មន្ត្រីក្រសួងពាណិជ្ជកម្មថាកម្ពុជាត្រៀមការពាររួចហើយចំពោះការបាត់ EBA
ភ្នំពេញ៖ មន្ត្រីក្រសួងពាណិជ្ជកម្មអះអាងថា កម្ពុជាមិនជួបបញ្ហាប្រឈមសេដ្ឋកិច្ចនោះទេ បើទោះជាសហគមន៍អឺរ៉ុបផ្តាច់ប្រព័ន្ធអនុគ្រោះពន្ធហៅកាត់ថា EBA ពីកម្ពុជានៅពេលខាងមុខនេះក៏ដោយ ព្រោះមានការពង្រឹងវិធានការជួយធានាការពារប្រាក់ចំណេញដល់អ្នកវិនិយោគហើយ។
អ្នកនាំពាក្យក្រសួងពាណិជ្ជកម្ម លោក សៀង ថៃ ប្រាប់វីអូឌីថា រដ្ឋាភិបាលដាក់ចេញវិធានការកំណែទម្រង់ស្ថាប័នរដ្ឋជិត២០ចំណុច កាលពីចុងខែមីនា ដើម្បីកាត់បន្ថយបញ្ហាប្រឈមនានា នៅពេលសហគមន៍អឺរ៉ុបផ្តាច់ប្រព័ន្ធអនុគ្រោះពន្ធ EBA រួមមាន កាត់បន្ថយការស្កេន (Scen) ទំនិញតាមទូកុងតឺន័រ ដែលត្រូវដឹកចេញ ឬនាំចូល ជាពិសេសការនាំចេញផលិតផលសម្លៀកបំពាក់និងស្បែកជើង ការកាត់បន្ថយថ្លៃសេវាលើកដាក់នៅតាមកំពង់ផែ ការដឹកជញ្ជូនតាមផ្លូវទឹក ការកាត់បន្ថយថ្លៃអគ្គិសនី កាត់បន្ថយថ្ងៃឈប់សម្រាកសម្រាប់បុណ្យជាតិ ការកែសម្រួលស្ថាប័នគយ ការដកកាំកុងត្រូលចេញពីតាមច្រកព្រំដែន និងការលុបចោលនូវភ្នាក់ងារកម្ពុជានាវាចរ ហៅកាត់ថា កាំសាប ជាដើម។
ក្រោយពីធ្វើកំណែទម្រង់ទាំងនោះ លោក សៀង ថៃ ថា ធ្វើឲ្យការផ្តល់សេវាមួយចំនួនដល់អ្នកវិនិយោគចំនេញថវិកា ចំនេញពេលវេលាច្រើនជាងមុន ព្រមទាំងមិនធ្វើឲ្យប៉ះពាល់ដល់សេដ្ឋកិច្ចកម្ពុជានោះទេ។
លោកអះអាងថា៖ «កាលពីមុនមិនទាន់មានវិធានការរបស់រដ្ឋាភិបាល បងនាំទំនិញមួយកុងទ័រនឺ ឧទាហរណ៍ត្រូវចំណាយធ្វើនេះ ធ្វើនោះនៅក្នុងស្រុកអស់មួយរយដុល្លារ ខ្ញុំឧទាហរណ៍ ឥឡូវពេលមានវិធានការនេះ បងឯងអត់ត្រូវការចំណាយមួយរយដុល្លារហ្នឹងទេ អញ្ចឹងយកមួយរយដុល្លារហ្នឹងទៅបង់ពន្ធទៅ បើសិនជាគេអត់ឲ្យ EBA យើងបន្តទៀត ទំនិញយើងនាំទៅក្រៅប្រទេសត្រូវបង់ពន្ធ ប្រសិនបើគេអត់ឲ្យEBAយើងបន្តទៀត ទំនិញយើងនាំទៅត្រូវបង់ពន្ធ យកអាហ្នឹងទៅបង់ពន្ធទៅ វាបានសល់លុយចំនេញដូចតែគ្នា»។
ប៉ុន្តែ សាស្ត្រាចារ្យនយោបាយ លោក ឯម សុវណ្ណារ៉ា វិភាគថា វិធានការរបស់រដ្ឋាភិបាលគ្រាន់តែជាផ្នែកមួយ អាចជួយសេដ្ឋកិច្ចកម្ពុជាបានក្រោម៥០ភាគរយ និងរយៈពេលខ្លីតែប៉ុណ្ណោះ។ ករណីនេះ លោកថា នឹងធ្វើឲ្យកម្ពុជាជួបបញ្ហាប្រឈមច្រើន ជាពិសេសការប្រកួតប្រជែងសេដ្ឋកិច្ចជាមួយប្រទេសជិតខាងទៅវិញ។
