មន្ត្រីសង្គមស៊ីវិលប្រាប់ប្រតិភូអឺរ៉ុបថា របបភ្នំពេញមិនស្មោះត្រង់ បើកលំហសេរីភាពឱ្យខ្លួន
ភ្នំពេញៈ មន្ត្រីសង្គមស៊ីវិលបានប្រាប់ មន្ត្រីប្រតិភូបេសកកម្មស្វែងរក ការពិតរបស់សហភាពអឺរ៉ុប ពីស្ថានភាពជាក់ស្ដែងនៅកម្ពុជាថា រដ្ឋាភិបាលមិនមានភាពស្មោះត្រង់ នៅក្នុងការបើកលំហសេរីភាព របស់អង្គការសង្គមស៊ីវិលនោះទេ។
ការលើកឡើងនេះ ធ្វើឡើងនៅក្នុងកិច្ចប្រជុំមួយ នាល្ងាចថ្ងៃទី៥ មិថុនា រវាងតំណាងអង្គការ សង្គមស៊ីវិលចំនួន ៦ និងមន្ត្រីប្រតិភូបេសកកម្ម ស្វែងរកការពិត របស់សហភាពអឺរ៉ុប ដើម្បីពិនិត្យមើល ស្ថានភាពវិវឌ្ឍចុងក្រោយ នៅកម្ពុជា មុននឹងឈានទៅសម្រេចថា តើត្រូវព្យួរប្រព័ន្ធអនុគ្រោះពន្ធ EBA ឬយ៉ាងណា។
លោក សឹង សែនករុណា បដិសេធន៍ ទម្លាយឱ្យដឹងពីឈ្មោះរបស់ អង្គការសង្គមស៊ីវិលទាំងនោះ តែលោកថា ភាគច្រើន មកពីផ្នែកសិទ្ធិមនុស្ស និងការតស៊ូមតិ។ ក្នុងជំនួបជិតពីរម៉ោងនេះ លោកថា អ្វីដែលមន្ត្រីប្រតិភូ សហភាពអឺរ៉ុបផ្ដោតសំខាន់នោះ គឺពីដំណើរវិវឌ្ឍ និងការប្រែប្រួល ចុងក្រោយ នៃស្ថានភាពលំហសេរីភាពអង្គការ សង្គមស៊ីវិល។ លោកថា ជារួមនៅមានស្ថានភាពរឹតត្បិត សិទ្ធិសេរីភាពនៃការជួបប្រជុំ និងការគំរាមកំហែង ផ្នែកសិទ្ធិនយោបាយ ដែលរដ្ឋាភិបាលកំពុងធ្វើទុក្ខបុកម្នេញនៅឡើយ៖ «អ៊ីចឹងយើងបានលើកឡើងថា ទោះបីថាមានលក្ខណៈដូចជា បើកទូលាយនៅថ្នាក់ជាតិមែន ប៉ុន្តែយើងវាស់វែង ជាមួយសកម្មភាពមួយចំនួនហ្នឹង គឺអត់មានភាពស្មោះត្រង់នៅក្នុងការបើកឱ្យមានលំហទូលំទូលាយនោះទេ។ ជាក់ស្ដែងយើងលើកព្រឹត្តិការណ៍ធំៗ មួយចំនួន ដែលក្រោយពីចេញ លិខិតហ្នឹងហើយ មានដូចជាបុណ្យ ១០ ធ្នូ ទិវាសិទ្ធិនារី ទិវាពលកម្មអន្តរជាតិ ជាដើម ជាពិសេសរឿងខ្មែរកម្ពុជាក្រោម ដែលគាត់ធ្វើទិវារំឭកខួបជាដើម គឺសុំកន្លែងសាធារណៈដែលដាក់ថា ទីលានប្រជាធិបតេយ្យ ហើយបែរជាមិនឱ្យ មានការជួបជុំប្រមូលផ្តុំ ដើម្បីបញ្ចេញមតិ។ យើងគិតថា ជារឿងមួយដែលឆ្លុះបញ្ចាំង ផ្ទុយពីគោលការណ៍លទ្ធិប្រជាធិបតេយ្យ និងមានការគោរពសេរីភាពរបស់សិទ្ធិមនុស្ស»។
ជំនួបជាមួយសង្គមស៊ីវិល លើកនេះ គឺជាផ្នែកមួយនៃដំណើរ បេសកកម្មស្វែងរកការពិតនៅកម្ពុជា ជាលើកទីពីរ ដើម្បីបន្តពិគ្រោះយោបល់ជាមួយគ្រប់ភាគីពាក់ព័ន្ធនៅកម្ពុជា ក្រោយសហភាពអឺរ៉ុប បានដំណើរការនីតិវិធីដកហូតប្រព័ន្ធអនុគ្រោះពន្ធ EBA របស់ខ្លួនជាផ្លូវការ កាលពីពាក់កណ្តាលខែកុម្ភៈ កន្លងទៅ។ សារព័ត៌មានក្នុងស្រុក រាយការណ៍ថា មន្ត្រីប្រតិភូសហភាពអឺរ៉ុប គ្រោងជួបជាមួយតំណាង រដ្ឋាភិបាល ក្នុងនោះមាន រដ្ឋមន្ត្រីក្រសួងការបរទេស និងកិច្ចសហប្រតិបត្តិការ អន្តរជាតិ ក្រសួង រៀបចំដែនដី នគរូបនីយកម្ម និងសំណង់ នៅថ្ងៃព្រហស្បតិ៍ស្អែកនេះ និង គ្រោងជួបជាមួយរដ្ឋមន្ត្រី ក្រសួងមហាផ្ទៃ និងក្រសួងការងារ នៅថ្ងៃសុក្រ មុន នឹងបិទបញ្ចប់បេសកកម្ម របស់ខ្លួននៅចុង ឬដើមសប្ដាហ៍ក្រោយនេះ៕
![]()
![]()
![]()