GMAC ព្រមានថា ការផ្អាកប្រព័ន្ធ EBA នឹងធ្វើអោយកម្មកររងគ្រោះ ៧៥ម៉ឺននាក់
ភ្នំពេញៈ សមាគមរោងចក្រកាត់ដេរនៅកម្ពុជា ហៅកាត់ថា GMAC នាថ្ងៃទី ១២ ខែសីហា បានចេញសេចក្ដីថ្លែងការណ៍មួយដោយលើកឡើងថា លទ្ធភាពនៃការផ្អាកប្រព័ន្ធអនុគ្រោះពន្ធ EBA នឹងធ្វើឲ្យរងគ្រោះដល់កម្មករកម្មការិនី ៧៥ ម៉ឺននាក់ និងគ្រួសាររបស់ពួកគេប្រមាណ ៣ លាននាក់ទៀត ហើយក៏មិនបម្រើឱ្យគោលបំណងដើមនៃកម្មវិធីអនុគ្រោះពន្ធក្នុងការកាត់បន្ថយភាពក្រីក្រនោះទេ។
សេចក្តីថ្លែងការណ៍នេះ ធ្វើឡើងជាការរំឭកដល់អ្នកច្បាប់របស់សហភាពអឺរ៉ុប និងមន្ត្រីឲ្យពិចារណាឲ្យបានល្អិតល្អន់ នៅខណៈដែលគណៈកម្មការអឺរ៉ុបនៅថ្ងៃទី ១២ សីហា បានបញ្ចប់នីតិវិធីរយៈពេល ៦ ខែ ក្នុងការឃ្លាំមើល និងការពិគ្រោះផ្សេងៗក្នុងនីតិវិធីផ្អាកប្រព័ន្ធ EBA សម្រាប់កម្ពុជា។
សេចក្ដីថ្លែងការណ៍បានសរសេរថា៖ «GMAC ជាថ្មីម្ដងទៀតសូម [ប្រាប់] ដល់អ្នកច្បាប់នៃសហភាពអឺរ៉ុប និងមន្ត្រីនានា ក៏ដូចជាអ្នកពាក់ព័ន្ធនឹងសហភាពអឺរ៉ុបថា ការផ្អាកផលប្រយោជន៍នៃ EBA សម្រាប់វិស័យរបស់យើងនឹងមានលទ្ធផលធំធេងនោះ គឺការបាត់បង់ការងារនៅក្នុងកម្លាំងការងារផ្នែកវាយនភណ្ឌ ស្បែកជើង និងសម្ភារសម្រាប់ធ្វើដំណើរ ហើយមិនបម្រើឲ្យគោលបំណងដើមរបស់កម្មវិធី EBA ក្នុងការកាត់បន្ថយភាពក្រីក្រ និងការអភិវឌ្ឍប្រកបដោយចីរភាពទេ»។
សេចក្តីថ្លែងការណ៍បន្តថា៖ «វាក៏ជារឿងគួរឲ្យសោកសៅ និងជាលទ្ធផលគួរឲ្យសោកស្ដាយសម្រាប់ GMAC និងកម្លាំងការងាររបស់ខ្លួនដែលបានខិតខំប្រឹងប្រែងយ៉ាងច្រើនក្នុងការធ្វើឲ្យប្រសើរឡើងតួនាទីរបស់អង្គការ ILO ក្នុងការឃ្លាំមើលការគោរពតាមបទដ្ឋានការងារ មិននៅតែកម្ពុជាទេ ថែមទាំងនៅក្នុងវិស័យរបស់យើងក្នុងប្រទេសផ្សេងទៀតនៅលើពិភពលោក»។
GMAC គឺជាសមាគមតំណាងឲ្យរោងចក្រកាត់ដេរស្បែកជើង និងផលិតផលសម្រាប់ធ្វើដំណើរចំនួន ៥៨០ រោងចក្រនៅកម្ពុជា។ សមាគមនេះថ្លែងថា កម្ពុជាបានទទួលប្រព័ន្ធអនុគ្រោះពន្ធពីសហភាពអឹរ៉ុបតាំងពីឆ្នាំ ២០០១ មកម្ល៉េះ។ កាលពីឆ្នាំ ២០១៨ ការនាំចេញពីកម្ពុជាក្នុងវិស័យកាត់ដេរស្បែកជើង និងសម្ភារធ្វើដំណើរ មានទំហំទឹកប្រាក់ ៥,៤ ពាន់លានដុល្លារ ដោយបានកើនទំហំ ១០ ដង បើប្រៀបធៀបទៅនឹងទំហំទឹកប្រាក់ដែលមានកាលពីឆ្នាំដំបូង។
