សម្តេចតេជោ ទោះបីឡើងភ្នំភ្លើងក៏ត្រូវទៅទីក្រុងហ្សឺណែវបង្ហាញវឌ្ឍនភាពពីបញ្ហាសិទ្ធិមនុស្សរបស់កម្ពុជានៅ UN
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋនាយករដ្ឋមន្ត្រីបានអះអាងថា ទោះបីជាត្រូវឡើងភ្នំភ្លើងយ៉ាងណាក៏ដោយ ក៏ត្រូវទៅទីក្រុងហ្សឺណែវដែរ ព្រោះដើម្បីបង្ហាញពីវឌ្ឍនៈភាពពីបញ្ហាសិទ្ធិមនុស្សនៅកម្ពុជាឲ្យអង្គការសហប្រជាជាតិ (UN) បានដឹងច្បាស់ ។ សម្តេចតេជោហ៊ុន សែន នាយករដ្ឋមន្ត្រីបានឲ្យដឹងក្នុងពិធីផ្ទេរការគ្រប់គ្រងសាលាពិការ គ ថ្លង់ ឱ្យស្ថិតក្រោមការគ្រប់គ្រងរបស់ក្រសួងអប់រំ យុវជន និងកីឡាវិញ នាព្រឹកថ្ងៃទី០១ ខែកក្កដានេះ ថាសម្តេចនឹងចូ លរួមបង្ហាញវឌ្ឍនភាពនៃដំណើរសិទ្ធិមនុស្សរបស់កម្ពុជានៅទីស្នាក់ការសិទ្ធិមនុស្សរបស់ អង្គការសហប្រជាជាតិ នៅថ្ងៃទី៤ ខែកក្កដាខាងមុខនេះ ។
សម្តេចបញ្ជាក់ថា៖«ថ្ងៃទី៤ កក្កដានេះ ខ្ញុំនឹងទៅអានសន្ទករថា នៅទីស្នាក់ការសិទ្ធិមនុស្សនៅទីស្នាក់ការអង្គការសហប្រជាតិ ដើម្បីបង្ហាញពីវឌ្ឍនភាពនៃដំណើរការសិទ្ធិមនុស្សរបស់កម្ពុជា វាយ៉ាងដូច្នេះ» ។ សម្តេចតេជោបានគូសបញ្ជាក់ថា ៖«ខ្ញុំមិនដឹងថា មានបាតុកម្មប្រឆាំងនឹងខ្ញុំឬអត់ តែទោះ បីជាឡើងភ្នំភ្លើងក៏ខ្ញុំទៅទីក្រុងហ្សឺណែវដែរ ។ ខ្ញុំមិនចង់ធ្វើជាគ្រូព្រានប្រដៅនរណាទេ ។ តែក៏មិនចង់ឲ្យនរណាមកធ្វើជាគ្រូព្រានប្រដៅសម្រាប់យើងដែរ ក្នុងឋានៈ ជារដ្ឋ ឯករាជ្យ និងអធិបតេយ្យ ! ហើយខ្ញុំមិនដឹងថា មានបាតុកម្មប្រឆាំងខ្ញុំ ឬអត់ ? តែបើ ទោះបីជា ឡើងភ្នំភ្លើងក៏ខ្ញុំទៅហ្សឺណែវដែរ ។ ដោយល្ងាចម៉ោង៤ថ្ងៃទី ០៤ ខែកក្កដា ខ្ញុំនឹងជួប ពលរដ្ឋខ្មែរយើងប្រមាណជា៧០០នាក់ ព្រោះ កន្លែងក៏ពិបាក ហើយ ម្យ៉ាងទៀតចំ ថ្ងៃធ្វើការ ដែលខ្ញុំនឹងជួបពួកនិស្សិត និងពលរដ្ឋខ្មែរយើង ដែល រស់នៅប្រទេស នៅអឺរ៉ុប» ។
ជាមួយគ្នានោះដែរសម្តេចតេជោក៏បានរំលឹកថា កាលពីទៅទីក្រុងហ្សឺណែវលើកមុនថា គេធ្វើបាតុកម្ម ប៉ុន្តែដល់ពេលទៅដល់អត់មានអ្នកណាធ្វើបាតុកម្មនោះទេ ។ ដែលចំណុចនេះធ្វើឲ្យ មានចម្ងល់ទៅវិញ ។ សម្តេចក៏បានអំពាវនាវដល់អ្នកប្រឆាំងដែលរស់នៅទីក្រុងហ្សឺណែវចេញមកតទល់ជាមួយក្រុមអ្នកគាំទ្ររាជរដ្ឋាភិបាលមើលថា តើវាយ៉ាងម៉េច ? ។ សម្តេចក្រុមអ្នកធ្វើបាតុកម្មមានចំនួនតិចជាងក្រុមអ្នកស្វាគមន៍នាយករដ្ឋមន្ត្រីរបស់ប្រទេសនោះទេ ។ សម្តេចបានចំអកទៅក្រុមប្រឆាំងថា សម្តេចបានប្រកាសពីគម្រោងទៅទីក្រុងហ្សឺណែវរយៈពេលច្រើនថ្ងៃមកហើយ ដួច្នេះអាចប្រមូលមនុស្សដែលមាននិន្នការប្រឆាំងបានសម្រាប់ធ្វើបាតុកម្ម ហើយ ។ សម្តេចថា ៖«មកធ្វើបាតុកម្មមក ដើម្បីប្រមូលរឿងបានឲ្យច្រើនកាន់តែល្អ ខ្ញុំមិនឌឺឲ្យអ្នកណាទេ» ។
សូមជម្រាបថា សម្តេចតេជោបានថ្លែងដូច្នេះតែ៣ថ្ងៃប៉ុណ្ណោះ មុនពេលសម្តេចនឹង អញ្ជើញ ឡើងថ្លែងការណ៍អំពីស្ថានភាពសិទ្ធិមនុស្សនៅកម្ពុជា នៅក្នុងកិច្ចប្រជុំក្រុមប្រឹក្សាសិទ្ធិមនុស្ស របស់ អង្គការសហប្រជាជាតិនៅទីក្រុងហ្សឺ ណែវ ប្រទេសស្វីស នាថ្ងៃទី០៤ ខែកក្កដានេះ ៕
