ស្នងការខេត្តបាត់ដំបង ៖ ឃើញ សម រង្ស៊ី ចូលច្រកណាក៏ដោយចាប់ខ្លួនជាបន្ទាន់
ខេត្តបាត់ដំបង ៖ «បើឃើញវត្តមានអតីតមេបក្សប្រឆាំង សម រង្សី ចូលតាមច្រកព្រំដែនណាមួយមន្ត្រីនគរបាលនៅ ទីនោះត្រូវអនុវត្តវិធានការ ចាប់ខ្លួនជាបន្ទាន់តាមដីកា បង្គាប់របស់តុលាការដែលមានស្រាប់ »។ លោកឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង បានថ្លែងយ៉ាងដូច្នេះក្នុងកិច្ចប្រជុំបូកសរុបលទ្ធផលការងារប្រចាំខែ មិថុនា ឆ្នាំ២០១៩ និងលើក ទិសដៅបន្តសម្រាប់ខែ កក្កដា ឆ្នាំ ២០១៩ ។
នៅចំពោះមុខមន្ត្រីនគរបាលការពារព្រំដែនគោកជាប់ព្រំដែនព្រះរាជាណាចក្រថៃ ព្រមទាំងអធិការដ្ឋាននគរបាលក្រុង ស្រុក ពិសេសស្រុកចំនួន៤ ដែលមានភូមិសាស្ត្រជាប់ព្រំដែន គឺស្រុកសំពៅលូន ស្រុកភ្នំព្រឹក ស្រុកកំរៀង និងស្រុកសំឡូត ខេត្តបាត់ដំបង ដែលមានភារកិច្ចរក្សាការពារសន្តិសុខសណ្តាប់ធ្នាប់សង្គមនៅទីនោះ ត្រូវតែចាប់ខ្លួនភ្លាមបើឃើញវត្តមានអតីតមេបក្សប្រឆាំង សម រង្សី នៅក្នុងភូមិសាស្ត្រទទួលខុសត្រូវរបស់ខ្លួន ។
លោកឧត្តមសេនីយ៍ទោបានសង្កត់ធ្ងន់ថា កងកម្លាំងនគរបាលជាតិ ចំណុះស្នងការដ្ឋាននគរបាល ខេត្តបាត់ដំបងទាំងអស់បានត្រៀមលក្ខណៈជាប់ជា ប្រចាំដើម្បីរង់ចាំទទួលនូវបទបញ្ជារបស់លោកនាយឧត្តមសេនីយ៍សន្តិបណ្ឌិតអគ្គស្នងការនគរបាលជាតិ ចេញប្រតិបត្តិការជាបន្ទាន់ធ្វើការបង្ក្រាបបានទាន់ពេលវេលាចំពោះជនណា ឬក្រុមណាដែលមានគោលបំណងបំផ្លិចបំផ្លាញសុខសន្តិភាព បំផ្លិចបំផ្លាញសេចក្តីសុខសាន្តរបស់ប្រជាពលរដ្ឋនៅមូលដ្ឋាន និងការអភិវឌ្ឍន៍ប្រទេសជាតិ ឬជនណាដែលមានចេតនាបង្កចលាចល ធ្វើឲ្យសង្គមមានភាពវឹកវរដោយសារខ្លួន ។
លោកឧត្តមសេនីយ៍ទោបានសង្កត់ធ្ងន់បន្តថា ក្រៅពីនោះមន្ត្រីនគរបាលគ្រប់ថ្នាក់ គ្រប់អង្គភាពត្រូវយកចិត្តទុកដាក់ ពិនិត្យសង្កេតតាមដាននូវរាល់បាតុភាពកុហក បោកប្រាស់ ភូតភរ បំភិតបំភ័យ អុជអាល ញុះញង់របស់ក្រុមមនុស្សមួយចំនួន ដែលពួកគេមានគោលបំណង និងមហិច្ឆិតាផ្តួលរំលំរាជរដ្ឋាភិបាលស្របច្បាប់ ហើយជានិច្ចជាកាលតែងតែប្រើប្រាស់គ្រប់សកម្មភាព ឧបាយកល និងគ្រប់រូបភាពជាច្រើនទម្រង់ដើម្បីបំភ័ន្តមតិជាតិ មតិអន្តរជាតិ និងធ្វើឲ្យមានការភ័ន្តច្រឡំក្នុងមជ្ឈដ្ឋានប្រជាពលរដ្ឋទូទៅ ៕
![]()
![]()
![]()