សម្តេចអគ្គ មហាសេនាបតី តេជោ ហ៊ុន សែន ខឹងសម្បារនឹងអ្នកបន់ឱ្យសម្តេចឆាប់ស្លាប់ពេលសម្តេចទៅព្យាបាលនៅសិង្ហបុរី
ភ្នំពេញ៖ សម្តេច ហ៊ុន សែន ថ្នាក់ដឹកនាំរដ្ឋាភិបាលក្រុងភ្នំពេញ ប្រតិកម្មខឹងសម្បារ ដល់អ្នកប្រើប្រាស់ហ្វេសប៊ុក (Facebook) ដែលហ៊ានចូលទៅបញ្ចេញមតិ (Comment) បន់ស្រន់ឱ្យលោកស្លាប់ ដោយសារជំងឺ។ ប្រតិកម្មនេះ គឺធ្វើឡើងក្នុងពេលសម្តេចកំពុងសម្រាកព្យាបាលជំងឺនៅមន្ទីរពេទ្យប្រទេសសិង្ហបុរី។
សម្តេច ហ៊ុន សែន ថាមានមនុស្សមួយចំនួន ដែលសម្តេចថា ជនមួយក្ដាប់តូច លួចចូលបញ្ចេញមតិ ឬបង្ហោះតាមហ្វេសប៊ុកបន់ឱ្យសម្តេចឆាប់ស្លាប់ និងបង្កើតព័ត៌មានក្លែងក្លាយអំពីស្ថានភាពជំងឺរបស់របស់សម្តេច។ សម្តេច ហ៊ុន សែន ព្រមានឱ្យអ្នកហ៊ានបង្ហោះសារបន់ឱ្យសម្តេចឆាប់ស្លាប់ ឬក្លែងស្ថានភាពជំងឺរបស់សម្តេចឱ្យឈប់ជាបន្ទាន់ ព្រោះសម្តេចមិនងាយស្លាប់ទេ។
សម្តេច ហ៊ុន សែន ហៅការចូលទៅបញ្ចេញមតិ និងបង្កើតព័ត៌មានថា សម្តេចឈឺធ្ងន់ ជា ការធ្វើនយោបាយរង់ចាំឱ្យសម្តេចស្លាប់ ដើម្បីដណ្ដើមអំណាច។ តែសម្តេចផ្ដាំថា ឱ្យរង់ចាំជាតិក្រោយ ព្រោះយមរាជមិនត្រូវការជីវិតសម្តេចទេ រយ:ពេល៤០ឆ្នាំទៅមុខនេះ។ សម្តេចអគ្គ មហាសេនាបតី តេជោ ហ៊ុន សែន ឆ្លៀតខ្ចីឈ្មោះ យមរាជមកកេងចំណេញនយោបាយ លាបពណ៌បក្សប្រឆាំងថា យមរាជត្រូវការឱ្យសម្តេចនៅបម្រើប្រជាជន និងកម្ចាត់អ្នកប្រឆាំង ដែលសម្តេចថា ពួកក្បត់ជាតិ ដើម្បីរក្សាសន្តិភាព និងការអភិវឌ្ឍ។
វាមិនមែនជាលើកទី១ទេ ដែលសម្តេច ហ៊ុន សែន ខឹងអ្នកបង្ហោះព័ត៌មានថា សម្តេចមានជំងឺធ្ងន់ធ្ងរ ឬដាច់សរសៃឈាមខួរក្បាលស្លាប់ ឬស្លាប់ដោយសារជំងឺផ្សេងៗ។ កាលពីឆ្នាំ២០១៦ សម្តេច ហ៊ុន សែន បានខឹងអ្នកបង្ហោះហ្វេសប៊ុកម្នាក់ ថា សម្តេច មានជំងឺដាច់សរសៃឈាមខួរក្បាល។ សម្តេច ហ៊ុន សែន កាលណោះ បានយកឱកាស ចុះទៅសម្ពោធស្ពានជ្រៃធំ នៅជិតព្រំដែនកម្ពុជា វៀតណាម អះអាងថា សម្តេចគ្មានពូជដាច់សរសៃឈាមខួរក្បាល ឬឆ្កួតឡប់ទេ។ តែសម្តេចបែរព្រមាន ថា បើសម្តេចឆ្កួត ឬដាច់សរសៃឈាមខួរក្បាល ប្រទេសកម្ពុជានឹងចលាចល។
អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា យល់ថា ជាសីលធម៌ អ្នកប្រើបណ្ដាញសង្គមហ្វេសប៊ុក មិនគួរចូលទៅបញ្ចេញមតិ ឬបង្ហោះព័ត៌មាន មិនពិត ជាការប្រមាថអាយុជីវិតគេឡើយ។ ប៉ុន្តែ លោកសង្កេតឃើញថា ថ្នាក់ដឹកនាំរដ្ឋាភិបាលខ្លះធ្លាប់ថ្លែងសារប្រភេទហិង្សាប្រមាថជីវិតពលរដ្ឋដែរ ទើបបណ្ដាលឱ្យមានការសាបព្រួសសីលធម៌ ប្រមាថជីវិតគ្នា និងពិបាកក្នុងការហាមឃាត់ ពលរដ្ឋមិនឱ្យប្រមាថជីវិតវិញ។ «»
សម្តេច ហ៊ុន សែន កាលពីពេលកន្លងមក ធ្លាប់ប្រកាសថា នឹងបញ្ជាឱ្យកម្ទេចមនុស្ស ចំនួន ២រយ ឬ ៣រយ (៣០០) នាក់ ប្រសិនបើ មានសញ្ញាណាមួយ ដែលសម្តេចយល់ថា ជាសកម្មភាពប្រឆាំងរបបសម្តេច។ សម្តេច ហៅការបញ្ជាឱ្យកម្ទេចនេះ ជារក្សាសន្តិភាព។ តែអ្នកវិភាគ ហៅអំពើរបស់ សម្តេច ហ៊ុន សែន ជាការរក្សាអំណាច។ សម្តេច ហ៊ុន សែន ក៏ធ្លាប់ប្រកាសឱ្យប្រើកាំភ្លើងយន្ត បាញ់រះ សម្លាប់ លោក សម រង្ស៊ី ប្រធានស្ដីទីគណបក្សសង្គ្រោះជាតិ និង អ្នកហែហមអមដំណើរ ប្រសិនបើពួកគេហ៊ានវិលត្រលប់ចូលកម្ពុជា តាមព្រំដែនគោក៕