សេចក្ដីថ្លែងការណ៍ដដែលនិយាយថា កិច្ចគាំទ្រស្ថិតនៅក្រោម EBA បានជួយឲ្យពលរដ្ឋកម្ពុជារាប់លាននាក់ចាកចេញពីភាពក្រីក្រ និងចូលរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ច និងសង្គមរបស់កម្ពុជា។
GMAC បានថ្លែងថា ខ្លួនគឺជាសមាគមដំបូងគេដែលស្វាគមន៍ដល់អង្គការពលកម្មអន្តរជាតិរបស់អង្គការសហប្រជាជាតិ ក្នុងការត្រួតពិនិត្យរោងចក្រអំពីការគោរពតាមលក្ខខណ្ឌការងារថ្នាក់ជាតិ និងអន្តរជាតិ។ សមាគមនឹងបន្តធ្វើឲ្យកាន់តែប្រសើរឡើងនូវការគោរពតាមលក្ខខណ្ឌ ហើយនឹងបន្តគាំទ្រការត្រួតពិនិត្យជាសាធារណៈរបស់អន្តរជាតិក្នុងការគោរពតាមលក្ខខណ្ឌការងារ និងការយកចិត្តទុកដាក់ត្រឹមត្រូវលើចង្វាក់ផលិតកម្ម ដោយធ្វើការជាដៃគូជាមួយម៉ាកយីហោអន្តរជាតិដែលមានប្រភពពីកម្ពុជា។
សមាគមរោងចក្រកាត់ដេរថ្លែងថា៖ «GMAC បានដាក់ជូននូវភ័ស្តុតាងគាំទ្រដើម្បីឆ្លើយតបជាវិជ្ជមានទៅលើក្ដីបារម្ភរបស់ EU និងដើម្បីបញ្ជាក់អំពីការរីកចម្រើន និងការគោរពតាមពីសំណាក់វិស័យរបស់យើងទៅលើច្បាប់ និងបទដ្ឋានរបស់ ILO និងដើម្បីបញ្ជាក់ថា ផលប្រយោជន៍ពី EBA គួរតែត្រូវបន្តផ្ដល់ឲ្យដល់ការនាំចេញរបស់យើង»។
លោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានថ្លែងប្រាប់កាលពីដើមខែនេះថា ក្នុងរយៈពេល ៣ ខែ ចាប់ពីថ្ងៃចន្ទ ទី ១២ សីហា ទៅ គណៈកម្មការអឺរ៉ុបនឹងផ្ដល់ការសន្និដ្ឋានដល់អាជ្ញាធរកម្ពុជា ហើយកម្ពុជាមានពេល ១ ខែ សម្រាប់ឆ្លើយតបលើការសន្និដ្ឋាននោះ។
លោកថ្លែងថា៖ «បន្ទាប់ពីនោះទៅ ការសម្រេចនឹងត្រូវបានធ្វើឡើងដោយគណៈកម្មការអឺរ៉ុបថាតើត្រូវផ្អាកខ្លះ ឬផ្អាកទាំងស្រុងលើប្រព័ន្ធអនុគ្រោះស្ថិតក្រោមរបបពាណិជ្ជកម្ម EBA»។
