អ្នកសុំសិទ្ធិនយោបាយអតីតបក្សប្រឆាំងអំពាវនាវ EU ជួយសម្រួលរក្សាទុក EBA និងស្តាលទ្ធិប្រជាធិបតេយ្យកម្ពុជា
រាជធានីភ្នំពេញ ៖ អតីតអ្នកតំណាងរាស្ត្រគណបក្សសង្គ្រោះជាតិដែលបានសុំសិទ្ធិនយោបាយបានអំពាវនាវដល់គណៈកម្មការពាណិជ្ជកម្មសហគមន៍អឺរ៉ុប (EU) ឲ្យជួយសម្របសម្រួលធ្វើយ៉ាងណារក្សាទុកប្រព័ន្ធអនុគ្រោះពន្ធគ្រប់ប្រភេទ (EBA) ដើម្បីស្តាលទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជា ។
លោកអ៊ូ ច័ន្ទរ័ត្ន អតីតអ្នកតំណាងរាស្ត្រគណបក្សសង្គ្រោះជាតិ និងអ្នកមួយចំនួនទៀតបានសេចក្តីថ្លែងនៅថ្ងៃទី០៥ ខែមិថុនា ឆ្នាំ២០១៩ថា អ្នកដឹកនាំនយោបាយគ្រប់និន្នាការគួរតែងាកមកស្វែងរកដំណោះស្រាយបញ្ហាចំពោះមុខរវាងខ្មែរ និងខ្មែរក្រោមម្លប់នៃអង្គព្រះមហាក្សត្រស្របតាមរដ្ឋធម្មនុញ្ញកម្ពុជា ដើម្បីបញ្ចប់វិបត្តិនយោបាយរក្សាប្រព័ន្ធអនុគ្រោះពន្ធ EBA និងប្រព័ន្ធដកពន្ធរបស់អាមេរិក (GSP) ។
ថ្លែងការណ៍បន្តថា «ខ្ញុំក៏សូមអំពាវនាវដល់គណៈកម្មការពាណិជ្ជកម្មសហគមន៍អឺរ៉ុបមេត្តាជួយសម្របសម្រួលយ៉ាងណាក្នុងការរក្សាទុកប្រព័ន្ធអនុគ្រោះពន្ធ EBA និងស្តាលទ្ធិប្រជាធិបតេយ្យ និងការគោរពសិទ្ធិមនុស្សអោយបានដល់កម្ពុជា» ។ ថ្លែងការណ៍របស់អតីតអ្នកតំណាងរាស្ត្ររូបនេះបានឲ្យដឹងទៀតថា ទាំង EBA ទាំងលទ្ធិប្រជាធិបតេយ្យ និងការគោរពសិទ្ធិមនុស្សសុទ្ធតែមានសារសំខាន់សម្រាប់ពលរដ្ឋ និងអនាគតកម្ពុជា ។ ការបាត់បង់ប្រព័ន្ធអនុគ្រោះពន្ធ EBA នឹងនាំមកនូវសម្ពាធអន្តរជាតិជាបន្តបន្ទាប់ដូចជា ប្រព័ន្ធ GSP របស់អាមេរិកជាដើម ដែលនឹងប៉ះពាល់ដល់ជីវភាពពលរដ្ឋខ្មែររាប់លាននាក់ការលូតលាស់របស់កម្ពុជា និងការដាក់ប្រទេសទាំងមូលក្នុងភាពប្រថុយប្រថានទាំងសេដ្ឋកិច្ច និងទាំងនយោបាយ ។
លោកសង្កត់ធ្ងន់ថា ការបន្ទន់ឥរិយាបថរកគ្នារវាងថ្នាក់ដឹកនាំជាគន្លឹះឈានទៅរកដំណោះស្រាយរវាងខ្មែរ និងខ្មែរ ហើយនឹងអាចការពារសមិទ្ធផលទាំងផ្នែកប្រជាធិបតេយ្យសេដ្ឋកិច្ច ដែលបានកសាងនាពេលកន្លងមក និងទៅអនាគត ។
សូមរំឮកថា សហគមន៍អឺរ៉ុបបានចាប់ផ្តើមនីតិវិធីជាផ្លូវការ ផ្អាកជាបណ្តោះអាសន្នលើប្រព័ន្ធអនុគ្រោះពន្ធលើមុខទំនិញគ្រប់ប្រភេទលើកលែងតែអាវុធ (EBA) កាលពីថ្ងៃទី១៣ ខែកុម្ភៈ ឆ្នាំ២០១៩ មុននឹងអាចឈានទៅរកការព្យួរនាខែកុម្ភៈ ឆ្នាំ២០២០ ប្រសិនបើរកឃើញថា កម្ពុជាអនុវត្តមិនត្រឹមត្រូវទៅរកភាពល្អប្រសើរគ្រប់គ្រាន់ទៅលើបញ្ហាសិទ្ធិមនុស្ស និងប្រជាធិបតេយ្យ ។ អតីតមន្ត្រីជាន់ខ្ពស់បក្សប្រឆាំងថ្លែងការណ៍ដែលអំពាវនាវដល់សហគមន៍អឺរ៉ុបរួមមានលោក អ៊ូ ច័ន្ទរ័ត្ន លោកកង គីមហាក់ លោក ជីវកត្តា ៕
