លោក ប្រាយុទ្ធ ស្គាល់រសជាតិត្រូវបានសួរដេញដោលនៅក្នុងសភា
អន្តរជាតិ៖ ចូលរួមប្រជុំសភាលើកដំបូងនៅថ្ងៃទី២៥ ខែកក្កដា នាយករដ្ឋមន្ត្រីថៃ ប្រាយុទ្ធ ចន្ទអូចា ត្រូវបានសមាជិកសភាបក្សប្រឆាំងវាយប្រហារខ្លាំងអំឡុងពេលជជែកដេញដោញពីគោលនយោបាយរដ្ឋាភិបាលរបស់លោក។ នេះជារសជាតិមួយដែលលោក ប្រាយុទ្ធ មិនដែលជួបឡើយចាប់តាំងពីការឡើង កាន់អំណាចដំបូងក្នុងរដ្ឋាភិបាល យោធារហូតដល់រដ្ឋាភិបាលស៊ីវិលបច្ចុប្បន្ន។ អតីតមេរដ្ឋប្រហារឆ្នាំ២០១៤ រូបនេះ នឹងជួបការដេញដោលរបៀបនេះ ញឹកញាប់ទៀតក្នុងអាណត្តិរបស់ខ្លួន។
នាយករដ្ឋមន្ត្រីថៃ ប្រាយុទ្ធ ចន្ទអូចា នៅថ្ងៃទី២៥ ខែកក្កដា បានប្រកាសគោលនយោបាយ របស់ដ្ឋាភិបាលថ្មីរបស់លោកក្នុង កិច្ចប្រជុំរដ្ឋសភា។ នេះ ជាវត្តមានលើក ដំបូងរបស់លោក ប្រាយុទ្ធ ក្រោយក្លាយ ជានាយករដ្ឋមន្ត្រីថ្មីក្នុងអាណត្តិសភាស៊ីវិលដែលកើតចេញពីការបោះឆ្នោតថ្ងៃទី២៤ ខែមីនា។ ខុសពីសភាដែលតែងតាំងដោយយោធាក្រោយរដ្ឋប្រហារថ្ងៃទី២២ ខែឧសភា ឆ្នាំ២០១៤ សភាថៃសព្វថ្ងៃ មិនបានទុកមុខឲ្យលោក ប្រាយុទ្ធ ឡើយ។
សមាជិកសភាក្រុមប្រឆាំង ចាប់ផ្ដើមសង្គ្រប់លោក ប្រាយុទ្ធ តាំងពីមុនពេលលោកអានគោលនយោបាយទៅទៀត។ លោក Piyabutr Saengka nok kul សមាជិកសភាបក្សអនាគត ឈានមុខ បានរិះគន់លោក ប្រាយុទ្ធ ថា មិនបានស្បថចូល កាន់តំណែងត្រឹមត្រូវចំពោះមុខព្រះភក្ត្រ មហាក្សត្រ។ ប៉ុន្តែសមាជិកសភាបក្សកម្លាំងប្រជារាស្ត្រ បានចេញមុខការពារនាយករដ្ឋមន្ត្រីរូបនេះ។ តទៅ លោក ប្រាយុទ្ធ ក៏បន្តអានទៀត។
ក្រោយចាប់ផ្ដើម ប្រកាសគោលនយោបាយថ្មីបន្តិច សមាជិកសភាមកពីប្លុកប្រឆាំង ចាប់ផ្ដើមតវ៉ាជាថ្មីទៀត ហើយម្ដងនេះ គឺសមាជិកសភាមកពីបក្សប្រឆាំង ដ៏ធំភឿថៃវិញម្ដង។ សមាជិកសភាបក្សភឿថៃ បានរិះគន់លោក ប្រាយុទ្ធ ដែលមិនអានគោលនយោបាយរដ្ឋាភិបាលតាមឯកសារដើមដែលបានចែកឲ្យសមាជិកសភា។ សមាជិកសភាទាំងនេះ អះអាងថា បទបញ្ជាសភាតម្រូវឲ្យលោក ប្រាយុទ្ធ ត្រូវតែអានតាមសំណៅដើមដាច់ខាត។
បើតាមកាសែតបាងកកប៉ុស្តិ៍ សមាជិកសភាក្រុមប្រឆាំង ក៏និយាយដែរថា លោក ប្រាយុទ្ធ ក៏មិនត្រូវស្រមៃថា អាចថ្លែងទៅកាន់សមាជិកសភាដូចដាក់បញ្ជាឲ្យកូនទាហាន ឬក៏ចង់និយាយអ្វីក៏បាននោះដែរ។ បានន័យថា អ្វីដែលលោកត្រូវធ្វើក្នុងពេលប្រកាសគោលនយោបាយដឹកនាំប្រទេសនោះ គឺអានតាមឯកសារតែមួយគត់។
សំណើរបស់ក្រុមសមាជិកសភាបក្សភឿថៃ ត្រូវបានប្រធានសភា Chuan Leekpai នៃបក្សប្រជាធិបតេយ្យទទួលយក ហើយបានណែនាំឲ្យលោកនាយករដ្ឋមន្ត្រីអនុវត្តតាមបទបញ្ជាសភា។ តមក លោក ប្រាយុទ្ធ ក៏បានបន្ថយសំឡេង ហើយអានគោលនយោបាយរដ្ឋាភិបាលរបស់លោកតាមឯកសារដើមរហូតដល់ចប់។ ប្រមុខរដ្ឋាភិបាលស៊ីវិលរូបនេះ ក៏បានអរគុណសមាជិកសភាម្នាក់នៃបក្សភឿថៃដែលរិះគន់រូបលោកទៀតផង។
លោក ប្រាយុទ្ធ ដែលដឹកនាំប្រទេសអស់ប្រាំឆ្នាំក្រោមរដ្ឋាភិបាលយោធានោះ ទំនងមិនទាន់ស៊ាំនឹងការដេញដោលក្នុងសភាបែបនេះឡើយ។ នេះ ក៏ព្រោះតែសមាជិកសភាដែលកើតចេញពីការលើកបន្តុបរបស់យោធាមានលោក ប្រាយុទ្ធ ជាប្រមុខផ្ទាល់នោះ មិនបានបើកឲ្យការមានជជែកអ្វីតាមគោលការណ៍ប្រជាធិបតេយ្យឡើយអ្វីឡើយ។ យ៉ាងណាមិញ នេះគ្រាន់តែជាការចាប់ផ្ដើមប៉ុណ្ណោះ ព្រោះលោកអាចជួបរឿងនេះច្រើនលើកទៀតក្នុងអាណត្តិជានាយករដ្ឋមន្ត្រី។
![]()
![]()
![]()