លោក George EDGAR៖ EBA បាត់បង់ ឬបន្ត គឺស្ថិតក្នុងដៃរដ្ឋាភិបាលកម្ពុជា
ភ្នំពេញ៖ មុនចាកចេញពីប្រទេសកម្ពុជា លោក George EDGAR ឯកអគ្គរដ្ឋទូតសហភាពអឺរ៉ុបប្រចាំកម្ពុជាផុតអាណត្តិ បានជំរុញឲ្យរដ្ឋាភិបាលបន្តគោរព និងលើកកម្ពស់សិទ្ធិមនុស្សឡើងវិញ ដើម្បីរក្សាប្រព័ន្ធអនុគ្រោះ«អ្វីគ្រប់យ៉ាងលើកលែងតែអាវុធ, EBA»។ លោកលើកឡើងថា ប្រសិនបើកម្ពុជាបាត់បង់ EBA អ្នករងគ្រោះពិតប្រាកដគឺពលរដ្ឋក្រីក្រ ជាពិសេសអ្នកធ្វើការក្នុងវិស័យកាត់ដេរ។
ប្រសាសន៍របស់លោក George EDGAR ជាភាសាអង់គ្លេស៖
អគ្គរដ្ឋទូតផុតអាណត្តិរូបនេះ បានលើកឡើងថា សហភាពអឺរ៉ុបមិនចង់ដក EBA ពីកម្ពុជានោះទេ ដូច្នេះ ការបាត់បង់ ឬបន្តនៃប្រព័ន្ធអនុគ្រោះពន្ធពាណិជ្ជកម្ម គឺស្ថិតនៅលើកណ្ដាប់ដៃនៃរាជរដ្ឋាភិបាលកម្ពុជា។
«យើងមានគោលជំហរច្បាស់លាស់តាំងពីដំណើរការលើកដំបូងមកម្ល៉េះ គោលបំណងពិតរបស់យើងមិនមែនដកប្រព័ន្ធអនុគ្រោះពន្ធពាណិជ្ជកម្មនោះទេ ប៉ុន្តែដំណើការនាពេលបច្ចុប្បន្ននេះទាក់ទងទៅនឹងលក្ខខណ្ឌដែលប្រទេសទទួលបាន EBA ត្រូវតែគោរពទៅតាមគោលការណ៍របស់អង្គការសហប្រជាជាតិ និងអនុសញ្ញារបស់អង្គការពលកម្មអន្តរជាតិ»។ នេះជាប្រសាសន៍របស់លោក George Edgar ។
ថ្លែងប្រាប់អ្នកសារព័ត៌មានក្រោយជួបជាមួយយុវជន ក្នុងកម្មវិធី Politikoffee កាលពីរសៀលថ្ងៃទី ១៣ ខែ កក្កដា ឆ្នាំ២០១៩ លោកបានបន្តទៀតថា៖«មានក្តីបារម្ភមួយចំនួនត្រូវបានលើកឡើងថា ប្រទេសកម្ពុជាបានរំលោភទៅនឹងគោលការណ៍ទាំងនោះ។ ដូច្នេះអ្វីដែលយើងចង់ឃើញគឺ អាជ្ញាធរកម្ពុជាត្រូវតែដោះស្រាយនូវបញ្ហាទាំងនោះ ដើម្បីជំរុញឲ្យកម្ពុជាដើរស្របតាមគោលការណ៍ដែលបានដាក់ចេញនោះ។ ហើយទៅថ្ងៃអនាគតគ្មានការចោទសួរលើករណី EBAទៀតនោះទេ»។
លោក George EDGAR បានបន្ថែមថា ក្នុងករណីប្រទេសកម្ពុជាអាចស្ដារស្ថានភាពល្អប្រសើរឡើងវិញ នោះកម្ពុជានឹងអាចបន្តទទួលបានប្រព័ន្ធអនុគ្រោះពន្ធពាណិជ្ជកម្ម រហូតដល់ឆ្នាំ២០២៥។
គួររម្លឹកថា កាលពីខែកុម្ភៈ ឆ្នាំ២០១៩ គណកម្មការសហភាពអឺរ៉ុបប្រកាសចាប់ផ្តើមដំណើរការជាផ្លូវការនៃការអនុវត្តនីតិវិធីពិនិត្យលើប្រព័ន្ធអនុគ្រោះពន្ធ EBA ដែលមានរយៈពេល ១៨ ខែ៕
![]()
![]()
![]()