លោកវិភាគថា៖ «ការជួយរបស់រដ្ឋាភិបាល ឧទាហរណ៍កាត់បន្ថយថ្លៃភ្លើង ហើយវត្ថុធាតុដើមនៅកម្ពុជាវានៅថ្លៃទាំងអស់ ដ៏អញ្ចឹងកក្តាផលិតកម្មគឺវាថ្លៃមិនអាចឲ្យអ្នកផលិតទៅប្រកួតប្រជែង ប្រឡងប្រណាំងជាមួយប្រទេសជិតខាង ដូចវៀតណាម ដូចនៅថៃ គេមានការដឹកជញ្ជូនថោកជាងយើង ហើយនឹងថ្លៃទំនិញថោកជាងយើង ដ៏អញ្ចឹងកម្ពុជា ជួបហានិភ័យក្នុងការប្រកួតប្រជែងជាមួយប្រទេសជិតខាង»។
ប្រធានសហព័ន្ធសហជីពចលនាកម្មករ លោក ប៉ាវ ស៊ីណា មានប្រសាសន៍ថា ដើម្បីការពារប្រព័ន្ធអនុគ្រោះពន្ធ EBA បាន លុះត្រាតែរដ្ឋាភិបាល ធ្វើកំណែទម្រង់ផ្នែកសិទ្ធិមនុស្ស ប្រជាធិបតេយ្យ និងស្តារស្ថានការនយោបាយនៅកម្ពុជាឡើងវិញ ទើបធ្វើឲ្យកម្ពុជាមានភាពរីកចំរើន។
លោកមានប្រសាសន៍ថា៖ «ប្រសិនបើរដ្ឋាភិបាលដោះស្រាយបាន ធ្វើតាមតំរូវការរបស់សហគមន៍អឺរ៉ុប មានន័យថា រដ្ឋាភិបាលទទួលបានផលជាច្រើន នៅក្នុងនោះយើងឃើញទីមួយ រក្សាកំណើនសេដ្ឋកិច្ច ទីពីរទាញអ្នកវិនិយោគមករកស៊ីនៅស្រុកខ្មែរកាន់តែច្រើន ទីបីផ្តល់ឱកាសការងារដល់ប្រជាពលរដ្ឋបន្ថែមទៀតដល់ប្រជាពលរដ្ឋយើងដែលមានវ័យគ្រប់អាយុចូលធ្វើការ មានន័យថា គាត់មានឱកាសចូលធ្វើការងាររបស់គាត់បានកាន់តែច្រើន ហើយកាត់បន្ថយការធ្វើចំណាកស្រុក»។
កាលពីថ្ងៃទី១២ កក្កដាកន្លងទៅ លោកនាយករដ្ឋមន្ត្រី ហ៊ុន សែន បានថ្លែងថា បញ្ហា EBA បានក្លាយជាស្រមោលបាត់ទៅហើយ ប៉ុន្តែ លោកអះអាងថា កម្ពុជានៅតែបន្តសហការជាមួយសហភាពអឺរ៉ុបដដែល។
ចាប់ពីខែកុម្ភៈមក សហភាពអឺរ៉ុបដែលមានសមាជិក ២៨ ប្រទេស បានដំណើរការនីតិវិធីឈានទៅព្យួរប្រព័ន្ធអនុគ្រោះពន្ធ EBA ជាបណ្ដោះអាសន្ន ក្រោយពីរកឃើញថា រដ្ឋាភិបាលបានបរាជ័យក្នុងការស្តារស្ថានភាពសិទ្ធិមនុស្ស និងប្រជាធិបតេយ្យតាមលក្ខខណ្ឌរបស់ខ្លួន។
គិតត្រឹមថ្ងៃទី១២ខែសីហា ឆ្នាំ២០១៩ ក្រុមការងាររបស់សហភាពអឺរ៉ុបបានបញ្ចប់នីតិវិធី៦ខែក្នុងដំណើរការដកប្រព័ន្ធអនុគ្រោះពន្ធពីកម្ពុជា ហើយបើសិនជាមានការដកមែនអឺរ៉ុបនឹងសម្រេចនៅដើមឆ្នាំក្រោយនេះ។
ប្រព័ន្ធអនុគ្រោះព័ន្ធអ្វីៗគ្រប់យ៉ាងលើកលែងតែអាវុធ ហៅកាត់ថា EBA ត្រូវបានមន្ត្រីជំនាញ រដ្ឋាភិបាលប៉ាន់ប្រមាណថា ទឹកប្រាក់ជិត ៧០០លានដុល្លារក្នុងមួយឆ្នាំ ដែលកម្ពុជាចំណេញពីការមិនបង់ពន្ធ៕
![]()
![]()
![]()