុខសប្បាយធម្មតាទេ ខ្ញុំនឹងបន្តការងារមនុស្សធម៌ ការងារសង្គមរបស់ខ្ញុំជាបន្តទៀតដើម្បីបំរើប្រជាជននិង ប្រទេសជាតិ ដោយឈរលើមូលដ្ឋានគោរពច្បាប់គោរពសិទ្ធិអ្នកដទៃ ដោយមិនអោយមានកំហុសឆ្គងជាថ្មីម្ដងទៀតឡើយ ។
ចំណែកសារមួយទៀត លោកបានសរសេរថា៖ "ខ្ញុំបាទសូមគោរពថ្លែងអំណរគុណសម្ដេចតេជោ ហ៊ុន សែន ដែលបានទទួលយកការសុំអភ័យទោសរបស់ខ្ញុំ និង បានយោគយល់ អត់ឱន អធ្យាស្រ័យចំពោះកំហុសឆ្គងរបស់ខ្ញុំក្នុងការសរសេរព័ត៌មានលើបណ្ដាញសង្គម Facebook ។ ខ្ញុំបាទសូមសន្យាថានឹងកែប្រែកំហុសឆ្គងរបស់ខ្ញុំមិនអោយកើតមានជាថ្មីម្ដងទៀតទេ ។ ខ្ញុំសូមគោរពជូនពរ សម្ដេចតេជោ ហ៊ុន សែន មានសុខភាពល្អ បរិបូរណ៌ អាយុយឺនយូរ ដើម្បីបន្តដឹកនាំនាវាកម្ពុជារក្សាបានសុខសន្តិភាព និងការអភិវឌ្ឍន៍ ។"
គួរបញ្ជាក់ថា សាលាដំបូងរាជធានីភ្នំពេញ បានប្រកាសសាលក្រមសម្រេចផ្តន្ទាទោសលោក ផែង វណ្ណៈ ដាក់ពន្ធនាគារមួយឆ្នាំ ប៉ុន្តែអនុវត្តទោស តែ២ខែ១៥ថ្ងៃ ក្រៅពីនោះព្យួរ និងសងជំងឺចិត្តតាមការទាមទាររបស់អង្គភាពព័ត៌មាន Fresh News ចំនួន១០០រៀល (២សំណុំរឿង=២០០រៀល) និងពិន័យប្រាក់ចូលរដ្ឋចំនួន៦លានរៀល។ កាលប្រកាសសាលក្រម ធ្វើឡើងនៅព្រឹកថ្ងៃទី១៧ ខែមិថុនា ឆ្នាំ២០១៩។
តាមការប្រកាសសាលក្រមជនជាប់ចោទ ផែង វណ្ណៈ ត្រូវបានដោះលែងឲ្យនៅក្រៅឃុំថ្ងៃទី១៨ ខែមិថុនា ឆ្នាំ២០១៩។ កាលពីថ្ងៃទី១៤ ខែមិថុនា ឆ្នាំ២០១៩ សាលាដំបូងរាជធានីភ្នំពេញ បានបើកសវនាការលើសំណុំរឿងជនជាប់ចោទ ផែង វណ្ណៈ ពាក់ព័ន្ធករណីញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបរិហាកេរ្តិ៍ជាសាធារណៈ ដោយនៅក្នុងសវនាការសាធារណៈនេះជនជាប់ចោទ ផែង វណ្ណៈ បានប្រកាសថា ខ្លួនពិតមានកំហុសក្នុងការជេរប្រមាថអង្គភាពព័ត៌មាន Fresh News និងត្រៀមធ្វើលិខិតសុំទោសមកកាន់អង្គភាពព័ត៌មាន Fresh News។
ដោយសារការចេះទទួលស្គាល់កំហុសរបស់ខ្លួននៅចំពោះមុខអង្គសវនាការថា ពិតជាបានប្រព្រឹត្តិនូវបទល្មើសដូចព្រះរាជអាជ្ញាចោទប្រកាន់ ដូច្នេះអង្គភាពព័ត៌មាន Fresh News សូមផ្លាស់ប្តូរនូវពាក្យបណ្តឹងរបស់ខ្លួន ដែលពាក្យបណ្តឹងពីមុនទាមទារសំណងជំងឺចិត្តចំនួន៥០ម៉ឺនដុល្លារ មកតែ១០០រៀលវិញ។
នៅក្នុងសវនាការកាលពីថ្ងៃទី១៤ ខែមិថុនា កន្លងទៅលោកមេធាវី គី តិច មេធាវីការពារសិទ្ធិនិងជាតំណាងឲ្យសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានស្នើសុំឲ្យតុលាការផ្តន្ទាទោសលោក ផែង វណ្ណៈ ទៅតាមច្បាប់ ប៉ុន្តែមិនទាមទារសំណងជំងឺចិត្តពីជនជាប់ចោទនោះទេ។
លោក គី តិច បានលើកឡើងយ៉ាងដូច្នេះថា «ការបង្ហោះសារ និងរូបភាពប្រៀបធៀបរបស់ជនជាប់ចោទ ពិតជាបានធ្វើឲ្យប៉ះពាល់ដល់កិត្តិយស និងធ្វើឲ្យមានការយល់ច្រឡំ លើសម្តេចតេជោប្រាកដមែន។ ប៉ុន្តែដោយសារជនជាប់ចោទមានការភ្ញាក់រលឹកទទួលស្គាល់កំហុស និងសុំទោសជាសាធារណៈចំពោះទង្វើរបស់ខ្លួន ដូច្នេះសម្តេចតេជោ មិនបានទាមទារសំណងពីជនជាប់ចោទនោះ»។