លោក ប៉ាវ ស៊ីណា ប្រធានសហភាពចលនាកម្មករកម្ពុជា បានថ្លែង ពីម្សិលមិញថា កម្មករ សហជីព និងមនុស្សជាច្រើនដែលទទួលបានផលពីកម្មវិធី EBA ចង់ឃើញសហភាពអឺរ៉ុបរក្សាទុក EBA សម្រាប់កម្ពុជា។
លោកថ្លែងថា៖ «ការដក EBA នឹងប៉ះពាល់ធ្ងន់ធ្ងរទៅលើប្រព័ន្ធការងារនៅកម្ពុជា។ ដូច្នេះខ្ញុំគិតថា សហភាពអឺរ៉ុបនឹងគិតពិចារណាបញ្ហានេះ ហើយរក្សាកម្មវិធី EBA ឲ្យកម្ពុជា»។
លោកបន្ថែមថា លោកឃើញមានកត្តា ៣ យ៉ាងដែលសហភាពអឺរ៉ុបធ្វើការសម្រេចចិត្តចាប់ផ្ដើមនីតិវិធីផ្អាក EBA រួមមានសេរីភាពនយោបាយ សិទ្ធិមនុស្ស និងសិទ្ធិការងារ។
លោកថ្លែងថា៖ «ក្នុងវិស័យការងារ រឿងមួយដែលយើងបានឃើញរដ្ឋាភិបាលបានធ្វើតាមលក្ខខណ្ឌរបស់សហភាពអឺរ៉ុបនោះគឺ ការទម្លាក់បទចោទពីសហជីព និងមេសហជីព និងមានការកែប្រែខ្លះលើច្បាប់សហជីព ដែលពួកយើងបានស្នើឲ្យមានការកែប្រែ។ ដូច្នេះ ខ្ញុំគិតថារដ្ឋាភិបាលបានធ្វើឲ្យមានភាពប្រសើឡើងជាបន្តបន្ទាប់»។
អ្នកវិភាគនយោបាយ លោក ឯម សុវណ្ណារ៉ា បានថ្លែងថា សហភាពអឺរ៉ុបបានអះអាងថា រដ្ឋាភិបាលកម្ពុជាគឺជាអ្នកដែលកាន់កូនសោសម្រាប់កែប្រែស្ថានភាពបច្ចុប្បន្ន។ ប៉ុន្តែលោកមិនបានឃើញថា រដ្ឋាភិបាលឆ្លើយតបនឹងលក្ខខណ្ឌរបស់សហភាពអឺរ៉ុបទេ ពាក់ព័ន្ធនឹងការគោរពសិទ្ធិមនុស្ស។ ប៉ុន្តែផ្ទុយទៅវិញ ដាក់បន្ទុកសំណុំរឿងលោក កឹម សុខា និងការចាប់ខ្លួនសកម្មជនអតីតបក្សប្រឆាំងមួយចំនួន។
លោកថ្លែងថា៖ «យើងបានឃើញថា រដ្ឋាភិបាលមានបំណងចង់រក្សា EBA ប៉ុន្តែយើងមិនបានឃើញអាកប្បកិរិយាជាក់ស្ដែងឆ្លើយតបនឹងការទាមទាររបស់អន្តរជាតិទេ។ EBA មិនអាចរក្សា បានទេបើសិនយើងមិនឆ្លើយតបនឹងលក្ខខណ្ឌរបស់គេ»។
លោក ផៃ ស៊ីផាន អ្នកនាំពាក្យរាជរដ្ឋាភិបាលថ្លែងថា ក្រសួងការបរទេស និងក្រសួងពាណិជ្ជកម្មកំពុងធ្វើការចរចាជាមួយសហភាពអឺរ៉ុប ព្រោះកម្ពុជាជាដៃគូជាមួយសហភាពអឺរ៉ុប។
លោកថា៖ «ទោះបីយ៉ាងណាយើងបង្ហាញជំហររបស់យើងជាប្រជាជាតិមានអធិបតេយ្យមួយ យើងមិនអនុញ្ញាតឲ្យបរទេសណាមួយ ក្រុមណាមួយមកបំផ្លាញ រុករានអធិបតេយ្យភាពរបស់កម្ពុជានោះទេ»៕
![]()
![]()
![]()